Search form

1 Piita 3

Akyii Mɛ' Bara Mɔmɔ-Nyoro Gɛsɛ Sa Mɔmɔ-Kuliana

1Gɛnen kee ne fɛye akyii mɔ, fɛ' bara fɛye-nyoro gɛsɛ sa fɛye-kuliana. Nengyene mɔmɔ dɔ ako mɛ kine Wurubuaarɛ ɔkalan mɔ mɔ, kyu lii fɛye-akyenabi dɛnsɛ abono fɛ laa kyu kyena de ɔmɔ mɔ so mɔ, i laa yɛgɛ mɛ' kyɛɛgɛ mɔmɔ-nwɔnsa. I maŋ baa tiri yɛɛ fɛ' tɔgɛ ɔkalan mɔ sa mɔmɔ. 2I kya nyiile yɛɛ fɛye-kuliana mɔ mɛ laa wu gɛnɔɔbono fɛ dɛ buubuu fa‑a sa Wurubuaarɛ ne fɛ kya gyi gɛsintin sa ɔmɔ fɛye-gɛkyena dɔ mɔ. 3Fɛye-ɔdan ɔbono fɛ bo mɔ ɔŋ sa ɔ' wɔra nyoro gilɔrɔ wolɛ, fɛɛ iman giŋminde abɛɛ sika kɔkɔɔ agbangbaran gikyɛ abɛɛ akuru dɛnsɛ gidela. 4Fɛ' yɛgɛ fɛye-asen dɔ ne i' lɛɛ fɛye-ɔdan ɔbono fɛ bo mɔ nyiile. Ɔdan ɔbono ɔŋ kya nyida gɛkaako mɔ ne n gyɛ ibono fo ɔko fo laa bara fo-nyoro gɛsɛ de fo' yela fo-gɛwɔnsa gɛten kolon. Gɛnen ɔdan ɔbono ne n kya gyi Wurubuaarɛ ginsi.

5Adedaabo owi mɔ, gɛnen ne mɔmɔ akyii abono mɛ kyu mɔmɔ-nyoro too Wurubuaarɛ so mɔ mɛ kyu lɔrɔ mɔmɔ-nyoro ne. Mɛ kyu mɔmɔ-ansi gyan Wurubuaarɛ so ne mɛ bara mɔmɔ-nyoro gɛsɛ sa mɔmɔ-kuliana. 6Gɛnen akyii abono dɔ ɔko ne n gyɛ Sara. O nu mɔ-kuli Aberaham gɛdɛ, ne o kyu buubuu sa mɔ yɛɛ mɔ-wura ne. Nengyene fɛye kee fɛ laa wɔra ilaa ibono i boran mɔ ne fɛŋ selɛ gifuu mɔ, fɛ laa wɔra fɛɛ Sara baarɛ mɔ-biana gɛsintin.

Fɛye Anyen Fɛ' Kyu Buubuu Kyena De Fɛye-Kaana

7Gɛnen kee ne fɛye anyen mɔ, mɔ, fɛye‑rɛ fɛye-kaana fɛ tɛ mɔ, fɛ' su mɔmɔ so yɛɛ mɛŋ bo lon fo fɛye. Imɔso fɛ' kyu buubuu kyu kyena de mɔmɔ. I lii fɛɛ Wurubuaarɛ laa sa fɛye‑rɛ ɔmɔ kpini mɔ asɛ gɛkyena. Fɛ' kyena de mɔmɔ gɛnen de fɛye-ndalaa nbono fɛ laa dalaa kolɛ Wurubuaarɛ mɔ, sɛi-sɛi ɔ mɛŋ sa ɔ' nyɛ tii nmɔ-ɔkpa.

