Search form

2 Timoti 1

1Me Pɔɔlo ne n kya ŋmarasɛ gɛnen ɔwolɛ baarɛ mi‑i sa fo. Wurubuaarɛ gi lɛɛ gibaa yii me yɛɛ n' wɔra Kirisito Yesu ɔsɔɔ de n' tɔgɛ asa ilaa ibono ɔ ka yela sa ɔmɔ mɔ. Ɔ ka yela yɛɛ asa abono mɔmɔ‑rɛ Kirisito Yesu mɛ wɔra nyamesɛ kolon mɔ mɛ laa nyɛ Wurubuaarɛ asɛ gɛkyena. 2N kya wɔra ɔwolɛ baarɛ n kya sa fo, Timoti, fo ɔbono fo baa bingiri fɛɛ me-bi korogɛsɛ mɔ. Fo-ilaa i bo me-gisen dɔ. Aye-sɛ Wurubuaarɛ de aye-Wura Kirisito Yesu mɛ' sa fo so gɛwɔnsa dɛnsɛ, mɛ' su fo so, de mɛ' sa fo gisen yuuli.

3Owi kamaasɛ dɔ mɔ, n kya nyingi fo so gɛdalaa dɔ. N kya faala Wurubuaarɛ mi‑i sa fo gɛnyɛ de gɛpɛ. N kya dalaa gɛnen mɔ, n nyi me-gisen dɔ yɛɛ n dɛ gisen dɛnsɛ mi‑i son Wurubuaarɛ, fɛɛ gɛnɔɔbono me-naanaana mɛ son mɔ. 4N kya nyingi owi ɔbono fo naa kyena gbaa ginsikyu mɔ de‑e, i kya yɛgɛ n' nyingi fo so. N kya laarɛ de a' kii nyɛ wu abara de i' tansi wɔra me ɔkon. 5Owi kamaasɛ mɔ, n kya nyingi gɛnɔɔbono fo kya ka gyan Yesu so lii fo-gisen dɔ mɔ. Gɛnen kee ne fo-naana kyiisɛ, Loowisi, de fo-nyi, Yunisi, mɛ ka gyan mɔ so ne. N nyi yɛɛ gɛnen gikagyan gibono ɔnan kee ne n bo fo dɔ faa.

Lɛɛ Wura Yesu Ɔkalan Mɔ Tɔgɛ Sa Asa De Foŋ' Selɛ Ɔlaawusɛ

6Nɛ naa kyena kyu me-abaa gyan fo so kolɛ Wurubuaarɛ Oduduu sa fo. Gɛsintin mɔ, Wurubuaarɛ gi sa fo adawo ako de fo' kyu wɔra mɔ-gɛsun. Imɔso n kya nyingi fo yɛɛ fo' lɔrɔ ɔgya wɔra gɛnen adawo abono dɔ. 7Oduduu ɔbono Wurubuaarɛ gi kyu sa aye mɔ mɛŋ kya yɛgɛ a' bingiri afuubo. Mɔ-Oduduu mɔ kya yɛgɛ a' nyɛ daa ɔlon, a' nyɛ gɛlaarɛ' aye-asen dɔ, de a' nyɛ taalɛ keda aye-nyoro. 8Imɔso gɛŋ sa fo' yɛgɛ i' wɔra fo ipeeli yɛɛ fo laa lɛɛ aye-Wura Yesu ilaa nyiile asa. Gɛŋ yɛgɛ me-ilaa i' wɔra fo ipeeli kee yɛɛ mɛ keda me tii de obu lii Yesu gɛsun mɔ so. Nyɛ gisen de fo' sɔɔ fo-lɛɛ ɔlaawusɛ ɔbono ɔ laa tu fo kyu lii Yesu ɔkalan konkonsɛ mɔ so mɔ. Wurubuaarɛ laa sa fo ɔlon.

