Search form

Hiiburu 3

Yesu Nyisigyi Gi Don Mosisi-Lɛɛ

1Me-nanboana Yesu asonbo, Wurubuaarɛ gi lɔrɔ aye yela sa mɔ-nyoro. Ɔ tɔgɛ aye‑rɛ fɛye pɛwu yɛɛ a' kyu aye-nyoro sa mɔ de a' nyɛ kyena mɔ asɛ. Imɔso fɛ' kyu fɛye-nwɔnsa gyan' Yesu so. Mɔ ne Wurubuaarɛ gi sun anyamesɛ asɛ. Mɔ so ne a ka gyan ne a kya tɔgɛ yɛɛ ɔ gyɛ Wurubuaarɛ asunbi alɛɛbo gɛmu sa aye mɔ. 2A' kyu Yesu kɛserɛ de Mosisi de a' kerɛ. Yesu gi gyi gɛsintin sa Wurubuaarɛ ɔbono ɔ lɛɛ mɔ sun aye anyamesɛ asɛ mɔ. Mosisi kee gi gyi gɛsintin mɔ-gɛkyena dɔ ne ɔ kpaa Wurubuaarɛ adɛ. 3Buubuu ɔbono i kaaborɛ asa mɛ' kyu sa Yesu mɔ gi don Mosisi-lɛɛ mɔ gbaa bun. I dɛ daa fɛɛ gɛnɔɔbono nyamesɛ kya yii gɛten ne ɔ bo nyisigyi don abono mɛ tɛ mɔ-gɛten mɔ dɔ mɔ. 4Gɛten' kamaasɛ gɛ bo no mɔ, ɔko ne n yii gɛmɔ. Ilaa kamaasɛ ɔpɔrɔbo, mɔ, ne n gyɛ Wurubuaarɛ. 5Mosisi gi wɔra Wurubuaarɛ gɛsun ɔwɔrabo ne o kyu gɛsintin wɔra mɔ-gɛsun ne i kpaa Wurubuaarɛ adɛ pɛwu. Mosisi ilaa wɔrasɛ i wɔra sinkaala sa ilaa ibono Wurubuaarɛ laa baa lɛɛ nyiile gɛkaako Mosisi lɛwu gɛmara mɔ. 6Yesu Kirisito berɛ gyɛ daa Wurubuaarɛ mɔ-bi ne o kyu gɛsintin kyu kerɛ Wurubuaarɛ adɛ mɔ so fɛɛ gɛnɔɔbono obi kya kerɛ mɔ-sɛ gɛten so mɔ.

Ɔko Ɔŋ Sa Ɔ' Yɛgɛ Mɔ-Nwɔnsa Gi' Lii Wurubuaarɛ So

Gɛnɔɔbono a kya da otu kyu aye-ansi gyan' Yesu Kirisito so de ɔkon kyu i kya kpe faa mɔ, gɛnen gɛten' gɛbono Yesu kya kerɛ gɛmɔ so sa Wurubuaarɛ mɔ, aye ne n gyɛ gɛmɔ dɔ asa. 7Imɔso fɛ' nu ilaa ibono Wurubuaarɛ Oduduu mɔ gi tɔgɛ mɔ. Ɔ tɔgɛ yɛɛ,

“Ndɛ fɛ nu Wurubuaarɛ gigyɛbi' mɔ,

8fɛ mɛŋ sa fɛ' wɔra gisoɔlon fɛɛ fɛye-naanaana lɛɛ mɔ.

Aberɛ abono fɛye-naanaana mɛ bo gipen mɔ dɔ mɔ

aberɛ ako dɔ mɔ mɛ kerɛ me, Wurubuaarɛ, ansi dɔ

ne mɛ soo me idoo kerɛ.

9Nsi ikue-inyɔ pɛwu dɔ mɔ mɛ wu me-gɛsun belɛ

gɛbono nɛ wɔra sa mɔmɔ mɔ,

yɛgɛ mɛ kpɛ san mɛ kya kuu me-gɛnɔ.