Fɛ' Kyena De Abara Kanpɛ

8Pɛi de me-gɛnɔ gɛ yii mɔ, fɛye abono fɛ ka gyan' Yesu so mɔ pɛwu, fɛ' wɔra gɛnɔ kolon. Fɛ' su abara so de fɛ' laarɛ abara ilaa. Fɛ' wɔra ilaa ibono i laa yɛgɛ asa asen a' tɔrɔ mɔmɔ mɔ de fɛ' bara fɛye-nyoro gɛsɛ sa abara. 9Fɛŋ sa fɛ' kyu ilaa nyɛnyɛn kyu ka ilaa nyɛnyɛn gikɔ abɛɛ fɛɛ ɔko gi saalɛ fɛye mɔ, fɛ' saalɛ mɔ ka gikɔ. Fɛye berɛ, fɛ' kolɛ daa Wurubuaarɛ ayuule sa gɛnen asa abono. Wurubuaarɛ kya laarɛ fɛ' nyɛ mɔ-ayuule so ne ɔ tɔgɛ fɛye yɛɛ fɛ' son mɔ mɔ. 10I dɛ daa fɛɛ gɛnɔɔbono mɛ ŋmarasɛ Wurubuaarɛ agyɛbi mɔ dɔ mɔ. Mɛ ŋmarasɛ yɛɛ,

“Fo ɔbono fo kya laarɛ gɛkyena dɛnsɛ

ne fo kya laarɛ fo' gyi ɔkon fo-gɛkyena dɔ mɔ,

kerɛ fo-gɛnɔ so dɔɔdan.

Foŋ sa fo' tɔgɛ ilaa nyɛnyɛn abɛɛ fo' kɛɛ abon.

11Kine ilaa nyɛnyɛn giwɔra de fo' san wɔra daa ilaa dɛnsɛ.

Nyanga ansi de fo' wɔra ilaa ibono i laa bara gisen yuuli mɔ.

12I kya nyiile yɛɛ Wura Wurubuaarɛ kya kerɛ

asa abono mɔmɔ-asen dɔ i boran sa mɔ mɔ so,

ne ɔ kya nu mɔmɔ-ndalaa.

Asa abono mɛ kya wɔra ilaa nyɛnyɛn mɔ berɛ,

mɔmɔ‑rɛ Wura Wurubuaarɛ ansi a laa wɔra anan.”

Fo-Gɛsintin So Ne Fo Kya Wu Ɔlaa Mɔ, Wurubuaarɛ Laa Yuule Fo

13Nengyene ilaa dɛnsɛ giwɔra ne n kpɛ i bo fɛye-ansi so mɔ, anɛ ne nan wɔra fɛye ilaa nyɛnyɛn? 14Ba‑a ne ako mɛ kya yɛgɛ fɛ' wu ɔlaa lii fɛye-gɛsintin gigyi so mɔ, fɛ gyɛ daa amudɛnsɛbo Wurubuaarɛ asɛ. Fɛŋ sa fɛ' yɛgɛ mɔmɔ-aŋaala a' wɔra fɛye gifuu abɛɛ i' wɔra fɛye gɛwɔnsa.

15Fɛye berɛ fɛ' kyu buubuu sa Kirisito lii fɛye-asen dɔ yɛɛ mɔ-nkon ne n gyɛ fɛye-Wura. Fɛ' wolaa baala fɛye-nyoro, nengyene fɛɛ ɔko gi taa taasɛ fɛye kyu lii Wurubuaarɛ ilaa ibono fɛye-ansi a gyan' imɔ so mɔ, de fɛ' nyɛ lɛɛ gɛnɔ sa mɔ dɔɔdan. 16Ɔko gi taasɛ fɛye gɛnen ilaa ibono mɔ, fɛ' nyɛ gisen de fɛ' kyu buubuu lɛɛ gɛnɔ kanpɛ sa mɔ. Fɛ' wɔra daa ilaa ibono fɛ nyi fɛye-asen dɔ yɛɛ i boran mɔ. Fɛ kya wɔra gɛnen ne ako mɛ kya saalɛ fɛye ne mɛ kya tɔgɛ ilaa nyɛnyɛn kyu lii fɛye Kirisito asonbo akyenabi dɛnsɛ abono so mɔ, mɛ laa gyi ipeeli. 17Fo wɔra ilaa dɛnsɛ ne i gyɛ Wurubuaarɛ gɛlaarɛ dɔ yɛɛ fo' wu ɔlaa mɔ, imɔ ibono ne n boran don ibono fo laa wɔra ilaa nyɛnyɛn de fo' wu ɔlaa mɔ.

