Search form

KARABARA 5

Anania Gu Safira Ɔla Sila.

1Ɔrɛrɛ̃ ɔwɛ̃ ana ɔwe gɔ marɔ sɔ Anania fiɛ ɔ̃ ɔre nɖe Safira. Ma wũ makpɛti ma karɔ̃ marɔdɛ̃. 2I ɔrɔ̃go itsue ame ne, ɔrɛrɛ̃ ɔsu sikã siwɛ̃ ɔkɔla fiɛ ɔsu sikutia ɔba ɔ̃apia i katɔ̃memasɛdze nrɔɔ̃ ame. 3Ne Petro ɔkarɛ wũ sɔ, “Anania, be ɔso fiɛ atã Satana ɔɖe-ɔ iso fiɛ ato ala sila atã Siwarã Bielea? Mikuti karɔ̃ ga mikpɛti mirɔdɛ̃ sikã siwɛ̃ misɛ so. 4Mi mba karɔ̃ ga misu mirɔdɛ̃, fiɛ kuso gɔ matã mi ana ne, mi mba. Be ɔso fiɛ atã sɔ mibara ira nyanyarĩa nɛgbe igbã? Iiɖe maturi awune iɖe mila sila mitã, ɣɛɛ Ɣaa.”

5Gɔ Anania ɔnɔ atɔ̃me wagbe ne, ɔluwɛ̃ ɔrɔ̃ ɔfere i karɔ̃ ɔkpi! Ifɔ̃ siare ɔmɔɛ̃ mma ɔɖuɖu lonɔ nnɛ loba. 6Ne maporoporoi ma mpia i ma ndɛ̃ i mmɔ ɔsu ɔkati mamini wũ, maputa wũ masɛ maabiara ne. 7Lɛ iɖɔwũ itɛ kama ne, ɔ̃ ɔre ɔba ɔ̃ɔbo mmɔ gɔ ɔ̃iɣe nnɛ loba. 8Ne Petro ɔɣere wũ sɔ, “Ɣere me, karɔ̃ ga i mi gu fɔ ɔrã ɔrɔdɛ̃ ne, sikã dzɛ matã mi ɔɖuɖu i ngbe ne?”

Ne ɔrɔ̃go ɔfɔ kanya sɔ, “Aĩ, sikã ɔɖuɖu mmɔ ne.”

9Petro ɔɣere wũ sɔ, “Be ɔso fiɛ mi gu fɔ ɔrã ɔbara kanya kawɛ̃ sɔ miala Siwarã Bielea minyɔ? Nyɔ, maporoporoi ma loputa fɔ ɔrã masɛ maabiara ɔɔba maɣɛ sɔ maaputa-ɔ fɔ wũ makɛlɛgu.”

10Ɔluwɛ̃ ne, ɔ̃ wũ ɔrɔ̃ ɔfere i karɔ̃ i Petro ngbatɔ̃ ɔkpi kɛrɛrɛ. Gɔ maporoporoi ɔba maanya sɔ ɔ̃ɔkpi ɔrɛ ne, maputa wũ makɛlɛgu masɛ maabiara i ɔ̃ ɔrã kɔrɛ.

11Ne ɔso ifɔ̃ siare ɔmɔɛ̃ mafɔɖedze gu mma ɔɖuɖu lonɔ ara wa loba.

Katɔ̃memasɛdze Ɔbara Awawãra Agbãagbã.

