Search form

Romains 1

Nô Né Vi Méar̂i

1Gènyâ Paulo, kâmö yar̂i i Ièsu Kérisö, ka é aʼyè-i Bâô vè aposetolo, mâ pârher̂e é yè vi rherhî ka e i Bâô. 2Vi rherhî ka é êr̂ê vèa baayê i Bâô, cér̂é vi wêyê né na pâr̂â pérövéta rö-i ka yu ka ar̂ii, wa o xi-e. 3É ër̂i-e rö-i mör̂u mi xè-i David, rö-i nô né kar̂ö, 4aè rö-i nô né Ko-Ar̂ii, wè é pè tö vèa-è vè awir̂è, rö-i ké mör̂u tëë xi-e xè ka pèii mé, ökâré Ièsu Kérisö, ör̂ökau xé-ré. 5Xè xi-e ré gèvé cëi vi méar̂i vi bwir̂i mâ ké tùr̂ùwaa-vé cè ké-r̂é mâ pwêr̂êwaa tâ néwèi na pâr̂â ba pa dö töö, 6rö-i rhîrhér̂é né néé-é, aè gëve bar̂ee, wè, gëve tö vèâ gëve pâ kâmö ré na aʼyè-r̂é na Ièsu Kérisö.

7Ökââ pèci xi-nya yè-ve wânii, pa tö Roma, paxa dö wêê nénââ i Bâô, mâ vi rheewaa-r̂é xè-i ké wê aʼyè-r̂é. Ki tö pwar̂a-ve na vi méar̂i vi bwir̂i mâ nâânévâ xè-i mi Bâô Pevaa xé-r̂é mâ Ör̂ökau Ièsu Kérisö.

Na Rhî Vè E Na Paulo Cè Ki Rhâwaa Pâr̂â Ékalésia Xè Roma

8Gö ëi baayê yè Bâô xè xe-ve rö-i Ièsu Kérisö, wè, na maʼ na rhenô né tâ néwèi xe-ve rö bwêê jë wânii. 9Aè Bâô ré gö pwaér̂ö, Bâô ré gö kâmö yar̂i xi-e rö ko-nya rö-i vi rherhî i o xi-e, wè, na ye vè avâr̂i-nya na ce êr̂ê, 10gö bâ aʼvè néxâi yè-è mâ pëër̂ii rö-i pâr̂â pwaér̂ö xi-nya cè ki nââ yè-nya ké yè pwa yèr̂i-ve, na ki rhî vè e xi-e. 11Gö dö rhî vè e ké yè tö rhûû-ve cè göi nââ yè-ve dèxâ kwââvâr̂â né ko ka yè pè mör̂ö-ve, 12ökâré dèxâ pè nââbéé-ré vèâ rö-i tâ néwèi xi-nya mâ xe-ve ka rhaaxâ.

13Pâ kaavèâi-nya éé, gö rhî vè e cè ke-ve tö vi tâwai bar̂ee êr̂ê, na pôr̂ô na ké vi tâ néxâi xi-nya cè göi vi pwa yèr̂i-ve cè ki wii yè-nya bör̂i pwêê xè xe-ve mâ xè bör̂i névâ pa dö töö bar̂ee. Aè na bâ wii na pè aʼrhua-nya kwéyë rua xina. 14Wè, na wii na kââ ka yè ki-nya rö pwar̂a pâi xè Éléni mâ pâi pa döwöö, rö pwar̂a pâi pa gaamëë mâ pâi pa da tâwai. 15Ökâré pûû ké rhî vè e xi-nya cè göi vi vaa i vi rherhî ka e yè-ve paxa tö Roma.

Ké Awir̂è I Vi Rherhî Ka E

16Wè gö da köö i vi rherhî ka e, ökâré awir̂è i Bâô vè vi pè mör̂u yè pâr̂â paxa tâ néwèi, pâi xè Juda baayê, mâ pâi xè Éléni bar̂ee. 17Na tö vèa xè xi-e na târi i Bâô, ka mi xè-i tâ néwèi mâ waa vè kau vi tâ néwèi, ûr̂û ka yu êr̂ê: «Nè mör̂u na kâmö ka târi xè-i tâ néwèi.»

