Search form

Matiyu 19

Yesu Gi Tɔgɛ Ɔkyii Gikine Ilaa

1Yesu gi tɔgɛ ilaa idɛ ta mɔ, ɔ lii Galeli nfono kyon kpe ɔbon Gyɔɔdan gibenbɛ giko so Gyudiya gɛsinkpan so. 2Sakpii belɛ gi buu mɔ. Mɛ loo nno mɔ, ɔ kyɛ kyɛ abono mɛ kya lɔ mɔ.

3Farasii gikpen dɔ awura ako mɛ ba mɔ asɛ de mɛ' baa soo mɔ idoo kerɛ. Gɛnen so mɔ mɛ taasɛ mɔ yɛɛ, “Imɔso aye-nbara gi kya nyiile yɛɛ nyamesɛ laa taalɛ yelɛ ilaa kamaasɛ ibono ɔ kya laarɛ mɔ so kine mɔ-ka?” 4Yesu gi lɛɛ gɛnɔ taasɛ ɔmɔ yɛɛ, “Fɛ mɛŋ ti kalɛ Wurubuaarɛ agyɛbi kyu lii imɔ so do‑o? Mɔ-agyɛbi mɔ a kya nyiile yɛɛ lii ko‑o gɛsɛ de gɛsɛ mɔ, Wurubuaarɛ gi lɛɛ ɔnyen oyuduu de ɔkyii oyuduu. 5Wurubuaarɛ gi tɔgɛ nfono yɛɛ,

‘Imɔ idɛ so mɔ,

ɔnyen laa taa mɔ-sɛ de mɔ-nyi yɛgɛ

de o' kyu mɔ-nyoro mada de mɔ-ka

de mɔmɔ asa anyɔ mɛ' bingiri nyamesɛ kolon.’

6Imɔso ɔnyen mɔ‑rɛ mɔ-ka mɛŋ baa mɛ gyɛ asa anyɔ, mɛ bingiri nyamesɛ kolon. Ibono Wurubuaarɛ ne n kyu mɔmɔ dabɔlɛ wɔra nyamesɛ kolon faa mɔ, ɔko ɔŋ sa ɔ' baragɛ mɔmɔ dɔ.”

7Farasii awura mɔ mɛ kii taasɛ Yesu yɛɛ, “Gɛnen berɛ mɔ, menɛ ne n wɔra so ne Mosisi gi yela nbara yɛɛ nengyene ɔnyen laa kine mɔ-ka mɔ, ɔ' sa mɔ gikine ɔwolɛ de ɔ' lɛɛ mɔ-ɔkpa mɔ daa?” 8Yesu gi lɛɛ gɛnɔ sa ɔmɔ yɛɛ, “Fɛye-aso dɔ i kɔrɔ ifuu so daa ne Mosisi gi sa fɛye ɔkpa de fɛ' kine fɛye-kaana gɛnen. Nkana lii gɛsɛ de gɛsɛ mɔ, i mɛŋ dɛ gɛnen. 9N' buu sa fɛye yɛɛ nengyene i mɛŋ gyɛ yɛɛ fo-ka gi lii fo-gɛmara so ne fo kine mɔ kpaa kyu ɔkyii pobɔrɔ mɔ, fo tɔrɔ Wurubuaarɛ gɛlaarɛ adenabi nbara. Ɔ kya kyu imɔ yɛɛ ɔko mɔ-ka ne fo laarɛ gɛnen.”

