Search form

Hiiburu 2

A Lɛɛ Ansi Yɛgɛ Wurubuaarɛ Amɔlɛgɛ Mɔ, A Maŋ Lii Mɔ-Gisobiidɛ Dɔ

1Ilaa idɛ pɛwu so mɔ, i kaaborɛ a' kyu aniya de a' yɛgɛ ilaa ibono a nu lii Wurubuaarɛ mɔ-bi mɔ asɛ mɔ i' loo aye-aso dɔ don Wurubuaarɛ dɔ isɔɔ-lɛɛ mɔ a nu mɔ. A nu Wurubuaarɛ mɔ-bi mɔ asɛ mɔ, i maŋ nyɛ kyɛɛgɛ aye-nwɔnsa lii mɔ-ɔkalan mɔ so. 2Wurubuaarɛ dɔ isɔɔ mɔ mɛ nyɛ kyu Wurubuaarɛ ɔkalan kyu sa aye-naanaana adedaabo mɔ mɔ, i mɛŋ sa de mɛ' lɛɛ ansi yɛgɛ gɛnen ɔkalan mɔ. Ɔbono ɔ wɔra gisomaanu ne ɔ mɛŋ wɔra ɔkalan mɔ ilaa wɔrasɛ mɔ kya nyɛ imɔ so gisobiidɛ gibono gi kaaborɛ mɔ mɔ. 3Ne aye abono mɔ a nyɛ Wurubuaarɛ mɔ-bi mɔ ɔkalan kyu lii mɔ-amɔlɛgɛ mɔ so faa mɔ de‑e? Nengyene a lɛɛ ansi yɛgɛ gɛnen amɔlɛgɛ belɛ abono mɔ, aye ne nan lii Wurubuaarɛ gisobiidɛ mɔ dɔ? Wurubuaarɛ mɔ-bi, aye-Wura mɔ, ne n daa gitɔgɛ gɛnen amɔlɛgɛ adɛ so ilaa. Ne asa abono mɛ nu imɔ de mɔmɔ-aso mɔ mɛ buu gɛnen amɔlɛgɛ ɔkalan baarɛ ilaa sa aye imɔ-ɔkpa so de a' nyɛ bii yɛɛ i gyɛ gɛsintin. 4Wurubuaarɛ kee gi nyise imɔ so gibaa. I kya nyiile yɛɛ ɔ yɛgɛ asa abono mɛ sɔɔ gyi mɔ mɛ wɔra ilaa ibono i lɛɛ mɔ-bi mɔ ɔlon mɔ gɛwi nyiile. Imɔ ne n gyɛ yɛɛ mɛ wɔra ilaa gbaa'gbaa de amunale ilaa de ilaa kpɛi-kpɛi ibono nkana nyamesɛ maŋ taalɛ wɔra mɔ-gibaa so mɔ. O kii yɛgɛ mɔ-Oduduu mɔ gi kyu nsun kpɛi-kpɛi sa mɔmɔ gɛnɔɔbono mɔ Wurubuaarɛ kya laarɛ mɔ.

Yesu Gi Bingiri Nyamesɛ Fɛɛ Aye

5Fɛɛ gɛnɔɔbono a tɔgɛ kyon mɔ, Wurubuaarɛ mɔ-bi mɔ gi don Wurubuaarɛ dɔ isɔɔ mɔ. I kya nyiile yɛɛ Wurubuaarɛ mɛŋ lɛɛ mɔ Wurubuaarɛ dɔ isɔɔ mɔ yɛɛ mɛ' kerɛ gɛkyena pobɔrɔ gɛbono a tɔgɛ gɛmɔ ilaa faa so. 6Wurubuaarɛ agyɛbi dɔ i wolaa lɛɛ nyiile aye gɛnen. I bo nno yɛɛ,

“Wurubuaarɛ, nyamesɛ gyɛ menɛ sa fo ne fo kya kerɛ mɔ so gɛnen?

7Fo yɛgɛ Wurubuaarɛ dɔ isɔɔ mɛ kpɛ don mɔ daa ŋmaraa pii faa.

Fo yuule mɔ kyu nyisigyi de buubuu kyu sa mɔ,

ne fo yɛgɛ ilaa kamaasɛ i' bara imɔ-nyoro gɛsɛ sa mɔ.”

