Search form

1 MA KORINTOSE 16

Karatã Itã Ɣaa Maturi Ɣɛtɛ.

1Kiniɔ ne, i nnɛ mitsɛrɛ mikarɛ me i karatã ga miasu mibuai mafɔɖedze akuri i Yudea iso ne, mibara nnɛ loɣere mafɔɖedze ma i Galatia sɔ mabara. 2Kɔsiɖa biara ne, ɔbiara si ɔɖi ira ɔsɛ i ɔ̃ karabara kanya sɔ si loba ne, ara ito kuiwɛ̃ iisibawe. 3Si loba ne, loatsɛrɛ ɔko lotã mma i mi mɔmɔ miɖi sɔ masu mi karatã makɛlɛgu Yerusalem. 4Si inya sɔ mme wũ losiai ma ne, iyɔ bo ɔɖuɖu ka boakɛlɛ.

Paulo Adzuni Wa Ɔbara.

5Nto loaki i Makedonia fiɛ loabo mi kɔrɛ alasɔ loɣɛ sɔ loaki i mmɔ tɔtɔ. 6Ito ibara me sɔ nto loaɖe ayi arɛ̃saã i mi kɔrɛ mmɔ. Siainyɔ ɔyu ɔwi ɔɖuɖu ne, nto loawe i mi kɔrɛ fiɛ ka miaɖi me ɔri loakɛlɛ ngbegɔ loakɛlɛ. 7Loito lobie sɔ loatere ise lorui i mi kɔrɛ ɣɛɛ loawe isɛ iabo ɔwi gɔ i Bosate aatã me.

8Loawe i Efeso ngbe isɛ iabo Pentekoste iyi iso. 9Ɔri siare ɔbusi ngbe ɔtã karabara ga lofɔ kuɣa gbaã atoa sɔ matsirise gbodzoo ɔta maɣɛ me iso.

10Si Timoteo ɔba mi kɔrɛ ne, mifɔ wũ kukaakɔ alasɔ Bosate karabara kaɖe ɔto ɔbara lɛ kumɛgɔ nto lobara awe. 11Midaanyɔ wũ lɛ ɔbiɛtɛ ɣɛɛ mibuai wũ sɔ ɔ̃ irisɛ aasɛ katɔ̃ i isobuɛ ame sɔ ɔ̃aba ɔ̃atu me alasɔ nto lonyɔ ɔri sɔ ma gu bo manyii tsɔra aaba.

12I bo ɔnyii Apolo itɔ̃me iso ne, loɔɣere wũ ɔwi gbodzoo sɔ ɔ̃ gu mafɔɖedze mama si maba maanyɔ mi ɣɛɛ ɔ̃itɔrã sɔ ɔ̃aba kiniɔ. Si ɔna ɔri ɔwi mama ɣɛɛ ne, ɔto ɔ̃aba.

So Imala Atɔ̃me.

13Midzuɛ̃ so si miya teteree i kafɔkaɖe ame. Mina ɔtu si miwe ɔle. 14Mibara mi karabara ɔɖuɖu i kuɖɔɛ ame.

15Miɣe Stefana gu ɔ̃ iyo maturi. Ma nɖe maturi ɖeakatɔ̃ ma lofiniki i Akaia ibuti ame. Masu so matã Ɣaa maturi ibuai. Wũ manyii, loto mi i kukpa 16sɔ minyɔ mmagbe igbã nsɛgbai gu mama ma lobuai mapia kube i karabara ame si mitã sɔ ma igbã loakɔkɔ mi.

17So ɔɣɔ me sɔ Stefana gu Fotunato gu Akaiko ɔba maabo alasɔ ise me lɛ mi loɔnya. 18Matã sɔ so ɔɣɔ me gbaã ɔle ɣɛtɛ ɔba me lɛ kumɛgɔ iba-ɔ iso. Lɛ sɔ boasia maturi magbe igbã ikparĩ bowarɛ ma.

19Mafɔɖedze ma mpia i Asia karɔ̃ iso ɔɖuɖu ɔya mi o-o! Akwila gu Priskila gu ikuri nɛ nsɛ isarɛ i ma iyo sɔ maya mi kukaakɔ i Bosate iyere ame. 20Manyii ma ɔɖuɖu mpia ngbe ɔya mi o-o!

Miya so i kuɖɔɛ ame lɛ manyii awe.

21Mme mɔmɔ kɔrɔ̃ losu lotsɛrɛ sɔ, “Mme Paulo mme nto loya mi o-o!” 22Ɔturi biara gɔ loisɛ ɔɖɔɛ Bosate ne, sigbarĩ si siba i ɔnyiiɔ iso. O Bosate, ba!

23Bosate Yesu nnyainyɔ si iwegu mi. 24Wũ kuɖɔɛ si kuwegu mi i Yesu Kristo iyere ame. Si iba ngbɔ.

Ndamu Ɣɛtɛ Siwu

© Wycliffe Bible Translators 2008

More Info | Version Index