18Kyu lii aye anyamesɛ ilaa nyɛnyɛn so mɔ, Yesu Kirisito gi wu' de aye‑rɛ Wurubuaarɛ nsana i' nyɛ lɔrɔ. Mɔ ɔbono mɔ-gisen dɔ i boran sa Wurubuaarɛ mɔ gi wu' sa aye abono aye-asen dɔ iŋ boran sa mɔ mɔ. Ɔ kpɛ wu' daa gikolon gibono ne, i ta. Mɛ mɔɔ daa mɔ-nyoro gibi mɔ. Mɔ-oduduu mɔ berɛ gi nyɛ gɛkyena, 19ne o kpe ibuni dɔ kpaa tɔgɛ Wurubuaarɛ agyɛbi sa ibuni ibono Wurubuaarɛ gi tii ɔmɔ wɔra gɛtɛɛko mɔ. 20I lii fɛɛ owi ɔbono gɛnen ibuni ibono mɛ tɛ de ansi Nowa aberɛ dɔ mɔ, mɛ mɛŋ nu Wurubuaarɛ gɛdɛ. Wurubuaarɛ, mɔ, gi nyɛ gisen kyena kerɛ ɔmɔ gɛnen‑n kaaborɛ ɔ yɛgɛ Nowa gi salɛ gikolii belɛ giko. Asa kalɛsɛ ako, asa gukue ɔkara ne n nyɛ loo Nowa gikolii belɛ gibono dɔ, ne mɔmɔ abono berɛ mɛ nyɛ Wurubuaarɛ gi mɔlɛgɛ mɔmɔ, ne mɛ mɛŋ sii nkyu nbono gi gyi asɛnsɛ mɔ dɔ. 21Wurubuaarɛ gi kyu Nowa aberɛ dɔ ilaa idɛ kyu lɛɛ mɔ Wurubuaarɛ sagyere ilaa nyiile. I kya nyiile yɛɛ Wurubuaarɛ sagyere kya mɔlɛgɛ aye ndɛ asa de aye‑rɛ Wurubuaarɛ nsana i' lɔrɔ. Nkana iŋ gyɛ yɛɛ Wurubuaarɛ sagyere mɔ kya foro nyamesɛ nyoro so ineesi daa. Sagyere mɔ kya mɔlɛgɛ nyamesɛ. I lii fɛɛ nyamesɛ kya kolɛ Wurubuaarɛ yɛɛ ibono Wurubuaarɛ gi kpaarɛ mɔ-ilaa nyɛnyɛn fuɛ sa mɔ faa, ɔ' yɛgɛ mɔ ɔ' bii mɔ-gisen dɔ yɛɛ kyu naa de Yesu Kirisito giwukyingi mɔ so mɔ, mɔ-ilaa nyɛnyɛn ibono ɔ wɔra mɔ iŋ baa i kya nyida mɔ‑rɛ Wurubuaarɛ nsana. 22Yesu gi kii kyon Wurubuaarɛ dɔ kpe ɔ tɛ Wurubuaarɛ gibaa gyisɛ so, ɔ kya gyi gɛwura. Wurubuaarɛ dɔ isɔɔ de ilaa ibonoana pɛwu i kya nyɛ ɔlon anyamesɛ so mɔ, Yesu ne n bo lon imɔ pɛwu so.

Ndamu Ɣɛtɛ Siwu

© Wycliffe Bible Translators 2008

More Info | Version Index