12Katɔ̃memasɛdze ɔbara awawãra gu akparĩ gbodzoo i maturi ndɛ̃. Mafɔɖedze ɔɖuɖu sɛ masarɛ i isɔrɛyo ngbegɔ marɔ sɔ Salomo kakpakɛ ame. 13Maturi mama ma loifiniki sɛ manigã ma ibore ibo, ɣɛɛ mala maɔwarɛ ma. 14Ɣɛɛ maturi gbodzoo, marɛrɛ̃ gu marɔ̃go, ɔfiniki mafɔ Bosate maɖe maba maabo i mafɔɖedze ikuri ame. 15Maturi ɔsu manyɛse maba maarara i sikala iso i siriruɛ ngbegɔ mafɔ maɖe sɔ si Petro to ɔfe ne, bidɛ ɔ̃ kusɔ aasia i manyɛse iso. 16Masu manyɛse gbodzoo gu mma ɔɖuɖu i siwarã lalaa to siɖaa mabɔrɛgu i simagɛ̃ dzɛ loki silɔ Yerusalem mabɔ ma kɔrɛ fiɛ masa ma ɔɖuɖu.

Ma Yudase Makpakpa Ɔkpɛ̃gu Katɔ̃memasɛdze Sirerɛ.

17Sɔrɛdzekpakpa pelepele gu ma ikuri nɛ marɔ sɔ ma Zadukise ɔtsɛ sirerɛ ikpɛ̃gu katɔ̃memasɛdze teteree. 18Ne ɔso mamɔɛ̃ katɔ̃memasɛdze masɛ maapia i iyo ame. 19Ɣɛɛ kasɛ̃ ne, Ɣaa kpabo ɔba ɔ̃asese ma kayogodɔ̃ ɔɖi ma. 20Ne ɔɣere ma sɔ, “Mikɛlɛ Isɔrɛyo si misɛ miaɣere maturi ngbã ɣɛtɛ mɛgbe iso ara ɔɖuɖu!”

21Gɔ kaɖe ɔsɛ̃ ne, makɛlɛ isɔrɛyo ame masɛ maatsɛ ara ite lɛ kumɛgɔ i Ɣaa kpabo ɔɣere ma.

Ɔwi gɔmɔ ame ne, sɔrɛdzekpakpa pelepele gu ɔ̃ makpakpa laa gu ma Yudase matɔ̃ɖedze ɔsarɛ, ne mapia iyo madzuɛ̃se sɔ masɛ maaɖi katɔ̃memasɛdze i iyo mabɔ. 22Ɣɛɛ gɔ makɛlɛ ne, maisɛ maanya ma! Ne ɔso makpese maba maaɣere ma sɔ, 23“Gɔ bosɛ ne, bonya sɔ kukui ɔsɛ̃ kpakpara, madzuɛ̃se ana ɣɛ i kanya. Ɣɛɛ gɔ bosese ne, mma bomɔɛ̃ bopia mmɔ kuwɛ̃ na i iyo ame!” 24Gɔ isɔrɛyo madzuɛ̃se ɔkpakpa gu sɔrɛdzekpakpa ɔnɔ itɔ̃me nɛgbe ne, awururu ɔkpɛ̃ ma gbaã, alasɔ maitsue nnɛ iɖe loba. 25Ne ɔwɛ̃ ɔba ɔ̃aɣere ma sɔ, “Mma mimɔɛ̃ mipia iyo ne, maɣɛ i isɔrɛyo mato mate maturi ara.”

26Mmɔ i isɔrɛyo madzuɛ̃se ɔkpakpa gu ɔ̃ maturi ɔta makɛlɛ sɔ maamɔɛ̃ ma mabɔ. Ɣɛɛ gɔ mato manigã sɔ mma losakanya i mmɔ aapɛ ma ata ɔso ne, maimɔɛ̃ ma sikitii.

27Gɔ masɛ maakɔ katɔ̃memasɛdze mabɔ ne, maɖi ma maɣedza i ma Yudase matɔ̃ɖedze katɔ̃ sɔ masɔrɛdze ɔkpakpa pelepele si ɔkarɛ ma itɔ̃me. Ɔkarɛ ma sɔ, 28“Boiɣere mi sɔ midaasiɣɛ kuira i Yesu gɔgbe iso? Ɣɛɛ miɔkararã itɔ̃me nɛgbe i Yerusalem ɔɖuɖu. Mibie ana sɔ miatã bo ipɔ i Yesu kukpi iti!”

