Search form

Gyeemesi 4

Fɛ' Bara Fɛye-Nyoro Gɛsɛ Sa Wurubuaarɛ

1Menɛ ne n kya bara fɛye-nlɔgedɛ de nluu mɔ daa? Iŋ gyɛ fɛye-ɔbolɛ gɛlaarɛ ilaa ne n kpɛ i kya kɔ fɛye-nyoro gibi dɔ gɛnen faa? 2Fɛ kya laarɛ ilaa; fɛŋ kii fɛ kya nyɛ. Imɔso ne fɛ kya mɔɔ asa faa. Ɔko ilaa i kya wɔra fɛye onsipara, fɛŋ kii fɛ kya nyɛ imɔ. Gɛnen so ne fɛ kya laarɛ nlɔgedɛ de nluu mɔ. Fɛŋ kya kolɛ Wurubuaarɛ, imɔso ne fɛŋ kya nyɛ faa. 3Nengyene fɛ kya kolɛ mɔ ne fɛŋ kya nyɛ mɔ, i lii fɛɛ ilaa ibono so fɛ kya kolɛ mɔ mɔ iŋ kya kyena sa mɔ daa. Fɛ kya kolɛ mɔ ilaa daa de fɛ' kyu wɔra fɛye-ɔbolɛ gɛlaarɛ ilaa.

4Fɛ kya lii Wurubuaarɛ gɛmara. Fɛ' bii yɛɛ nyamesɛ gi kyu gɛsinkpan gɛdɛ so ilaa gɛkyɛmenɛ mɔ, Wurubuaarɛ ilaa berɛ, ɔ laa kyo imɔ. Imɔso fo ɔbono fo kya laarɛ fo' lɛɛ gɛsinkpan so ilaa gɛkyɛmenɛ mɔ, fo laa bingiri Wurubuaarɛ ɔkyobo. 5Iŋ gyɛ giyan so ne i bo Wurubuaarɛ agyɛbi dɔ yɛɛ,

“Oduduu ɔbono Wurubuaarɛ gi yɛgɛ ɔ bo aye anyamesɛ dɔ mɔ

kya pɛɛrɛ ginsi aye so yɛɛ a' kyu aye-gisen pɛwu sa Wurubuaarɛ.”

6Wurubuaarɛ berɛ kpɛ ɔ kya sa aye so gɛwɔnsa dɛnsɛ don gɛnɔɔbono i kaaborɛ aye mɔ. Imɔso ne Wurubuaarɛ agyɛbi dɔ i tɔgɛ yɛɛ,

“Wurubuaarɛ kya tii asa abono mɛ kya nyiile mɔmɔ-nyoro mɔ ɔkpa,

de mɛŋ sa mɛ' nyɛ mɔmɔ-gɛlaarɛ.

Asa abono mɛ kya bara mɔmɔ-nyoro gɛsɛ mɔ berɛ,

Wurubuaarɛ kya sa mɔmɔ so gɛwɔnsa dɛnsɛ.”

7Imɔso fɛ' bara fɛye-nyoro gɛsɛ sa Wurubuaarɛ. Fɛ' yelɛ kɔ de ilaa nyɛnyɛn pɛwu gɛmu mɔ. Fɛ wɔra gɛnen mɔ, ɔ laa selɛ taa fɛye yɛgɛ. 8Fɛ tu sindi Wurubuaarɛ mɔ, mɔ kee laa tu sindi fɛye. Fɛye ilaa nyɛnyɛn awɔrabo mɔ, fɛ' foro fɛye-abaa lii ilaa nyɛnyɛn giwɔra dɔ. Fɛye abono fɛ gyɛ nwɔnsa nnyɔ-nnyɔ awura mɔ, fɛ' lɔrɔ fɛye-asen dɔ de fɛ' yelɛ Wurubuaarɛ ilaa wolɛ so. 9Fɛ' bɔɔda fɛye-nyoro. Fɛ' su de fɛ' saawo. Fɛ' yɛgɛ fɛye-iŋmasɛ i' bingiri osulon de ɔkon ɔbono fɛ kya gyi mɔ fɛŋ' baa gyi mɔ de fɛ' nyanga. 10Fɛ' bara fɛye-nyoro gɛsɛ sa Wura Wurubuaarɛ, de mɔ, mɔ, ɔ' diirɛ fɛye.

