Search form

1 Piita 2

1Imɔso fɛ' lɛɛ gɛkyo kamaasɛ lii fɛye-asen dɔ. Fɛŋ sa fɛ' penɛ asa. Fɛŋ sa fɛ' wɔra ilaa ansi so giyan. Fɛ' taa gɛlaaloo yɛgɛ. Fɛŋ sa fɛ' saalɛ asa. 2Fɛɛ gɛnɔɔbono kyokyoo mɛŋ nyɛ ginyabo ne ɔŋ kya taalɛ kyena mɔ, fɛ' yɛgɛ Wurubuaarɛ agyɛbi mɔ a' da fɛye ɔbolɛ gɛnen kee. Mɔ-agyɛbi mɔ a gyɛ gɛsintin. A kya sa nyamesɛ oduduu dɔ ɔlon. Imɔso fɛ kya nu agyɛbi mɔ, fɛ laa wɔra fɛɛ kyokyoo ɔbono ɔ kya nyabo ne ɔ kya sen mɔ. Wurubuaarɛ agyɛbi mɔ ne nan yɛgɛ fɛ' sɛɛ oduduu dɔ de fɛ' nyɛ Yesu amɔlɛgɛ de fɛye‑rɛ mɔ nsana i' wɔra ɔkon. 3I lii fɛɛ fɛye kee fɛ ti daa Wura Yesu gidɛnsɛ gibono ɔ bo sa aye anyamesɛ mɔ kerɛ.

Yesu So Mɔ, Fɛ Dɛ Fɛɛ Wurubuaarɛ Obu Asodoo

4Fɛ' kyu fɛye-nyoro sa Wura Yesu. Ɔ dɛ fɛɛ gisodoo gibono gi kpɛ gi bo no, ne anyamesɛ mɛ kine gimɔ mɔ. Gimɔ, mɔ, ne Wurubuaarɛ gi lɛɛ yɛɛ gi bo agyan sa mɔ ne gi kya gyi mɔ-ginsi. 5Fɛye kee kyu lii Yesu so mɔ fɛ dɛ fɛɛ asodoo abono a kpɛ a bo no mɔ. Imɔso fɛ' yɛgɛ Wurubuaarɛ o' kyu fɛye pɔrɔ oduduu dɔ obu. Wurubuaarɛ gi yɛgɛ mɔ-gisen dɔ ilaa ne n san i gyan' fɛye-ansi so fɛɛ mɔ-asunbi alɛɛbo ne fɛ gyɛ de fɛ' nyɛ fɛ kya lɛɛ oduduu dɔ asunbi fɛ kya sa mɔ. Kyu naa de Yesu Kirisito so mɔ, Wurubuaarɛ laa sɔɔ gɛnen asunbi abono abaa anyɔ. 6I lii fɛɛ i bo mɔ Wurubuaarɛ agyɛbi dɔ yɛɛ,

“Fɛ' kerɛ! Me Wurubuaarɛ nɛ lɛɛ gisodoo

gibono gi laa yɛgɛ me-ɔson obu mɔ ɔ' nyɛ ɔlon yelɛ mɔ.

Gɛnen gisodoo gibono gi tansi gi kya gyi me-ginsi.

N dɛ gimɔ mi‑i too obu gɛsɛ ɔpɔɔrɛ Sayon ɔsowolɛ so.

Ɔbono ɔ laa ka gyan' gɛnen gisodoo gibono so mɔ

ipeeli i maŋ gyi mɔ kpa‑a.”

7Yesu ne n gyɛ gɛnen gisodoo mɔ. Fɛye abono fɛ ka gyan' mɔ so mɔ, ɔ tansi ɔ bo agyan sa fɛye. Asa abono mɔmɔ berɛ mɛŋ kya ka gyan' mɔ so mɔ, i bo Wurubuaarɛ agyɛbi mɔ dɔ gɛtɛɛko kyu lii mɔmɔ so yɛɛ,

“Ibu apɔrɔbo mɛ kyu gisodoo mɔ too gɛbaamara,

ne gɛmara gɛmara mɔ gɛnen gisodoo mɔ, mɔ,

ne Wurubuaarɛ gi san baa kyu pɔrɔ mɔ-ɔson obu mɔ

ne obu mɔ gi nyɛ ɔlon yelɛ.”

8Wurubuaarɛ gi wolaa wu tɔgɛ yela yɛɛ,

“Gisodoo gidɛ gi laa yɛgɛ anyamesɛ mɛ laa sidi de mɛ' lii tɔrɔ.”

