Search form

1 Tɛsalonika 5

Fɛ' Baala Fɛye-Nyoro Gyoo Gɛkaabono Yesu Laa Kii Ba Mɔ

1Aye-nanboana Yesu ɔson mɔ dɔ, gɛnen owi ɔbono abɛɛ gɛkɛ gɛbono Yesu laa kii ba gɛsinkpan so mɔ berɛ, iŋ tiri yɛɛ a' ŋmarasɛ imɔ so ilaa sa fɛye. 2I kya nyiile yɛɛ fɛye gbaa-gbaa fɛ ti fɛ nyi seregɛ yɛɛ gɛnen gɛkɛ gɛbono Wura Yesu laa ba de ɔ' baa gyi asa nbɛlɛ mɔ gɛ laa fuɛ asa ayaa fɛɛ gɛnɔɔbono oyu kya baa yuuri gɛnyɛ mɔ. 3Owi ɔbono asa mɛ laa tɔgɛ yɛɛ, “Aye-nyoro gi tɔrɔ aye; sɛi maŋ baa wɔra aye” mɔ, nfono mɔ, awɔrɔfɔɔ a laa tu mɔmɔ faa poroko, fɛɛ gɛnɔɔbono gɛdun gɛ kya tu ɔtɔ wura mɔ. Gɛnen gɛkaabono mɔ, mɛ maŋ nyɛ ɔkpa selɛ lii awɔrɔfɔɔ abono dɔ. 4Aye-nanboana Yesu ɔson mɔ dɔ, fɛye berɛ, fɛŋ tɛ gibiri dɔ kyu lii ilaa idɛ so de gɛnen gɛkɛ mɔ gɛ' fuɛ fɛye-ayaa fɛɛ oyu. 5Fɛye pɛwu fɛ gyɛ daa fatela dɔ asa de owi kenken asa. Aye‑rɛ fɛye a mɛŋ gyɛ gibiri dɔ asa abɛɛ gɛnyɛ asa.

6Imɔso a mɛŋ sa a' dɛ tan ilaa idɛ so fɛɛ asa sɛnsɛ-lɛɛ mɔ. Aye-ansi a' dɛ ilaa idɛ so de a' bii aye-nyoro gikedabi. 7I lii fɛɛ asa abono mɛ kya dɛ ginsi gɛdɛ mɔ, gɛnyɛ ne mɛ kya dɛ. Ne abono mɛ kya boo nta mɔ, gɛnyɛ ne mɛ kya boo mɔmɔ-nta. 8Aye berɛ, aŋ sa a' wɔra fɛɛ ginsi gidɛ adɛbo abɛɛ nta aboobo. Fɛ' yɛgɛ aye-ansi a' dɛ ilaa so. A' wɔra fɛɛ asogya. Asogya mɛ kya kpe ikɔ mɔ, mɛ kya kyu ilaa ikoana kyu kun mɔmɔ-amu de mɔmɔ-akan adontɔ so. Ilaa ibono a laa kyu kun aye-lɛɛ akan mɔ ne n gyɛ gisɔɔgyi de gɛlaarɛ' gɛbono a bo sa Yesu mɔ. Ne ilaa ibono a laa kyu kun aye-amu mɔ ne n gyɛ amɔlɛgɛ abono aye-ansi a gyan yɛɛ Yesu laa kyu mɔlɛgɛ aye mɔ. 9I kya nyiile yɛɛ Wurubuaarɛ mɛŋ lɛɛ aye de a' loo mɔ-ginyadon dɔ. Ɔ lɛɛ aye daa de a' nyɛ mɔ-amɔlɛgɛ kyu naa de aye-Wura Yesu Kirisito so. 10Aye-Wura Yesu Kirisito gi wu' sa aye de owi ɔbono ɔ laa kii ba gɛsinkpan so mɔ, ba‑a a wu' daa‑o, a san a tɛ de ansi daa‑o, aye‑rɛ mɔ a' kyena dabɔlɛ. 11Imɔso fɛ' tɔgɛ keda abara nyoro de fɛ' kpaa abara de fɛ' sɛɛ Yesu ɔson mɔ dɔ fɛɛ gɛnɔɔbono fɛ ti wolaa fɛ dɛ faa.