11Me-nanboana Yesu asonbo, fɛŋ sa fɛ' tɔgɛ ilaa nyɛnyɛn kyu lii abara so. Nyamesɛ ɔbono ɔ kya tɔgɛ ilaa nyɛnyɛn kyu lii mɔ-nanbo so abɛɛ ɔ kya bun mɔ-nanbo gipuɛɛ mɔ, kaasɛ mɔ kya tɔgɛ ilaa nyɛnyɛn lii Wurubuaarɛ nbara mɔ so ne, abɛɛ ɔ kya bun Wurubuaarɛ nbara mɔ gipuɛɛ ne. Fo ɔbono fo kya bun Wurubuaarɛ nbara mɔ gipuɛɛ mɔ, foŋ baa fo kya gyi nmɔ so ne. Fo san fo kya kyu fo-nyoro yɛɛ fo bo ɔkpa de fo' kerɛ yɛɛ nbara ndɛ gi boran, abɛɛ ndɛ giŋ boran. 12Wurubuaarɛ mɔ-nkon ne n bo ɔkpa de ɔ' yela nbara sa anyamesɛ. Mɔ-nkon ne n bo ɔkpa de o' gyi asa nbɛlɛ bun gipuɛɛ. Mɔ ne nan taalɛ mɔlɛgɛ fo nyamesɛ de fo' nyɛ ɔkyenaten mɔ asɛ, ne mɔ kee ne nan taalɛ yɛgɛ fo-ɔkyenaten mɔ asɛ ɔ' lii fo-gibaa. Imɔso fo nyamesɛ fo ne n gyɛ anɛ de fo' bun fo-nanbo nyamesɛ gipuɛɛ?

Ɔkpa Kamaasɛ So Mɔ Fɛŋ Sa Fɛ' Nyiile Fɛye-Nyoro

13Idɛ kon fɛ' yela giso de fɛ' nu me asɛ. Fɛye ako fɛ ti taalɛ tɔgɛ yɛɛ, “Ndɛ abɛɛ ɔkɛ mɔ a laa kpe ɔsowolɛ baarɛ so. A kpe mɔ, a laa gyi gɛsi nno de a' wɔra gɛsun laarɛ aterenbi.” 14Fɛ kya tɔgɛ gɛnen faa mɔ, fɛ nyi ɔkɛ-lɛɛ? Nyamesɛ dɛ daa fɛɛ nbokyu. Nyɛnyɛngɛ mɔ, gi kya sɔrɔ gi yelɛ faa nyɔlen. Owi ɔ baa dii mɔ, gi ŋaa. 15Nkana i kaaborɛ fo' tɔgɛ daa yɛɛ, “Nengyene Wurubuaarɛ gi kyule mɔ, a laa kyena nkpa de a' wɔra idɛ abɛɛ imɔ idɛ.” 16Fɛ kya wɔra gɛnen mɔ, fɛ kya nyiile fɛye-nyoro ne fɛ kya gyiide. Gɛnen nyoro ginyiile gidɛ ɔnan pɛwu iŋ boran.

17Fɛ' bii yɛɛ nengyene fo nyamesɛ fo nyi ilaa ibono i kaaborɛ fo' wɔra, ne foŋ wɔra imɔ mɔ, i gyɛ ilaa nyɛnyɛn sa fo.

Ndamu Ɣɛtɛ Siwu

© Wycliffe Bible Translators 2008

More Info | Version Index