10Yesu gi tɔgɛ gɛnen mɔ, mɔ-akasɛbo mɔ mɛ tɔgɛ sa mɔ yɛɛ, “Nengyene fafaanan ne gɛdena ilaa i dɛ berɛ mɔ, nyamesɛ maŋ tɛsɛ dena mɔ, nkana i boran.” 11Yesu gi lɛɛ gɛnɔ sa mɔmɔ yɛɛ, “Gimaadena mɔ iŋ gyɛ nyamesɛ kamaasɛ ne nan taalɛ kyena, gɛnen mɔ, abono Wurubuaarɛ gi kyu sa mɔmɔ mɔ wolɛ. 12I kya nyiile yɛɛ i bo ilaa kpɛi-kpɛi ibono so anyen ako mɛŋ kya dena mɔ. Ako berɛ, i korogɛ ɔmɔ de gɛnen daa. Ako mɔ, mɔ, mɔmɔ-nanboana anyamesɛ ne n kya keda mɔmɔ lɛɛ awɔrɛbi. Ako, mɔ, mɛŋ kya dena mɔ, mɛ kya laarɛ mɛ' nyɛ nyoro kpaa asa de mɛ' nyɛ Wurubuaarɛ gɛwuragyi dɔ akyenabi mɔ. Ɔbono ɔ laa taalɛ wɔra gɛnen mɔ, ɔ' wɔra.”

Yesu Gi Sɔɔ Nbii Buru-buru Abaa Anyɔ

13Owi ɔko dɔ mɔ, asa ako mɛ dɛ nbii ma‑a bara Yesu yɛɛ o' kyu mɔ-abaa gyan' mɔmɔ so de ɔ' dalaa sa mɔmɔ. Mɔ-akasɛbo mɔ, mɔ, mɛ kya gya mɔmɔ yɛɛ mɛ' kiiri nbii mɔ. 14Yesu gi wu gɛnen mɔ, ɔ tɔgɛ sa mɔ-akasɛbo mɔ yɛɛ, “Fɛ' yɛgɛ nbii mɔ mɛ' ba me asɛ; fɛŋ' baa tii mɔmɔ-ɔkpa. Abono mɛ dɛ fɛɛ gɛnen nbii ndɛana ɔnan mɔ ne nan nyɛ Wurubuaarɛ gɛwuragyi dɔ akyenabi mɔ.” 15Ne o kyu mɔ-abaa gyan' nbii mɔ so, ne ɔ naa lii nno kyon.

Anɛ Ne Nan Nyɛ Ɔkyenaten Wurubuaarɛ Gɛwuragyi Dɔ?

16Owi ɔko dɔ mɔ, ɔnyen ɔko gi ba Yesu asɛ baa taasɛ mɔ yɛɛ, “Ɔbelɛnsɛ, menɛ ilaa dɛnsɛ ne nan wɔra de n' nyɛ Wurubuaarɛ asɛ gɛkyena gɛkpaa?” 17Yesu gi kisee taasɛ mɔ yɛɛ, “Fo kya taasɛ me kyu lii ilaa dɛnsɛ so faa mɔ, fo mɛŋ nyi yɛɛ Wurubuaarɛ wolɛ ne n gyɛ nyamesɛ dɛnsɛ? Nengyene fo kya laarɛ fo' nyɛ ɔkyenaten Wurubuaarɛ asɛ mɔ, gyi mɔ-nbara mɔ so.” 18Ne ɔnyen mɔ gi taasɛ Yesu yɛɛ, “Nbara nmɔ?” Yesu gi lɛɛ gɛnɔ yɛɛ, “Gɛŋ sa fo' mɔɔ isa, gɛŋ' lii fo-ka abɛɛ fo-kuli gɛmara, gɛŋ' yuuri, gɛŋ' ten ɔko gɛnɔ nbɛlɛ dɔ. 19Buu fo-sɛ de fo-nyi de fo' laarɛ fo-nanbo fɛɛ fo-nyoro.”

20Ɔnyen mɔ gi lɛɛ gɛnɔ sa Yesu yɛɛ, “N ti n kya gyi gɛnen nbara ndɛ pɛwu so. Menɛ ne n kii san me?” 21Yesu gi tɔgɛ sa mɔ yɛɛ, “Nengyene fo kya laarɛ fo ta gudu berɛ mɔ, naa kpaa fɛ fo-ilaa ibono fo bo mɔ pɛwu de fo' kyu aterenbi mɔ kyu yɛ sa ayenbo. Fo wɔra gɛnen mɔ, fo laa nyɛ ntɛɛla Wurubuaarɛ dɔ, de fo' san naa baa buu me wɔra me-ɔkasɛbo.” 22Ɔnyen mɔ gi nu gɛnen mɔ, mɔ-gisen dɔ i nyida mɔ, ne ɔ naa kyon. I kya nyiile yɛɛ ɔ tansi ɔ bo atɔ gikyɔ. Ɔ kerɛ mɔ, ɔ maŋ taalɛ wɔra gɛnen.