Ibono so Yesu laa yɛgɛ anyamesɛ mɛ sidi gɛnen mɔ ne n gyɛ yɛɛ mɛ kya wɔra gisomaanu de Wurubuaarɛ agyɛbi mɔ. Gɛnen gisomaanu gibono gi gyɛ daa ilaa ibono i wolaa i dɛ sa mɔmɔ.

9Fɛye abono fɛ ka gyan' Yesu so mɔ berɛ, Wurubuaarɛ gi tɔɔsɛ fɛye lɛɛ yɛɛ fɛ laa bingiri fɛɛ gɛsu kolon dɔ asa. Fɛ bingiri fɛɛ awuragyibo asunbi alɛɛbo sa Wura Wurubuaarɛ. Fɛye ne ɔ lɔrɔ yela sa mɔ-nyoro lii nsinkpan kpɛi-kpɛi so asa dɔ. Fɛ gyɛ daa mɔ gbaa-gbaa lɛɛ adɛ. Wurubuaarɛ gi tɔɔsɛ fɛye lɛɛ de fɛ' nyɛ fɛ kya lɛɛ mɔ-ginyen. I lii fɛɛ mɔ ne n biidɛ fɛye lii gibiri dɔ baa mɔ-fatela dɔ nfono i bo ɔbolɛ ne i kya dɛ gɛnɔ mɔ. 10Owi ɔko dɔ mɔ nkana fɛ mɛŋ gyɛ asa ako sa Wurubuaarɛ. Idɛ kon, fɛ baa wɔra Wurubuaarɛ-lɛɛ adɛ gɛsintin so. Nkana Wurubuaarɛ mɛŋ su fɛye gitolon. Idɛ kon, Wurubuaarɛ gi su fɛye gitolon.

Fɛ' Kyena Akyenabi Dɛnsɛ

11Me-nanboana laarɛsɛ, a gyɛ daa fɛɛ asafo gɛsinkpan so. A gyɛ daa akpakyonbo. Imɔso n kya kolɛ fɛye, fɛŋ sa fɛ' yɛgɛ gɛsinkpan so ilaa i' gyi fɛye-amu. Gɛnen ilaa ibonoana i kya kɔ de fɛye de i' nyɛ nyida fɛye-nwɔnsa. 12Fɛ tɛ saarɛ asa abono mɛ mɛŋ kya son Wurubuaarɛ faa mɔ, fɛ' yɛgɛ fɛye-gɛkyena gɛ' wɔra gɛkyena dɛnsɛ. Nengyene i ba yɛɛ mɛ ten fɛye-gɛnɔ yɛɛ fɛ gyɛ ilaa nyɛnyɛn awɔrabo mɔ, mɛ laa wu fɛye-gidɛnsɛ gibono fɛ kya wɔra mɔ de mɛ' yen Wurubuaarɛ kyu lii gimɔ so gɛkaabono ɔ laa baa laa aye mɔ.

Fɛ' Bara Fɛye-Nyoro Gɛsɛ

13Kyu lii aye-Wura Yesu Kirisito so mɔ, fɛ' bara fɛye-nyoro gɛsɛ sa nyamesɛ kamaasɛ ɔbono ɔ kya gyi gɛbelɛnsɛ fɛye so mɔ. Fɛ' bara fɛye-nyoro gɛsɛ sa ɔbono ɔ kya gyi gɛwura fɛye so 14de abono ɔ yela gɛbelɛnsɛ buu de mɔ-nyoro mɔ kee. I lii fɛɛ ɔ yela ɔmɔ daa de mɛ' biidɛ ilaa nyɛnyɛn awɔrabo giso de mɛ' yen abono mɛ kya wɔra ilaa ibono i boran mɔ. 15I gyɛ daa Wurubuaarɛ gɛlaarɛ yɛɛ fɛ' wɔra ilaa ibono i kaaborɛ mɔ, de i' yɛgɛ ginyantɔgɛ awura mɛ' bun mɔmɔ-nnɔ so. 16Fɛ kya bara fɛye-nyoro gɛsɛ gɛnen mɔ, iŋ gyɛ yɛɛ fɛ gyɛ nbide berɛ. Fɛŋ sa fɛ' tɔgɛ yɛɛ fɛŋ tɛ sa ɔko so mɔ, fɛ laa wɔra fɛye-ɔbolɛ gɛlaarɛ ilaa ibono iŋ boran sa Wurubuaarɛ mɔ. Fɛ' wɔra daa Wurubuaarɛ nbide. 17Fɛ' kyu buubuu sa anyamesɛ pɛwu. Fɛ' laarɛ abono fɛye‑rɛ ɔmɔ fɛ bo Yesu ɔson mɔ dɔ mɔ ilaa. Fɛ' selɛ Wurubuaarɛ de fɛ' buu ɔbono ɔ kya gyi gɛwura fɛye so mɔ.

