Search form

MA GALATIASE 1

1Ɔko gɔgbe ɔbɔrɛ i mme Paulo gɔ nɖe katɔ̃mesɛdze kɔrɛ. Iiɖe ɔturi awune loɖi me, fiɛ iiɖe ɔturi iso iki fiɛ lokpese katɔ̃mesɛdze, ɣɛɛ Yesu Kristo gu bo Ɔse Ɣaa gɔ lotara Yesu ɔbɔrɛgu i makpise ame lokpere me. 2Bo gu manyii ma ɔɖuɖu mpia i ngbe to boya mi Ɣaa mafɔɖedze akuri wa ɔɖuɖu mpia i Galatia abuiti ame.

3Bo Ɔse Ɣaa gu Bosate Yesu Kristo abualɛra gu isobuɛ si iwegu mi.

4Iki i Ɣaa gɔ nɖe bo Ɔse kuɖɔɛ ame ne, Yesu Kristo ɔsu so ɔtã i bo akpi iti sɔ si ɔɖi bo ɔbɔrɛgu i nɔme kayi nyanyarĩa gagbe ame. 5Boale Ɣaa ita i nɔme ka ikpa! Si iba ngbɔ.

Itɔ̃me Bielea Iwɛ̃ Saã Mpia.

6Ito ibara me ɣii sɔ iifɔ ɔwi ɖuɖuuɖu ne, ka mifiniki i Ɣaa gɔ lokpere mi ala ɔ̃ abualɛra ɔso i kama mifɔ itɔ̃me bielea mama miɖe. 7Gbaã ne, itɔ̃me bielea mama kuiwɛ̃ siina, ɣɛɛ mawɛ̃ to mabie sɔ makpɔkpɔtɔra mi si mafinikira Kristo Itɔ̃me Bielea. 8Ɣɛɛ si bo, ɣee kpabo gɔ lobɔrɛ i kato ɔɣere mi Itɔ̃me Bielea mama nɛ loikotegu nnɛ boɣere mi ne, Ɣaa si ɔwɔra wũ pelepele. 9Lɛ kumɛgɔ boɔɣɛ bofe ne, loto loledza iɣɛ sɔ, si ɔrere ɔba ɔ̃aɣere mi itɔ̃me mama nɛ loiɖe Itɔ̃me Bielea nɛ mifɔ ne, Ɣaa si ɔwɔra ɔnyiiɔ.

10Itɔ̃me nɛ loto loɣɛ ne, ɔɣɛ loto sɔ si loabo maturi anɔ ɛɛbɛrɛ Ɣaa? Maturi loto lobie sɔ loabo anɔ? Si maturi loto lobie sɔ loabo anɔ ne, iyɔ loiɖe Kristo ɔɖabo.

Kumɛgɔ I Paulo Ɔkpese Katɔ̃mesɛdze.

11Manyii, loto lobie sɔ mitsue kukaakɔ sɔ Itɔ̃me Bielea nɛ loto loɣɛ ne, iiɖe ɔturi awune kɔrɛ ibɔrɛ. 12Iiɖe ɔturi awune kɔrɛ lofɔ lobɔrɛgu, fiɛ iiɖe kuwɛ̃ ɔɖe lote me, ɣɛɛ Yesu Kristo mɔmɔ loɖi ɔte me.

13Miɣe kumɛgɔ losɛ ngbã lɛ ɔ Yudase gɔdɛĩ. Minɔ kumɛgɔ loti Ɣaa mafɔɖedze ikuri kama ku anɔmi rɛtɛa fiɛ lokpɛ̃ sɔ si lowɔra ne. 14Wũ anɔ ɔrɛtɛ i ɔwa mɛrɛ̃ kubarara iso kukaakɔ sɔ losɛ katɔ̃ loɖo wũ isɛlaa gbodzoo i kubarara itsue ame. 15Ɣɛɛ ne, Ɣaa ɔɔɖi me ɔsɛ ta wũ ɔnyi kayiri ame fiɛ ɔɖe me bualɛ ɔkpere me. 16Ɔbara me kayiribielea ɔɖi ɔ̃ Ɔbi ɔte me sɔ si lopɛ ɔ̃ Itɔ̃me Bielea imomo i mma loiɖe ma Yudase ndɛ̃. Gɔ ɔkpere me ne, loikarɛ kuwɛ̃ sɔ ɔte me nnɛ loabara. 17Fiɛ loikɛlɛ Yerusalem sɔ loanya mma loɔɖe me katɔ̃ lɛ katɔ̃memasɛdze awe, ɣɛɛ lokɛlɛ Arabia ɔluwɛ̃ fiɛ ne kama ne, lokpese loba loafe Damasko.

18Akɔ atɛ kama fiɛ losɛ Yerusalem sɔ loanya Petro, fiɛ ka lowegu wũ ayi aweo-aru. 19Ɣɛɛ loinya katɔ̃mesɛdze kuwɛ̃ iɖo Yakobo gɔ nɖe Bosate ɔnyiibi.

20Ɣaa ɣe sɔ nnɛ loto lotsɛrɛ losese mi ngbe ne, gbaã iɖe ne iiɖe sila siɖe.

21Ne kama ne, losɛ Siria gu Kilikia abuiti ame. 22Ɔwi gɔmɔ ame ne, Kristo mafɔɖedze ma mpia i Yudea iinya me manya. 23Ɔnɔ kere maɔnɔ i maturi kanya sɔ, “Ngɔ lola ɔ̃ɔti bo kama ku ɔwiɔ ne, ka ɔɣɛ kafɔkaɖe itɔ̃me nɛ ame sɔ bodaaɣɛ!” 24Ne ɔso male Ɣaa ala wũ ɔso.

Ndamu Ɣɛtɛ Siwu

© Wycliffe Bible Translators 2008

More Info | Version Index