23Nfono mɔ Yesu gi tɔgɛ sa mɔ-akasɛbo mɔ yɛɛ, “N' tɔgɛ fɛye gɛsintin yɛɛ i tansi i bo lon sa aterenbi awura de mɛ' nyɛ ɔkyenaten Wurubuaarɛ gɛwuragyi dɔ. 24N' kii tɔgɛ sa fɛye yɛɛ pɛi de aterenbi wura ɔ' nyɛ ɔkyenaten Wurubuaarɛ gɛwuragyi dɔ mɔ, i laa wɔra ɔlon sa mɔ don gɛnɔɔbono gɛkpatitii gɛ laa loo ɔbaatɔ ɔbɔ dɔ lii mɔ.” 25Yesu akasɛbo mɔ mɛ nu imɔ idɛ mɔ, i tansi dɛ ɔmɔ-gɛnɔ, ne mɛ san taasɛ yɛɛ, “Gɛnen berɛ mɔ, anɛ kaasɛ ne nan nyɛ Wurubuaarɛ asɛ gɛkyena ne?” 26Yesu gi kerɛ mɔmɔ faa yiridididi ne ɔ lɛɛ gɛnɔ yɛɛ, “Imɔ idɛ i don nyamesɛ giwɔra; Wurubuaarɛ berɛ, sɛi mɛŋ fo mɔ-giwɔra.”

27Nfono mɔ Piita gi taasɛ mɔ yɛɛ, “Aye, mɔ, ibono a taa gɛsinkpan so ilaa kamaasɛ yɛgɛ ne a naa a buu fo faa mɔ, nnɛ ne?” 28Yesu gi tɔgɛ sa mɔ-akasɛbo mɔ yɛɛ, “Gɛsintin ne n' kya tɔgɛ mi‑i sa fɛye faa, gɛkaako mɔ, Wurubuaarɛ laa lɛɛ gɛkyena pobɔrɔ. Gɛnen aberɛ abono mɔ, me, anyamesɛ pɛwu mɔmɔ-daa mɔ, nan kyena me-nyisigyi gɛgyapaa so n kya gyi gɛwura. Fɛye abono, mɔ, fɛ gyɛ me-akasɛbo gudu anyɔ mɔ kee fɛ laa kyena ngyapaa so fɛ kya gyi gɛwura Isirale nten gudu nnyɔ mɔ so fɛ kya gyi mɔmɔ-nbɛlɛ fa‑a sa mɔmɔ. 29Ne nyamesɛ kamaasɛ ɔbono ɔ taa mɔ-gɛten yɛgɛ abɛɛ mɔ-sɛ, abɛɛ mɔ-nyi, abɛɛ mɔ-daana, abɛɛ mɔ-tedɛana, abɛɛ mɔ-pikyiiana, abɛɛ mɔ-biana abɛɛ mɔ-nsinkpan yɛgɛ me so mɔ, kaasɛ laa nyɛ imɔ-ɔnan gikpadɔ ikue-inun de o' kii nyɛ kyena Wurubuaarɛ asɛ gɛkpaa-gɛkpaa.”

30Ne Yesu gi kii tɔgɛ yɛɛ, “Gɛnen gɛkyena pobɔrɔ gɛbono dɔ mɔ abono mɛ gyɛ abelɛnsɛ gɛsinkpan so ilaa dɔ mɔ ako mɛ laa kpaa bingiri nbii, ne abono mɛ gyɛ nbii gɛsɛ gɛrɛ ilaa dɔ mɔ ako, mɔ, mɛ laa kpaa wɔra abelɛnsɛ.”

Ndamu Ɣɛtɛ Siwu

© Wycliffe Bible Translators 2008

More Info | Version Index