N Kya Ka Fɛye Gika Laalaalogɛsɛ

12Aye-nanboana Yesu asonbo, a kya kolɛ fɛye, fɛ' kyu buubuu sa asa abono mɛ gyangbara sa fɛye Wura Yesu ɔson mɔ dɔ mɔ. Mɛ kya nyanga ansi mɛ kya ka fɛye. 13Gɛnen gɛsun mɔ so mɔ, fɛ' tansi kyu buubuu belɛ kyu sa mɔmɔ de fɛ' laarɛ mɔmɔ-ilaa lii fɛye-asen dɔ. Fɛ' kyu gisen yuuli kyu kyena de abara.

14Aye-nanboana, a kii a kya kolɛ fɛye yɛɛ awolɛgyɔbo abono mɛ bo fɛye dɔ mɔ, fɛ' tɔgɛ sa mɔmɔ yɛɛ wolɛgyɔ mɛŋ boran. Fɛ' tɔgɛ wɔra asa abono mɛŋ bo otu mɔ. Asa abono, mɔ, mɛ tiri gikpaa mɔ, fɛ' kpaa mɔmɔ. Fɛ' nyɛ gisen sa nyamesɛ kamaasɛ. 15Fɛ' kerɛ dɔɔdan de fɛye dɔ ɔko ɔŋ sa o' kyu ilaa nyɛnyɛn ka ilaa nyɛnyɛn gikɔ. Owi kamaasɛ mɔ, fɛ' kpɛ fɛ kya laarɛ fɛye-nanboana Yesu asonbo ɔdan ɔwɔraten de nyamesɛ kamaasɛ kee ɔdan ɔwɔraten.

16Fɛ' yɛgɛ fɛye-asen dɔ i' wɔra fɛye ɔkon owi kamaasɛ dɔ. 17Fɛ' kpɛ fɛ kya dalaa aberɛ kamaasɛ. 18Fɛ' kyu afaala kyu sa Wurubuaarɛ ilaa kamaasɛ dɔ. Imɔ idɛana ne Wurubuaarɛ kya laarɛ fɛ' wɔra kyu naa de fɛye‑rɛ Kirisito Yesu ginyamesɛ kolon mɔ so.

19Fɛŋ sa fɛ' wɔra ilaa ibono i laa yɛgɛ Wurubuaarɛ Oduduu mɔ maŋ nyɛ lii gya fɛye dɔ mɔ. 20Nengyene ako yɛɛ Wurubuaarɛ Oduduu mɔ gi lɛɛ ilaa iko nyiile mɔmɔ ne mɛ kya tɔgɛ imɔ mɔ, fɛ mɛŋ sa fɛ' mirigi ɔmɔ-anɛbi. 21Fɛ' kerɛ mɔmɔ-ilaa tɔgɛsɛ mɔ pɛwu dɔ dɔɔdan daa. Ibono i boran mɔ ne fɛ' keda. 22Ilaa nyɛnyɛn ne n gyɛ ilaa nyɛnyɛn, fɛŋ sa fɛ' wɔra.

23Aye-gisen yuuli gɛmu Wurubuaarɛ gbaa-gbaa ɔ' lɔrɔ fɛye-gimu de ayaa yela sa mɔ-nyoro. Ɔ' kerɛ fɛye-oduduu dɔ, fɛye-nwɔnsa dɔ, de fɛye-nyoro gibi mɔ ilaa pɛwu so sa fɛye. Ɔ' kerɛ imɔ pɛwu so de gɛkaabono aye-Wura Yesu Kirisito gi kii ba gɛsinkpan so mɔ, ɔko ɔ mɛŋ sa o' wu ilaa nyɛnyɛn iko fɛye so tɔgɛ. 24Wurubuaarɛ ɔbono ɔ tɔgɛ fɛye yɛɛ fɛ' kyu fɛye-nyoro sa mɔ mɔ gyɛ daa ɔpaawɔrabo. Ɔ laa kerɛ imɔ so.

25Aye-nanboana Yesu ɔson mɔ dɔ, fɛ' dalaa kolɛ Wurubuaarɛ sa aye. 26Fɛ' kyu gɛnyi-abi afaala faala fɛye-nanboana Yesu ɔson mɔ dɔ mɔ pɛwu. 27Me, Pɔɔlo, n dɛ Wura Yesu ginyen n kya tɔgɛ mi‑i sa fɛye yɛɛ fɛ' kalɛ gɛnen ɔwolɛ baarɛ sa fɛye-nanboana asɛnsɛ abono pɛwu mɛ bo Yesu ɔson mɔ dɔ mɔ. 28Aye-Wura Yesu Kirisito ɔ' sa fɛye so gɛwɔnsa dɛnsɛ.

Ndamu Ɣɛtɛ Siwu

© Wycliffe Bible Translators 2008

More Info | Version Index