Search form

Efiso 6

Nbii De Mɔmɔ-Sɛana

1Fɛye nbii mɔ mɔ, Wura Yesu so mɔ, fɛ' nu fɛye-sɛana de fɛye-nyiana asɛ. Imɔ ne n boran sa Wura Yesu. 2Wurubuaarɛ gi wolaa yela nbara mɔ-agyɛbi mɔ dɔ yɛɛ, “Buu fo-sɛ de fo-nyi.” Nbara ndɛ ne n gyɛ ngyangbarasɛ nbono Wurubuaarɛ gi yela, ne ɔ ka ilaa yela bɔla de nmɔ. 3Ɔ ka yela yɛɛ fo ɔbono fo gyi nmɔ so mɔ, fo-ilaa i laa wɔra ɔdan sa fo, ne fo laa kɛɛla gɛsinkpan so. 4Fɛye akorogɛbo mɔ mɔ, fɛŋ sa fɛ' ŋmanyan fɛye-biana. Fɛ' bela mɔmɔ de fɛ' nyiile mɔmɔ ilaa gɛnɔɔbono Wura Yesu kya laarɛ mɔ.

Abono Mɛ Kya Son Awura Mɔmɔ‑rɛ Mɔmɔ-Wuraana

5Fɛye abono fɛ tɛ awura asɛ mɔ, fɛ' selɛ ɔmɔ de fɛ' nu mɔmɔ-gɛdɛ. Fɛ' kyu gɛsintin wɔra mɔmɔ-ilaa sa ɔmɔ lii fɛye-asen dɔ fitɔfɛɛ Kirisito ne fɛ kya wɔra fɛ kya sa. 6Fɛŋ sa fɛ' wɔra asa abono mɛ kya laarɛ ayenbi lii asa asɛ mɔ. Fɛye-wuraana mɔ mɛ yelɛ mɛ kerɛ fɛye‑o, mɛ mɛŋ yelɛ mɛ kerɛ fɛye‑o, fɛ' wɔra mɔmɔ-gɛlaarɛ sa ɔmɔ kanpɛ. Gɛnen ne Kirisito asonbo mɛ kya wɔra Wurubuaarɛ gɛlaarɛ lii mɔmɔ-asen dɔ kee ne. 7Fɛ' son fɛye-awuraana mɔ de ɔkon fɛɛ Wura Yesu ne fɛ kya son, i mɛŋ gyɛ nyamesɛ. 8Fɛ' bii yɛɛ fo nyamesɛ fo tɛ owura asɛ daa‑o, fo tɛ fo-gibaa so daa‑o, ilaa dɛnsɛ kamaasɛ ibono fo wɔra mɔ, Wura Yesu laa sa fo imɔ so ntɛɛla.

9Fɛye abono mɔ, asa mɛ tɛ fɛye asɛ mɛ kya son fɛye mɔ, fɛye kee fɛ' nyingi yɛɛ Wura Yesu ne fɛ kya son. Fɛ' taa mɔmɔ gikiidɛ yɛgɛ. Fɛ' bii yɛɛ ɔbono ɔ gyɛ fɛye‑rɛ ɔmɔ pɛwu wura mɔ bo Wurubuaarɛ dɔ, ne mɔ berɛ, ɔ mɛŋ bo gɛligi.

Kyu Wurubuaarɛ Adontɔ Kɔ De Ɔbonsan

10Me-nanboana Yesu asonbo, pɛi de me-gɛnɔ gɛ' yii mɔ, n kya tɔgɛ fɛye yɛɛ fɛ' yelɛ fɛye-ayaa so fɛye-gisɔɔgyi dɔ. Fɛ' yɛgɛ Wura Yesu o' kyu mɔ-ɔlon belɛ mɔ kpaa fɛye kyu naa de fɛye‑rɛ mɔ ginyamesɛ kolon mɔ so. 11Fɛ' kyu Wurubuaarɛ adontɔ de mɔ-ilaa kunsɛ mɔ pɛwu kyu baala fɛye-nyoro yela de fɛ' nyɛ yelɛ fɛye-ayaa so owi ɔbono ilaa nyɛnyɛn pɛwu gɛmu mɔ laa kɔ de fɛye mɔ. Fɛ' baala yela gɛnen de ɔŋ sa ɔ' nyɛ kyu mɔ golon-golon nwɔnsa kyu gyi fɛye so. 12Gɛnen Wurubuaarɛ adontɔ abono a tiri fɛye. I kya nyiile yɛɛ ikɔ ibono aye Yesu asonbo mɔ a kya kɔ mɔ, i mɛŋ gyɛ anyamesɛ ne a kya kɔ de. A kya kɔ daa de ilaa nyɛnyɛn oduduu ibono i kya nyɛ ɔlon anyamesɛ so mɔ, imɔ‑rɛ imɔ-abelɛnsɛ de imɔ-nbii. A kya kɔ de ilaa ibono i kya nyɛ ɔlon gɛsinkpan so ne i kya bara ilaa nyɛnyɛn mɔ. A kya kɔ de akyobo akpen abono a bo afuu so mɔ. 13Imɔso fɛ' kyu Wurubuaarɛ adontɔ de mɔ-ilaa kunsɛ mɔ pɛwu kyu baala fɛye-nyoro yela de gɛkaabono gɛkɛ nyɛnyɛn mɔ gɛ laa ba mɔ, fɛ' taalɛ yelɛ fɛye-ayaa so de fɛ' wɔra ilaa kamaasɛ ibono i tiri mɔ, de fɛ' kɔ lii.

