Search form

1 MA TESALONIKASE 1

Boya Mi.

1Mme Paulo gu Silvano gu Timoteo lotsɛrɛ ɔko gɔgbe boto botã mi ma nɖe bo Ɔse Ɣaa gu Bosate Yesu Kristo mare i Tesalonika. Bokparama kayi sɔ Bosate abualɛra gu isobuɛ si awegu mi.

Bopɛ Ɣaa Siba Sɔ Misu So Mitã Wũ.

2Ɔwi biara ne, bosɛ bopɛ Ɣaa siba i mi ɔɖuɖu iti, fiɛ ɔwi biara ana si boto bokparama kayi ne, bosɛ bonyigi mi. 3Boisɛ boɣara sɔ boaɣere bo Ɔse Ɣaa kumɛgɔ mito mibara mi kafɔkaɖe karabara. Bosɛ boɣɛ ana kumɛgɔ mibua misɛ mibuai maturi i kuɖɔɛ ame fiɛ misu mi ɔriinyɔ mipia i Bosate Yesu Kristo ame teteree. 4Manyii, boɣe sɔ Ɣaa to ɔɖɔɛ mi gbaã fiɛ ɔɖi mi lɛ ɔ̃ mare. 5Itɔ̃me Bielea nɛ boba boaɣere mi ne, iiɖe itɔ̃me kunu kere iɖe. Ɣɛɛ iba ku ɔle gu Siwarã Bielea gu ita isiara gbodzoo. Minya kumɛgɔ bomɔɛ̃ so bola i mi ndɛ̃, fiɛ mi isɛɛ ɔso bobara ngbɔ. 6Gbaã ne, misore bo gu Bosate nsɛgbai. Atoa sɔ miwe inyɛ gbodzoo ne, mifɔ itɔ̃me nɛgbe ku isoɣɔ nɛ i Siwarã Bielea ɔtã mi. 7Nnɛgbe ɔtã sɔ mikpese ikparĩ mitã mafɔɖedze ma ɔɖuɖu mpia i Makedonia gu Akaia. 8Iiɖe Bosate itɔ̃me ɔnɔwɛ̃ lobɔrɛ i mi kɔrɛ ikɛlɛ Makedonia gu Akaia, ɣɛɛ mi Ɣaa kafɔkaɖe ana ɔɔkɛlɛ kakɔi biara gɔ iisiɖe bo loaɣɛ kuira alasɔ maturi ɔɖuɖu ɔnɔ. 9Ma mɔmɔ to maɣɛ kumɛgɔ mifɔ bo ku ɔwi gɔ boba mi kɔrɛ gu kumɛgɔ minyua mi aɣɔ isɔrɛ fiɛ misu so mitã Ɣaa gbaã gɔ ɔnɔwɛ̃ mba ngbã. 10Fiɛ mito minyɔ ɔ̃ Ɔbi gɔ ɔtara ɔbɔrɛgu i makpise ame ɔri mibɔrɛgu i kuɖokpo. Yesu gɔgbe lofɔ bo ɔbɔrɛgu i kutsue ikpadzɛ̃ nɛ i Ɣaa to ɔsu ɔbɔ makpibaradze iso ame ne.

Ndamu Ɣɛtɛ Siwu

© Wycliffe Bible Translators 2008

More Info | Version Index