8Wurubuaarɛ yɛɛ ilaa kamaasɛ i' bara imɔ-nyoro gɛsɛ sa nyamesɛ. Gɛnen so mɔ, sɛi maŋ baa san ibono Wurubuaarɛ mɛŋ tɔgɛ yɛɛ i' bara imɔ-nyoro gɛsɛ sa mɔ. Gɛnɔɔbono i dɛ faa mɔ, iŋ gyɛ ilaa kamaasɛ ne n ti bara imɔ-nyoro gɛsɛ sa nyamesɛ. 9Yesu ilaa ne a kya wu yɛɛ i kyena de Wurubuaarɛ ilaa tɔgɛsɛ idɛ. I kya nyiile yɛɛ owi ɔko dɔ mɔ Wurubuaarɛ gi yɛgɛ mɔ-isɔɔ mɔ mɛ baa don mɔ-bi Yesu ŋmaraa. Wurubuaarɛ gi yɛgɛ mɔ-bi mɔ gi baa wu' awɔrɔfɔɔ lɛwu sa anyamesɛ. Imɔso Wurubuaarɛ gi yuule mɔ-bi mɔ, ne o kyu mɔ-nyisigyi de mɔ-buubuu kiiri sa mɔ. Wurubuaarɛ kya sa aye anyamesɛ so gɛwɔnsa dɛnsɛ. Imɔso ne ɔ yɛgɛ mɔ-bi mɔ gi wu' sa nyamesɛ kamaasɛ. 10Wurubuaarɛ so ne ilaa kamaasɛ i bo no faa, ne mɔ kee ne ilaa kamaasɛ i bo no sa. Ɔ kya laarɛ yɛɛ aye anyamesɛ sakyɔ a' wɔra mɔ-biana gɛsintin de a' nyɛ nyisigyi. Imɔso ɔ yɛgɛ Yesu gi gyangbara lɔrɔ ɔkpa sa aye de a' nyɛ mɔ-amɔlɛgɛ. Ɔ yɛgɛ Yesu gi wu awɔrɔfɔɔ de ɔ' nyɛ wɔra mɔ Wurubuaarɛ gisen dɔ ilaa idɛ kpaa logɛ. 11Aye abono Yesu kya lɔrɔ aye ɔ kya yela ɔ kya sa mɔ-sɛ mɔ, aye‑rɛ mɔ pɛwu a gyɛ daa ɔsɛ kolon. Imɔso ne Yesu kya terɛ aye gɛnen asa abono yɛɛ mɔ-tedɛana ne iŋ bo mɔ ipeeli mɔ. 12Yesu gi tɔgɛ yɛɛ,

“O, Wurubuaarɛ, nan tɔgɛ fo-ilaa sa me-tedɛana.

Nan lɛɛ fo-ginyen de n' bii ilon yen fo sansana.”

13O kii tɔgɛ yɛɛ,

“Nan ka gyan' Wurubuaarɛ so.”

Ne o kii tɔgɛ kee yɛɛ,

“Me‑rɛ nbii nbono Wurubuaarɛ gi sa me mɔ ne.”

14Ibono nbii mɔ mɛ gyɛ daa anyamesɛ so mɔ, mɔ Yesu kee gi baa bingiri nyamesɛ de mɔ‑rɛ mɔmɔ mɛ' wɔra oyuduu kolon. Ɔ baa bingiri nyamesɛ, ne o' wu' de ɔ' nyɛ mɔɔ ilaa nyɛnyɛn pɛwu gɛmu mɔ gibɔrɔ gibono ɔ bo ne ɔ kya yɛgɛ asa mɛ kya wu' mɔ. 15Imɔso abono pɛwu nkana mɛ selɛ lɛwu ne lɛwu nwɔnsa ne n gyi mɔmɔ-amu mɔmɔ-gɛkyena dɔ pɛwu mɔ, Yesu gi baa mɔlɛgɛ mɔmɔ lii gɛnen gifuu gibono dɔ. 16Ɔkamaasɛ nyi yɛɛ i mɛŋ gyɛ Wurubuaarɛ dɔ isɔɔ ne Yesu gi baa kpaa. Ɔ baa kpaa daa Aberaham anaanabi.

17Imɔso i tiri yɛɛ Yesu ɔ' baa bingiri fɛɛ mɔ-tedɛana oyuduu ɔkpa kamaasɛ so. Imɔ ne nan yɛgɛ ne ɔ laa nyɛ wɔra Wurubuaarɛ asunbi alɛɛbo gɛmu ɔbono ɔ bo gitolon de gɛsintin mɔ. Ɔ laa kpaarɛ asa ilaa nyɛnyɛn fuɛ de Wurubuaarɛ ɔ' nyɛ kyu kyɛɛ mɔmɔ. 18Ilaa nyɛnyɛn pɛwu gɛmu mɔ gi soo Yesu idoo, ne ɔ mɛŋ nyɛ mɔ. Yesu gi wu awɔrɔfɔɔ gɛnen idoo ibono dɔ so mɔ, o nyi gɛnɔɔbono i dɛ sa anyamesɛ. Imɔso ɔ bo ɔlon de ɔ' kpaa abono ilaa nyɛnyɛn pɛwu gɛmu mɔ kya soo mɔmɔ idoo mɔ kee de mɛŋ sa mɛ' tɔrɔ idoo mɔ dɔ.

Ndamu Ɣɛtɛ Siwu

© Wycliffe Bible Translators 2008

More Info | Version Index