Search form

1 MA TESALONIKASE 3

1Gɔ mi inya ɔbua ito bo ɔkã ɔso ne, bonɔ karɔ̃ sɔ boawe i Atene bo ɔnɔwɛ̃. 2Boto bopia Timoteo sɔ ɔba ɔ̃apia mi ɔle si ɔbuai mi i mi kafɔkaɖe ame. Ɔɖe bo ɔnyii gɔ nsɛ ɔbuai bo i Ɣaa karabara gu Kristo Itɔ̃me Bielea iɣɛ ame. 3Boito bobie sɔ kama iti nɛgbe aatã sɔ kuwɛ̃ aakpese kama. Mi mɔmɔ miɣe koko sɔ kama iti nɛgbe ne, Ɣaa ɔɔsia ne ita ɔtã bo ɔɖuɖu. 4Mianyigi sɔ ɔwi gɔ bopia i mi kɔrɛ ne, boka mi i ne iso boɖegu katɔ̃ sɔ ito iaba. Lɛ kumɛgɔ miɣe ne, iɔba ngbɔ ana. 5Ara wagbe ɔso lopia Timoteo sɔ ɔba ɔ̃anyɔ si mikpese mimɔɛ̃ kafɔkaɖe mito ne. Wũ ifɔ̃ nɖe sɔ Ɔbosam to ɔ̃aba ɔ̃ala mi ɔnyɔ ɔtã bo karabara ɔkpese siefe.

Mi Kafɔkaɖe Ɔpia Bo Isoɣɔ.

6Ɣɛɛ Timoteo ɔba ɔ̃ɔɣere bo ku isoɣɔ sɔ mi kafɔkaɖe gu mi ituriɖɔɛ iikpaki. Ɣɛɛ ne, mito minyigi bo gbaã fiɛ mito mibie sɔ mianya bo lɛ kumɛgɔ bo wũ ito bo ɔkã sɔ boanya mi. 7Nwagbe ɔso ne, manyii, atoa sɔ boto bowe inyɛ fiɛ ara ɔnyi bo ato ne, mi kafɔkaɖe sɛ kapia bo isoɣɔ, kaɣɔra bo situ. 8Ngbã ɣɛtɛ ɔbo i bo ame gɔ bonɔ kumɛgɔ miɣɛ teteree i Bosate kafɔkaɖe ame.

9Boibawo Ɣaa siba ɔpɛ i mi iti siyi ala isoɣɔ nɛ mipia bo i ɔ̃ anɔ ɔso. 10Boto botã Bosate iti kasɛ̃ i kakɔme sɔ ɔtã sɔ boaledza isarɛ sɔ ara wa lokuti fiɛ mi kafɔkaɖe aayi ne, boasu botã mi.

11Bo Ɔse Ɣaa mɔmɔ gu Bosate Yesu si mabusi ɔri matã bo sɔ boaba mi kɔrɛ. 12Bosate si ɔtã sɔ mi kuɖɔɛ gɔ miba mitã so gu maturi mama ɔɖuɖu si kusi kubua lɛ kumɛgɔ boɖɔɛ mi. 13Nnɛgbe loatã bo ɔse Ɣaa ɔpia mi ɔle ɔɖi mi ɔbɔrɛgu i akpi ɔɖuɖu ame ɔbara mi sekelee i ɔ̃ katɔ̃ gbɔgbɔɔgbɔ iyi nɛ i Bosate Yesu aaledza kayi gagbe iso iba ku ɔ̃ mare ne.

Ndamu Ɣɛtɛ Siwu

© Wycliffe Bible Translators 2008

More Info | Version Index