Search form

2 Tɛsalonika 3

Fɛ' Dalaa Sa Aye

1Aye-nanboana Yesu ɔson mɔ dɔ, pɛi de me-gɛnɔ gɛ' yii mɔ: fɛ' dalaa sa aye yɛɛ Wura Yesu ilaa i' yɛlegɛ de i' nu gyan belen-belen. Asa mɛ' nu imɔ, mɛ' sɔɔ imɔ gyi de mɛ' kyu buubuu sa imɔ fɛɛ gɛnɔɔbono fɛye kee fɛ wɔra mɔ. 2Fɛ' dalaa kee yɛɛ Wurubuaarɛ ɔ' mɔlɛgɛ aye lii abono mɛ gyɛ ilaa nyɛnyɛn awɔrabo ne mɛŋ bo amu mɔ abaa dɔ. I kya nyiile yɛɛ i mɛŋ gyɛ nyamesɛ kamaasɛ ne n bo gisɔɔgyi sa Wura Yesu. 3Aye-Wura Yesu, mɔ, gyɛ daa ɔpaawɔrabo. Ɔ laa sa fɛye ɔlon de ɔ' dii fɛye de Ɔbonsan, nyamesɛ nyɛnyɛn mɔ, ɔ mɛŋ sa ɔ' nyɛ fɛye. 4Wura Yesu so mɔ, a sɔɔ fɛye gyi yɛɛ fɛ kya gyi ilaa ibono a wolaa tɔgɛ fɛye mɔ so ne fɛ laa gyi ilaa ibono a kya tɔgɛ fɛye ɔwolɛ baarɛ dɔ faa kee so. 5Wura Yesu Kirisito ɔ' kpaa fɛye de owi kamaasɛ fɛ' nyɛ bii fɛye-asen dɔ yɛɛ Wurubuaarɛ kya laarɛ fɛye-ilaa. Ɔ' yɛgɛ fɛ' kpɛ fɛ kya da otu fɛ kya nyɛ gisen fɛ kya wɔra Wurubuaarɛ gɛlaarɛ fɛɛ mɔ Kirisito kee-kee lɛɛ mɔ ɔnan.

Fɛŋ Sa Fɛ' Wɔra Wolɛgyɔ

6Aye-nanboana Yesu ɔson mɔ dɔ, a dɛ aye-Wura Yesu Kirisito ginyen a kya ka fɛye yɛɛ abono mɛ sii mɛ tɛ yɛɛ mɛ maŋ wɔra gɛsun mɔ, fɛŋ sa fɛ' baa bugi ansi de ɔmɔ. Gɛnen asa abono akyenabi aŋ dɛ fɛɛ gɛnɔɔbono a nyiile fɛye mɔ. 7Fɛye gbaa-gbaa fɛ nyi yɛɛ i kaaborɛ fɛ' nyingi ilaa ibono a wɔra mɔ de fɛ' wɔra gɛnen kee. A bo fɛye asɛ nno mɔ, aye berɛ, a mɛŋ kyena giyan. 8A mɛŋ gyi ɔko agyudɔ giyan yɛɛ a mɛŋ ka amɔ gikɔ. A pɛɛrɛ ansi wɔra gɛsun gɛnyɛ de gɛpɛ. A mɛŋ laarɛ yɛɛ a' wɔra gɛsola sa fɛye dɔ ɔko‑rɛ ɔko. 9Nkana i dɛ ɔkpa yɛɛ a' kyu aye-nyoro kyu too fɛye so berɛ. Aye mɔ, a laarɛ daa yɛɛ aye-gɛkyena mɔ gɛ' wɔra sinkaala sa fɛye de fɛ' nyɛ kasɛ.

10Ko‑o owi ɔbono a bo fɛye asɛ mɔ, a yela nbara nko sa fɛye yɛɛ,

“Nengyene ɔko yɛɛ ɔ maŋ wɔra gɛsun mɔ,

fɛŋ sa fɛ' yɛgɛ de o' gyi.”

11Fɛ' kerɛ gɛnen ilaa idɛ pɛwu so dandan. I lii fɛɛ a kya nu yɛɛ fɛye dɔ ako mɛ sii mɛ tɛ yɛɛ mɛŋ baa wɔra gɛsun. Mɛ kpɛ ma‑a ten ma‑a loo asa ilaa dɔ daa. 12Aye-Wura Yesu Kirisito so mɔ, a kya ka gɛnen asa abono ne a kya kolɛ mɔmɔ yɛɛ mɛ' yela mɔmɔ-nwɔnsa gɛten kolon de mɛ' wɔra gɛsun kyu laarɛ mɔmɔ-agyudɔ gyisɛ. 13Fɛye abono fɛ kya son Yesu dandan mɔ, fɛ mɛŋ sa fɛ' yɛgɛ idɛnsɛ giwɔra i' fii fɛye.

14Nengyene fɛye dɔ ɔko gi kine yɛɛ ɔ maŋ gyi ilaa ibono a ŋmarasɛ sa fɛye faa so mɔ, fɛ' kerɛ gɛnen isa ɔbono dandan yela de fɛŋ sa fɛ' baa bugi ansi de mɔ de i' nyɛ wɔra mɔ-ipeeli. 15Fɛ mɛŋ sa fɛ' kyu mɔ wɔra fɛɛ fɛye-ɔkyobo berɛ. Fɛ' ka mɔ fɛɛ fɛye-tedɛana dɔ ɔko.

Agyɛbi Laalaalogɛ

16Aye-Wura Yesu gbaa-gbaa, ɔbono ɔ gyɛ gisen yuuli pɛwu gɛmu mɔ, ɔ' sa fɛye gisen yuuli owi kamaasɛ dɔ, ɔkpa kamaasɛ so. Aye-Wura Yesu ɔ' kyena fɛye pɛwu dɔ.

17Me, Pɔɔlo, gbaa-gbaa ne n dɛ me-gibaa n kya ŋmarasɛ n kya kalɛ fɛye faa. Imɔ idɛ ne n gyɛ me-ɔwolɛ kamaasɛ daasɛ. Gɛnen ne n' kya ŋmarasɛ me-iwolɛ ne. 18Aye-Wura Yesu Kirisito ɔ' sa fɛye ɔkamaasɛ so gɛwɔnsa dɛnsɛ.

Ndamu Ɣɛtɛ Siwu

© Wycliffe Bible Translators 2008

More Info | Version Index