10Gɛnen so mɔ, nɛ kyu ginyadon wɔra gɛnen gikpen gibono,

ne nɛ tɔgɛ kyu lii mɔmɔ so yɛɛ,

‘Owi kamaasɛ dɔ mɔ, asa adɛ mɛ kya kerɛ ansi

mɛ kya lɛɛ mɔmɔ-nwɔnsa ma‑a lii me so.

Mɛ kine, mɛ mɛŋ bii me-lɛɛ ikpa mɔ.’

11Nɛ kyu ginyadon de mɔmɔ, ne nɛ tɔgɛ nnɔ wɔra mɔmɔ yɛɛ

nkyoola nbono me yɛɛ nan kyu sa mɔmɔ mɔ

maŋ baa kyu sa mɔmɔ gɛkaako kpa‑a.”

12Imɔso, me-nanboana Yesu asonbo, fɛ' kerɛ fɛye-nyoro so dɔɔdan. Fɛye dɔ ɔko‑rɛ ɔko ɔ mɛŋ sa o' kyu nwɔnsa nyɛnyɛn abɛɛ akyɔɔlɛ nwɔnsa de i' ba yɛɛ mɔ-nwɔnsa gi lii Wurubuaarɛ so. Mɔ ne n gyɛ ɔbono ɔ bo no gɛkpaa-gɛkpaa mɔ. 13Gɛkɛ kamaasɛ mɔ, i kpɛ nyɛ wɔra yɛɛ gɛkɛ dee, fɛ' kpɛ fɛ kya ka abara owi ɔbono fɛ san fɛ kya nu Wurubuaarɛ agyɛbi mɔ de ilaa iko i mɛŋ sa i' nyɛ penɛ fɛye de fɛ' wɔra ansiɔlon de Wurubuaarɛ. 14Nengyene a taalɛ ka gyan Kirisito so kpaa lii fɛɛ gɛnɔɔbono a yii gɛsɛ faa mɔ, aye‑rɛ mɔ a laa kyena de mɔ-ilaa kamaasɛ ibono ɔ bo mɔ i' wɔra aye-lɛɛ kee. 15Gɛnen so ne i wolaa tɔgɛ Wurubuaarɛ agyɛbi mɔ dɔ yɛɛ,

“Ndɛ fɛ nu Wurubuaarɛ gigyɛbi' mɔ,

fɛ' mɛŋ sa fɛ' wɔra gisoɔlon

fɛɛ gɛnɔɔbono fɛye-nanaana mɛ wɔra gisomaanu sa Wurubuaarɛ mɔ.”

16Anɛana ne n nu Wurubuaarɛ agyɛbi mɔ ne mɛ wɔra gisomaanu de mɔ mɔ? I mɛŋ gyɛ mɔmɔ abono aye-naana Mosisi gi gyangbara sa ɔmɔ lii Igyipiti mɔ? 17Anɛana ne Wurubuaarɛ gi kyu ginyadon wɔra nsi ikue-inyɔ mɔ daa? I mɛŋ gyɛ asa abono mɛ wɔra ilaa nyɛnyɛn ne Wurubuaarɛ gi yɛgɛ mɛ wu' gipen mɔ dɔ mɔ? 18Wurubuaarɛ gi kyu ginyadon ne ɔ tɔgɛ nnɔ wɔra mɔmɔ yɛɛ,

“Nkyoola nbono me yɛɛ nan kyu sa mɔmɔ mɔ

maŋ baa kyu sa mɔmɔ gɛkaako kpa‑a.”

Mɔ, anɛana ne Wurubuaarɛ darɛ gɛnen? I gyɛ daa asa abono mɛ wɔra gisomaanu de Wurubuaarɛ mɔ ne ɔ darɛ. 19Imɔso a wu yɛɛ ibono gɛnen asa abono mɛ mɛŋ sɔɔ Wurubuaarɛ gyi mɔ so ne n yɛgɛ ne mɛ mɛŋ nyɛ kpe Wurubuaarɛ ɔkyoolaten mɔ.

Ndamu Ɣɛtɛ Siwu

© Wycliffe Bible Translators 2008

More Info | Version Index