Search form

Kolosiya 4

1Fɛye abono asa mɛ tɛ fɛye asɛ mɔ, fɛ' kyu gɛsintin kerɛ mɔmɔ so fɛɛ gɛnɔɔbono i kaaborɛ mɔ. Fɛ' nyingi yɛɛ fɛye kee fɛ bo owura ɔko Wurubuaarɛ dɔ.

Gika Laalaalogɛ

2Fɛ' kpɛ keda gɛdalaa dɔ ken-ken de fɛye-ansi a' dɛ. Fɛ kya dalaa gɛnen mɔ, fɛ' kyu afaala sa Wurubuaarɛ. 3Fɛ' dalaa kolɛ Wurubuaarɛ sa aye abono a kya tɔgɛ mɔ-agyɛbi mɔ kee yɛɛ o' bugi ɔkpa sa aye de a' nyɛ lɛɛ Kirisito ilaa boduduusɛ mɔ tɔgɛ. Kirisito ilaa idɛ ne n' kya tɔgɛ ne mɛ keda me tii de obu faa. 4Fɛ' dalaa yɛɛ Wurubuaarɛ ɔ' sa me ɔkpa de n' taalɛ tɔgɛ Kirisito ilaa gɛnɔɔbono ɔkara i kaaborɛ n' tɔgɛ de i' loo asa aso dɔ mɔ.

5Fɛye‑rɛ asa abono mɛŋ bo aye Yesu asonbo mɔ dɔ mɔ fɛ tɛ dabɔlɛ mɔ, fɛ' kerɛ dɔɔdan de fɛ' kyu ɔkpa kamaasɛ ɔbono fɛ laa nyɛ mɔ kyu kpaa mɔmɔ de mɛ' bii Wurubuaarɛ. 6Owi kamaasɛ dɔ mɔ fɛ' yɛgɛ fɛye-gɛtɔngɛ gɛ' gyi ginsi gɛnɔɔbono i laa nyɛ kpaa Wurubuaarɛ gɛsun. Ɔko gi taasɛ fɛye ilaa iko mɔ, de fɛ' bii lɛɛ gɛnɔ kanpɛ.

Afaala Tiikarasɛ

7Nɛ keda Tikakusɛ sun fɛye asɛ. Ɔ loo mɔ, ɔ laa tɔgɛ me-ilaa sa fɛye. Ɔ gyɛ aye-nanbo laarɛsɛ ɔbono aye‑rɛ mɔ a kya son Wura Yesu dabɔlɛ. Gɛnɔɔbono ɔ kya wɔra gɛsun mɔ, a kya ka gyan mɔ so. 8Ilaa ibono so nɛ keda mɔ n kya sun fɛye asɛ mɔ ne n gyɛ yɛɛ n kya laarɛ fɛ' nyɛ bii gɛnɔɔbono so a tɛ de gɛrɛ mɔ de i' nyɛ keda fɛye-nyoro. 9Mɔ‑rɛ Onɛsimosɛ, aye-nanbo laarɛsɛ ɔbono a kya ka gyan mɔ so mɔ ne n kya ba fɛye asɛ gɛnen. Onɛsimosɛ gyɛ daa fɛye-nten obi. Mɔmɔ asa anyɔ adɛ mɛ laa tɔgɛ ilaa kamaasɛ ibono i wɔra gɛrɛ mɔ pɛwu sa fɛye.

10Arisetaakusɛ ɔbono me‑rɛ mɔ a tii de obu mɔ kya faala fɛye. Maako, Banabasɛ mɔ-pikyii mɔ-bi mɔ kee kya faala fɛye. Fɛ ti wolaa nyɛ ɔkalan kyu lii Maako baarɛ so yɛɛ nengyene fɛɛ ɔ ba fɛye asɛ nno mɔ, fɛ' keda mɔ dandan. 11Gyiisasɛ ɔbono mɛ kya terɛ mɔ yɛɛ Gyusetusɛ mɔ kee kya faala fɛye. Me‑rɛ asa kpɛi-kpɛi a bo gɛrɛ a kya wɔra aye-gɛsun gɛdɛ de Wurubuaarɛ gɛwuragyi dɔ akyenabi mɔ a' nyɛ yɛlegɛ asa dɔ. Me‑rɛ gɛnen asa asa' adɛ wolɛ ne n gyɛ Gyuda awura abono a saarɛ mɔmɔ dɔ. Mɛ yɛgɛ me-gisen gi tɔrɔ me.

12Epafirasɛ ɔbono ɔ gyɛ fɛye-ɔsowolɛ so isa ne ɔ kya son Kirisito Yesu mɔ kee kya faala fɛye. Owi kamaasɛ dɔ mɔ Epafirasɛ baarɛ tansi ɔ kya dalaa lii mɔ-gisen dɔ sa fɛye yɛɛ fɛ' kpɛ keda gɛnen de fɛ' wɔra asa abono mɛ ten ansi Wurubuaarɛ ilaa dɔ. Ɔ kya dalaa yɛɛ fɛ' wɔra asa abono mɛ laa bii Wurubuaarɛ gɛlaarɛ pɛwu mɔ. 13Gɛnɔɔbono ɔ kya gyi gɛsun sa fɛye‑rɛ Lawodisiya de Harapolisɛ awura mɔ, nɛ wu imɔ de me-ansi pɛi ne n' kya tɔgɛ fɛye faa. 14Aye-kyɛmenɛ dɛnsɛ, Luka ɔbono ɔ gyɛ alɔbo ɔkyɛbo mɔ, de Deemasɛ mɛ kya faala fɛye. 15Fɛ' faala aye-nanboana abono mɛ kya son Yesu Lawodisiya ɔsowolɛ mɔ so mɔ de fɛ' faala Nenfa mɔ‑rɛ Yesu asonbo abono mɛ kya kyena gyan mɔ-gɛten dɔ mɔ kee sa aye.

16Nengyene fɛ kalɛ ɔwolɛ baarɛ mɔ, fɛ' yɛgɛ Yesu asonbo gikpen gibono gi bo Lawodisiya mɔ kee mɛ' kalɛ mɔ, de fɛye kee fɛ' kalɛ mɔmɔ-lɛɛ ɔbono mɛ nyɛ mɔ. 17Fɛ' buu sa Akipusɛ yɛɛ ɔ' kerɛ de ɔ' wɔra gɛsun gɛbono Wura Yesu gi kyu wɔra mɔ-abaa dɔ mɔ kpaa logɛ.

18Nɛ sin gɛrɛ. Me, Pɔɔlo gbaa-gbaa ne n dɛ me-gibaa n kya ŋmarasɛ afaala tiikarasɛ adɛ n kya sa fɛye faa. Fɛŋ sa fɛ' tan me so yɛɛ nɛ tɔgɛ Wurubuaarɛ agyɛbi ne mɛ keda me tii de obu. Wurubuaarɛ ɔ' sa fɛye so gɛwɔnsa dɛnsɛ.

Ndamu Ɣɛtɛ Siwu

© Wycliffe Bible Translators 2008

More Info | Version Index