29Mmɔ i Petro gu katɔ̃memasɛdze mama ɔɣɛ sɔ, “Ikote sɔ boakã Ɣaa atsue boɖo maturi awune. 30Yesu gɔ mitã mapɛ mamatãra i kudziri iso fiɛ ɔkpi ne, bo mawa Ɣaa ɔtara wũ ɔbɔrɛgu i makpise ame ɔpia ngbã. 31Ɣaa ɔtara wũ ɔsia i kakpakpakɔi i ɔ̃ kuɖearɔ̃ iso. Ɔsu wũ ɔbara Ɔkpakpa gu Ɖidze sɔ Israel kaɖe ana ɔri mafiniki i ma situ ame mana akpi isu itsɛ. 32Bo gu Siwarã Bielea dzɛ i Ɣaa ɔsu ɔtã mma nsɛ makã wũ atsue ne, bo nɖe ara wagbe maɖansiɛ ne.”

33Gɔ manɔ atɔ̃me wagbe ne, sikpã ɔmɔɛ̃ ma gbaã. Ne ɔso masia ita sɔ maaɖoe katɔ̃memasɛdze magbe. 34Ɣɛɛ ma ndɛ̃ ɔ Farisise ɔwɛ̃ gɔ marɔ Gamaliel fiɛ ɔɖe Mose mmara tedze ɔsɛ̃ ɔtã ma. Maturi ɔɖuɖu sɛ mawarɛ ɔrɛrɛ̃ gɔgbe kukaakɔ. Ɔta ɔya i atɔ̃mekaɣɛkɔ̃ ɔɣɛ sɔ matã maɖi katɔ̃memasɛdze si ma kerekere si masɛ iti ame. 35Mmɔ ɔto ɔɣere ma sɔ, “Israel maturi, minyɔ kukaakɔ nnɛ mito mibie sɔ miabaragu mmagbe! 36Ɔwi gɔ lofe ame ne, ɔrɛrɛ̃ ɔwɛ̃ gɔ marɔ sɔ Teuda ɔbara so lɛ ngɔ lobua ɔnya. Maturi alafa ana ɔta masiai wũ. Ɣɛɛ gɔ maɖoe wũ ne, ɔ̃ masiaidze ɔsame, ne ɔ̃ ikuri nɛmɔ ɔbiɛ ne. 37Ne kama ɔwi gɔ maka maturi ne, Yuda gɔ lobɔrɛ i Galilea ɔsa maturi mawɛ̃ kanya mata maya i abã iso. Gɔ maɖoe wũ ne, ɔ̃ masiaidze ɔsame. 38Ne ɔso nnɛ nto loɣere mi nɖe sɔ, minyua mmagbe. Si ara wa mato mate gu nwa mato mabara ne ma mɔmɔ are aɖe ne, ɔwi kurukutu ame ne wã ɔɖuɖu to atui. 39Ɣɛɛ si Ɣaa kurabarara kuɖe ne, miibawo ma ɔtindza. Si iiɖe ngbɔ ne, iyi to iba gɔ mianya sɔ Ɣaa mɔmɔ mito mikpɛ̃gu!”

40Ɔ̃ kuka ɔtã mafinikira ma adzuni. Ne ɔso makpere katɔ̃memasɛdze mabɔ ma ndɛ̃, ne mapɛ ma maɣere ma sɔ madaasiɖe ika kuiwɛ̃ i Yesu itɔ̃me iso fiɛ manyua ma ne. 41Gɔ mato makɛlɛ ne, isoɣɔ lala ɔbo i ma ame, alasɔ manya sɔ Ɣaa ɔka ma ɔpia i mma lokote sɔ maana kunuarɛ i Yesu iti. 42Ne kama ne, iyi biara mala maɔte Itɔ̃me Bielea sɔ Yesu nɖe Kristo i ma Yudase isɔrɛyo gu maturi ayo.

Ndamu Ɣɛtɛ Siwu

© Wycliffe Bible Translators 2008

More Info | Version Index