9Wurubuaarɛ gi mɔlɛgɛ aye lii aye-ilaa nyɛnyɛn giwɔra dɔ, ne ɔ tɔgɛ aye yɛɛ a' lɔrɔ aye-nyoro yela sa mɔ-nkon. Iŋ gyɛ aye-ilaa wɔrasɛ so ne Wurubuaarɛ gi mɔlɛgɛ aye gɛnen. I gyɛ daa mɔ gbaa-gbaa gɛlaarɛ de mɔ-gɛwɔnsa dɛnsɛ gɛbono ɔ bo sa aye mɔ so. Pɛi de ɔ' lɔɔ lɛɛ ilaa kamaasɛ mɔ, ɔ wolaa sa aye so gɛwɔnsa dɛnsɛ gɛdɛ kyu lii aye‑rɛ Kirisito Yesu ginyamesɛ kolon mɔ so. 10Idɛ kon, ɔ yɛgɛ gɛnen mɔ-gɛwɔnsa gɛbono gɛ lii gɛwi. I lii fɛɛ aye-ɔmɔlɛgɛbo Kirisito Yesu gi ba gɛsinkpan so. Ne ɔ mɔɔ lɛwu gibɔrɔ. Ɔ lɛɛ Wurubuaarɛ asɛ gɛkyena gɛbono gɛŋ bo ɔkara mɔ gɛwi nyiile asa kyu naa de mɔ-ɔkalan konkonsɛ mɔ so. 11Yesu Kirisito gi kyu mɔ-gɛsun wɔra me-abaa dɔ yɛɛ me kee n' wɔra gɛnen ɔkalan mɔ ɔtɔgɛbo. Ɔkalan mɔ so mɔ, nɛ wɔra Kirisito Yesu ɔsɔɔ, ne n' kya nyiile asa ɔkalan mɔ ilaa. 12Gɛnen ɔkalan mɔ so ne n' kya yiyɛɛ faa. Imɔ‑rɛ imɔ gɛnen gbaa mɔ, iŋ bo me ipeeli. I lii fɛɛ n nyi ɔbono nɛ ka gyan mɔ so mɔ, ne n nyi ibono ɔ bo lon de ɔ' taalɛ kerɛ ilaa ibono o kyu wɔra me-abaa dɔ mɔ so kpaa fo gɛkɛ gɛbono ɔ laa gyi anyamesɛ pɛwu nbɛlɛ mɔ.

13Ilaa ibono nɛ nyiile fo kyu lii Yesu ɔkalan mɔ so mɔ i gyɛ gɛsintin. Keda imɔ dɔ de fo' kyu imɔ nyiile asa. Kpɛ fo kya ka gyan Wurubuaarɛ so de fo' laarɛ Wurubuaarɛ de anyamesɛ ilaa kyu naa de fo‑rɛ Kirisito Yesu ginyamesɛ kolon mɔ so. 14Yɛgɛ Wurubuaarɛ Oduduu ɔbono ɔ bo aye-asen dɔ mɔ ɔ' kpaa fo de fo' kerɛ agyɛbi dɛnsɛ abono Wurubuaarɛ gi kyu wɔra fo-abaa dɔ mɔ so.

15Fɛɛ gɛnɔɔbono fo nyi mɔ, aye-nanboana abono pɛwu mɛ lii Esiya gɛsinkpan so mɔ mɛ yaasɛ taa me yɛgɛ. Mɔmɔ dɔ ako ne n gyɛ Figyilo de Hɛmogyinɛ. 16Onɛsiforo berɛ, Wura Yesu o' su mɔ‑rɛ mɔ-gɛten dɔ awura so sa me. I lii fɛɛ ɔ kya kyena yɛgɛ me-gisen gi kya tɔrɔ me. Iŋ bo mɔ ipeeli yɛɛ n tii de obu. 17Mɔ berɛ, ɔ kpɛ loo Rom gɛrɛ mɔ, ɔ pɛɛrɛ ansi laarɛ me-gɛten, ne ɔ baa wu me. 18Wurubuaarɛ ɔ' yɛgɛ aye-Wura Yesu o' su mɔ so gɛkaabono Yesu laa gyi anyamesɛ nbɛlɛ mɔ. Gɛnɔɔbono ɔ kpaa me Efiso ɔsowolɛ so mɔ, iŋ gyɛ fo gisafo. Fo nyi imɔ pɛwu.

Ndamu Ɣɛtɛ Siwu

© Wycliffe Bible Translators 2008

More Info | Version Index