18Fɛye abono fɛ tɛ awura asɛ mɔ, fɛ' bara fɛye-nyoro gɛsɛ sa fɛye-wuraana de fɛ' kyu buubuu sa mɔmɔ fɛɛ gɛnɔɔbono i kaaborɛ mɔ. Iŋ sa i' wɔra yɛɛ abono mɛ kya wɔra fɛye gidɛnsɛ abɛɛ mɛ kya su fɛye so mɔ wolɛ. Fɛ' dabɔlɛ buu abono mɛ kya wɔra fɛye gɛnɔ mɔ de fɛ' bara fɛye-nyoro gɛsɛ sa ɔmɔ. 19Fo ɔko fo kya wu ɔlaawusɛ ɔbono iŋ kaaborɛ fo wu mɔ ne fo nyɛ gisen Wurubuaarɛ so mɔ, i kya gyi Wurubuaarɛ ginsi. 20Nengyene fo nyamesɛ fo wɔra ilaa nyɛnyɛn, ne mɛ biidɛ fo-giso imɔ so ne fo nyɛ gisen mɔ, i kaaborɛ fo' nyɛ afaala ako? Kuaa. Fɛɛ ilaa dɛnsɛ berɛ ne fo wɔra ne fo kya wu imɔ so ɔlaawusɛ mɔ, nyɛ gisen daa. Fo nyɛ gisen gɛnen ɔlaawusɛ ɔbono dɔ mɔ, imɔ ibono ne n kya gyi Wurubuaarɛ ginsi.

21Yesu Kirisito kee gi nyɛ gisen owi ɔbono ɔ kya wu ɔlaawusɛ ɔ kya sa fɛye mɔ. O kyu wɔra sinkaala yela yɛɛ fɛye kee fɛ' kyule de fɛ' wu ɔlaawusɛ fɛɛ mɔ-lɛɛ mɔ ɔnan. Gɛnen gɛkyena gɛbono ɔnan ne Wurubuaarɛ yɛɛ gɛ' wɔra fɛye-lɛɛ.

22Yesu mɛŋ wɔra ilaa nyɛnyɛn iko kerɛ.

Ɔko‑rɛ ɔko mɛŋ nu gɛkaako yɛɛ ɔ taa kɛɛ abon kerɛ.

23Asa mɛ saalɛ mɔ mɔ, ɔ mɛŋ saalɛ ɔmɔ ka gikɔ.

O wu ɔlaawusɛ asa abaa dɔ mɔ, ɔ mɛŋ tɔgɛ sa mɔmɔ yɛɛ,

“Fɛ' yɛgɛ de‑e, fɛ laa wu me kyule.”

O nyi ibono Wurubuaarɛ laa gyi asa nbɛlɛ gɛsintin ɔkpa so.

Imɔso o kyu imɔ pɛwu‑u wɔra Wurubuaarɛ abaa dɔ.

24Yesu gi kyu aye-anyamesɛ ilaa nyɛnyɛn sola owi ɔbono mɛ da mɔ aŋanbi mada de oyii mɔ. Mɔ gbaa-gbaa nyoro ne o kyu so aye-gisobiidɛ. Ɔ wɔra gɛnen daa de a' nyɛ lɛɛ abaa lii ilaa nyɛnyɛn giwɔra dɔ de a' nyɛ a kya gyi gɛsintin a kya sa Wurubuaarɛ aye-gɛkyena dɔ. Ilɔ ibono Yesu gi nyɛ lii awɔrɔfɔɔ abono o wu kyu lii aye so mɔ i yɛgɛ aye-nyoro gi' tɔrɔ aye. 25Nkana a fuɛ Wurubuaarɛ ɔkpa mɔ fɛɛ gɛnɔɔbono isandɛ mɛ kya fuɛ mɛ naa mɛ naa mɔ. Idɛ kon berɛ a kii ba aye-ɔkparɛbo Yesu asɛ. Mɔ ne n gyɛ ɔbono ɔ kya kerɛ aye so.

Ndamu Ɣɛtɛ Siwu

© Wycliffe Bible Translators 2008

More Info | Version Index