14Imɔso fɛ' yelɛ fɛye-ayaa so girin. Fɛ' kyu gɛsintin wɔra fɛɛ fɛye-igbagya, de fɛ' kyu gisen dɛnsɛ fɛ kya gyi gɛsintin fa‑a sa Wurubuaarɛ de i' wɔra fɛɛ fɛye-nben kuntɔ. 15Fɛɛ gɛnɔɔbono sogya kya wɔra ikɔ ayaawolɛ mɔ, fɛye kee fɛ' wolaa baala fɛye-nyoro de fɛ' nyɛ lɛɛ Yesu gisen yuuli ɔkalan konkonsɛ mɔ tɔgɛ sa asa gɛten kamaasɛ. 16Imɔ idɛ pɛwu gɛmara mɔ, fɛ' keda fɛye-gikagyan gibono fɛ kya ka gyan Yesu so mɔ dɔ. Fɛye-gikagyan gidɛ gi laa taalɛ duule Ɔbonsan, nyamesɛ nyɛnyɛn mɔ akpɛ kamaasɛ abono ɔ kya too fɛye ne a kya dɛɛ fɛɛ ɔgya mɔ. Yesu so gikagyan mɔ gi dɛ fɛɛ ilaa kunsɛ ibono sogya dɛ de gibaa ne ɔ kya kyu kun mɔ-nyoro gɛten kamaasɛ mɔ. 17Fɛ' nyingi gɛnɔɔbono Wurubuaarɛ gi mɔlɛgɛ fɛye lii fɛye-ilaa nyɛnyɛn giwɔra dɔ mɔ. Gɛnen amɔlɛgɛ mɔ a dɛ fɛɛ abeletɔ gɛpɛ gɛbono sogyaana mɛ kya kyu kun mɔmɔ-amu mɔ. Fɛ' puru Wurubuaarɛ Oduduu gɛki mɔ keda. Gɛnen gɛki mɔ ne n gyɛ Wurubuaarɛ agyɛbi mɔ fɛ laa kyu kɔ ikɔ mɔ.

18Owi kamaasɛ dɔ mɔ, fɛ' yɛgɛ Wurubuaarɛ Oduduu mɔ ne ɔ' kpaa fɛye de fɛ' nyɛ dalaa de fɛ' kolɛ Wurubuaarɛ ilaa kamaasɛ. Fɛ kya laarɛ fɛ' wɔra gɛnen mɔ, fɛ' yɛgɛ fɛye-nwɔnsa gi' gyan Wurubuaarɛ ndalaa so daa so‑o. Fɛ' kpɛ keda ndalaa dɔ fɛ kya kolɛ Wurubuaarɛ fɛ kya sa fɛye-nanboana abono Wurubuaarɛ gi lɔrɔ yela sa mɔ-nyoro mɔ pɛwu.

19Fɛ' dalaa sa me, Pɔɔlo, kee yɛɛ owi kamaasɛ ɔbono nan bugi me-gɛnɔ tɔgɛ Wurubuaarɛ agyɛbi mɔ sa asa mɔ, Wurubuaarɛ ne ɔ' sa me mɔ gbaa-gbaa agyɛbi mɔ. Yesu ɔkalan konkonsɛ mɔ gyɛ ilaa boduduusɛ. Wurubuaarɛ ɔ' kpaa me de n' taalɛ da otu lɛɛ mɔ gɛsɛ sa asa. 20Wurubuaarɛ gi lɛɛ me sun de n' tɔgɛ Yesu ɔkalan konkonsɛ baarɛ sa asa. Imɔ ne n yɛgɛ Yesu akyobo mɛ keda me tii de obu faa. Imɔso fɛ' dalaa kolɛ Wurubuaarɛ sa me yɛɛ n' taalɛ da otu tɔgɛ Wurubuaarɛ agyɛbi fɛɛ gɛnɔɔbono i kaaborɛ n' tɔgɛ mɔ. Meŋ sa n' selɛ sɛi.

Agyɛbi Laalaalogɛ

21Nɛ keda aye-nanbo laarɛsɛ, Tikakusɛ sun fɛye asɛ. Gɛnɔɔbono ɔ kya wɔra Wura Yesu gɛsun mɔ mɔ, n kya ka gyan mɔ so. N kya laarɛ fɛ' nu me so de fɛ' bii gɛnɔɔbono so n dɛ n tɛ de mɔ. Imɔso Tikakusɛ laa tɔgɛ me-ilaa pɛwu sa fɛye. 22Gɛnen so ne nɛ sun mɔ faa. I lii fɛɛ fɛ nu me‑rɛ me-nanboana so mɔ, i laa keda fɛye-nyoro.

23Aye-sɛ Wurubuaarɛ de Wura Yesu Kirisito mɛ' sa asa abono mɛ kya son Yesu mɔ gisen yuuli, gɛlaarɛ', dabɔlɛ de gikagyan gibono mɛ laa ka gyan Wurubuaarɛ so mɔ. 24Asa abono mɛ kya laarɛ aye-Wura Yesu Kirisito ilaa ne mɛ maŋ taa gɛnɔɔbono mɛ kya laarɛ mɔ ilaa yɛgɛ gɛkaako mɔ, Wurubuaarɛ ɔ' sa mɔmɔ pɛwu so gɛwɔnsa dɛnsɛ.

Ndamu Ɣɛtɛ Siwu

© Wycliffe Bible Translators 2008

More Info | Version Index