Cér̂é Dè Cëi Pè Urhii Nô Ka Yaané Xé-r̂é Na Pâr̂â Kâmö

18Na tö vèa mi xè nékö na vi rhôê i Bâô yè pâr̂â câwâ ka yèri tâ nôô yè-è rö-i, mâ ka da târi, ka é waa i pâr̂â kâmö wânii, wè, cér̂é tö xar̂a avâr̂i rö-i veevee. 19Aè na tö vèa rö pwar̂a-r̂é na pè rhîâgür̂ü Bâô, wè na pè tö vèa yè-r̂é na Bâô. 20Tö rhûû, cér̂é paxa tâ néxâi, êr̂ê, na rhau tö vèa yè-r̂é rö pwar̂a pâr̂â nêr̂ê Bâô rhavûû rö ka yùè kavèè bwêê jë na pâr̂â ar̂inadö xi-e ka tö yêr̂ê, mâ awir̂è ka tö yawi, mâ ké Bâô xi-e. 21Ökâré pûû ké yèri pè aʼvè e-r̂é paxa dö töö pa wê tâwai rhéwêr̂ê Bâô, aè cér̂é da pè kau-é êr̂ê Bâô mâ aʼvui-e, aè cér̂é vi teyâi rö-i pâr̂â ké vi tëvë xé-r̂é, na bör̂i vi mür̂ü na wêê nénââ xé-r̂é mâ rhâri xè-i orê. 22Cér̂é êr̂ê cér̂é gaamëë, cér̂é bör̂i vi bwéjé, 23mâ cér̂é pugèwè rhîrhér̂é i Bâô ka mör̂u aau vè kaxoo kâmö ka yè wê mé, mâ mür̂ü, mâ bwâr̂âwê mâ bwâr̂âwê ka ö cuu.

24Tö ökâré, cér̂é köiwaa pâr̂â vi wêêgûr̂û i wêê nénââ xé-r̂é; na bör̂i wê kâyâi-r̂é na Bâô yè miir̂i, cér̂é bör̂i vi kâ vè miir̂i vè rhaaxâ pâr̂â kar̂ö-r̂é; 25cér̂é bör̂i pè vi bawi avâr̂i né Bâô i veevee, mâ cér̂é vi tâ nôô mâ kâmö yar̂i i ka é yaxai rai ké yè pè kau ö ce ré yaxai, ré na e na ki mâ aʼvui-e kwéyë rua waavi! Amen!

26Ökâré pûû ké kâyâi-r̂é i Bâô yè pâr̂â ké vi tâ pêê rö xé-r̂é ka miir̂i. Pâr̂â powè, wè, cér̂é vi pugèwè dö câwâ né kar̂ö vè vi tâ cérè, 27cér̂é ûr̂û-ré bar̂ee na pâi, wè, cér̂é kâyâi dö câwâ né bwè, mâ vi pè pixê vè rhaaxâ pâr̂â rhî vè e xé-r̂é yè-r̂é, aè rö-i ké waa miir̂i xé-r̂é wi mâ wi, cér̂é bör̂i cëi vè rhaaxâ pè urhii rö xé-r̂é ka dö yexèvè yè vi mür̂ü xé-r̂é.

28Cér̂é da tâ néxâi ké yè rhîâgür̂ü e Bâô, ökâré pûû ké kâyâi-r̂é i Bâô yè wêê nénââ xé-r̂é ka vi bwir̂i, cér̂é bör̂i waa ö kââ-ré da e cè ki mâ waa, 29wè, cér̂é rhâri xè-i pâr̂â câwâ ka da târi, mâ veevee, mâ vi pè kau, mâ vi rhôê; mâ cér̂é rhâri i vi yar̂ii mâ vi yö vè mii mâ vi kwér̂ènô, mâ câwâwîî mâ yaané; 30mâ vi vâpèr̂u, mâ vi kââr̂â vee, mâ rhîaa yè Bâô, mâ mör̂ö na néwâ-r̂é, mâ pwéjîî e na némèè-r̂é, mâ vi pwaato, mâ gaamëë ka yèri yaané, mâ da pwêr̂ê dua ër̂i-r̂é; 31mâ na yèri vi tâ néxâi xé-r̂é, mâ vi méar̂i, mâ vi rheè. 32Cér̂é tâwai ka vi câwâ i Bâô êr̂ê, na e na ké-r̂é mé na pâr̂â kâmö pa waa pâr̂â kââ-ré, aè cér̂é bör̂i da köiwaa rö, aè cér̂é aʼvè e bar̂ee cér̂é paxa köiwaa.

Ajie New Testament

© The Bible Society in the South Pacific

More Info | Version Index