Search form

1 TIMOTEO 2

La Ɔɔkparama Kayi Ɔwi Biara.

1Ira ɖeakatɔ̃ nɛ lobie sɔ aabara nɖe sɔ, la ɔɔtã Ɣaa iti si ala ɔɔkparama kayi i maturi ɔɖuɖu iti. La ɔɔsu mi gu ma ɔɖuɖu ara nyaa ɔɔbɔ Ɣaa katɔ̃. 2La ɔɔkparama kayi ɔɔtã magara gu mma ɔɖuɖu nto maɖe maturi iso sɔ boawe i isobuɛ gu isoɣɔ ame ɔwi biara sɔ boasumu Ɣaa i kuwarɛ ame i ɔri biara iso. 3Kayi ikparama nɛgbe igbã nsɛ ibo bo Ɖidze Ɣaa anɔ ne. 4Alasɔ ɔto ɔbie sɔ ɔ̃afɔ ɔbiara ɔbɔ ngbã fiɛ maatsue nnɛ nɖe ɔnukuare. 5Gbaã ne, Ɣaa ɔwɛ̃ ɔɖe mpia. Kpuradze ɔwɛ̃ saã ana mpia gɔ ɔ̃ nɖe ɔrɛrɛ̃ gɔ marɔ Kristo Yesu. Ɔ̃ nsɛ ɔledza bo gu Ɣaa inyɔ ndɛ̃ ne. 6Ɔ̃ ɔɖe losu so ɔtã i kayiiso maturi ɔɖuɖu iti ne. Yesu ɔbara nnɛgbe si ɔte sɔ ɔwi gɔ i Ɣaa ɔɣɛ ɔsɛ sɔ ɔ̃aɖi kayiiso maturi ɔɖuɖu ɔɔɣo. 7Nnɛgbe ɔso i Ɣaa ɔbara me ratedze gu katɔ̃mesɛdze ne. Gbaã iɖe, fiɛ iiɖe sila sɔ ɔɖi me sɔ loaɖe Katɔ̃mesɛdze gu ratedze gɔ loaɖi kafɔkaɖe ara karɔ̃ ɔte mma loiɖe ma Yudase.

8I mafɔɖedze kasarɛkɔ̃ biara ne, lobie sɔ marɛrɛ̃ si makparama kayi ku situ sekelea sɔ si Ɣaa ɔnya ma nrɔɔ̃ sekelea ne, ɔ̃atsue sɔ maɔɖi so mabɔrɛgu i ara lalaa ame fiɛ sikpã gu kakpadzɛ̃ na i ma ndɛ̃. 9Lobie ana sɔ marɔ̃go aanyɔ ma arapia iso sɔ aibatsue anɔ, nnɛgbe loate sɔ mabɔ so karɔ̃ ne. Iilɛ sɔ maanyi akpofa siare, makɛrɛ so gu sikãrɛtɛa ara agbãagbã wa lofɔ kuɣa gɔ loate kato ikɔlɛso. 10Ɣɛɛ ne, ma sibara sɛɛ si siɖi site sɔ maɖe marɔ̃go ma nsiai Bosate. 11Ɔrɔ̃go biara si ɔbɔ so karɔ̃ si ɔsuã ara i karɔ̃ ibɔso ɔɖuɖu ame. 12Loitã ma ɔri sɔ mate marɛrɛ̃ ara, ɣee maɖe marɛrɛ̃ iso. Ɣɛɛ mama kanya si masɛ. 13Alasɔ Adam i Ɣaa ɔɖe katɔ̃ ɔbara fiɛ ɔbara Eva. 14Fiɛ iiɖe Adam i Tsirise ɔsɔsɔla, ɣɛɛ ɔrɔ̃go ɔsɔsɔla fiɛ ɔtã sɔ ɔbara ikpi. 15Ɣɛɛ si ɔrɔ̃go ɔya teteree i ɔ̃ kafɔkaɖe ame ku kuɖɔɛ fiɛ ɔbara so sekelee ɔbɔ so karɔ̃ ne, ɔ̃aki i ɔ̃ kuɣe ame pɔkɔsɔɔ.

Ndamu Ɣɛtɛ Siwu

© Wycliffe Bible Translators 2008

More Info | Version Index