Search form

Filipayi 2

Fɛ' Bara Fɛye-Nyoro Gɛsɛ Wɔra Fɛɛ Yesu

1Fɛye‑rɛ Yesu Kirisito ginyamesɛ kolon so mɔ, i kya keda fɛye-nyoro. Gɛnɔɔbono Kirisito kya laarɛ fɛye-ilaa mɔ, i kya yɛgɛ i kya tɔrɔ fɛye-asen. Wurubuaarɛ Oduduu mɔ kya sa fɛye gɛnɔ kolon. Fɛ kya su abara so lii fɛye-asen dɔ. 2Imɔ idɛ pɛwu i bo fɛye dɔ faa, fɛ' yɛgɛ i' tɛsɛ wɔra me ɔkon kpaa logɛ. Fɛ' nyɛ gɛnɔ kolon de gɛlaarɛ' fɛye-gɛkyena dɔ kpaa logɛ. Fɛye-asen dɔ de fɛye-nwɔnsa dɔ i' wɔra fɛɛ nyamesɛ kolon ne fɛ gyɛ. 3Fɛŋ sa fɛ' wɔra sɛi de i' wɔra gikoso gɛgyanbuɛ gɛkyena abɛɛ fɛ' nyiile fɛye-nyoro. Fɛ' bara fɛye-nyoro gɛsɛ de fɛ' kalɛ fɛye-nanboana wɔra asa dɔ don fɛye-nyoro. 4Fɛ mɛŋ sa fɛ' kerɛ fɛye-lɛɛ wolɛ so. Fɛ' kerɛ fɛye nanboana-lɛɛ kee so. 5Fɛye-nwɔnsa gi' wɔra fɛɛ gɛnɔɔbono Kirisito Yesu-lɛɛ gɛwɔnsa gɛ dɛ mɔ.

6Yesu dabɔlɛ ɔ gyɛ Wurubuaarɛ oyuduu faa mɔ,

ɔ mɛŋ kerɛ yɛɛ mɔ‑rɛ Wurubuaarɛ mɛ gyɛ kyɛɛ-kyɛɛ so mɔ,

ɔ' yelɛ imɔ so gyi gɛwura buu de Wurubuaarɛ.

7Ɔ too imɔ ibono pɛwu fuɛ.

Ne ɔ baa kyu daa isa ɔbono ɔnan ɔ tɛ owura asɛ mɔ oyuduu.

Nyamesɛ oyuduu ne i kyu korogɛ mɔ.

8O wu yɛɛ ɔ gyɛ nyamesɛ oyuduu gɛnen mɔ,

ɔ bara mɔ-nyoro gɛsɛ

ne o nu Wurubuaarɛ gɛdɛ kaaborɛ ɔ' nyɛ lɛwu gbaa.

Lɛwu ɔbono ɔnan o kyule ne o wu' mɔ gyɛ daa ipeeli lɛwu.

Mɛ da mɔ aŋanbi oyii so mɔɔ.

9Imɔ idɛ so mɔ, Wurubuaarɛ gi kosorɛ mɔ-gimu gikyɔ kyɔde,

ne ɔ yela mɔ ginyen gibono gi don ginyen kamaasɛ mɔ.

10Wurubuaarɛ gi kosorɛ mɔ-gimu gɛnen

de i' ba yɛɛ ɔkamaasɛ ɔbono o nu mɔ Yesu ginyen mɔ,

o' ŋmii daa mɔ.

Nyamesɛ kamaasɛ, ɔ bo Wurubuaarɛ dɔ‑o,

ɔ bo gɛsinkpan so‑o,

ɔ loo gɛsinkpan dɔ‑o,

o' ŋmii daa Yesu.

11De ɔkamaasɛ o' bugi gɛnɔ tɔgɛ yɛɛ,

“Yesu gyɛ Wura.”

De i' kyu nyisigyi kyu bara mɔ-sɛ Wurubuaarɛ.

Fɛ' Wɔra Fɛɛ Agyɛkpebi Abono A Kya Ŋɛlegi Gibiri Dɔ Mɔ

12Imɔso me-nanboana laarɛsɛ, fɛɛ gɛnɔɔbono fɛ kya nu me-gɛdɛ owi kamaasɛ dɔ mɔ, idɛ kon ibono meŋ bo fɛye asɛ faa, fɛ' pɛɛrɛ ansi nu me asɛ don owi ɔbono n bo fɛye asɛ nno mɔ. Fɛ' tansi selɛ Wurubuaarɛ de fɛ' pɛɛrɛ ansi wɔra ilaa ibono i laa lɔrɔ fɛye-ɔkyenaten yela Wurubuaarɛ asɛ mɔ. 13I lii fɛɛ Wurubuaarɛ kee kya wɔra mɔ-lɛɛ gɛsun fɛye-asen dɔ. Ɔ yɛgɛ fɛ nyɛ kyu mɔ-ilaa too fɛye-nyoro so ne ɔ kya yɛgɛ fɛ' nyɛ wɔra imɔ kee de i' kyena de mɔ-ɔbolɛ gɛlaarɛ.

14Ilaa kamaasɛ ibono fɛ laa wɔra mɔ, fɛ mɛŋ sa fɛ' lɔgedɛ abɛɛ fɛ' sɔɔ akyɔɔlɛ de Wurubuaarɛ. 15Imɔ ne nan yɛgɛ fɛye-asen dɔ i laa nyɛ fuuli ne i maŋ nyɛ ilaa nyɛnyɛn iko fɛye-nyoro so. Fɛ laa wɔra Wurubuaarɛ mɔ-biana gɛsintin. I maŋ nyɛ ineesi iko fɛye-nyoro so, yɛgɛ fɛ tɛ saarɛ ndɛ asa abono mɛ kya wɔra ibono iŋ gyɛ iwɔrasɛ mɔ. I keda ɔmɔ da kyɛɛrɛ fɛɛ gikotoo. Gɛnen asa adɛ nsana mɔ, fɛ laa ŋɛlegi fɛɛ agyɛkpebi. 16Fɛ dɛ agyɛbi abono a kya sa anyamesɛ Wurubuaarɛ asɛ gɛkyena ɔnan mɔ fa‑a nyiile asa. Imɔ idɛ pɛwu ne nan yɛgɛ n' yen fɛye me-gisen dɔ gɛkaabono Yesu Kirisito laa kii ba mɔ. I laa wɔra me ɔkon yɛɛ meŋ nyanga ansi wɔra gɛsun gɛdɛ too nkyu dɔ giyan. 17Fɛye-gikagyan gibono fɛ kya ka gyan Yesu so mɔ gi dɛ fɛɛ asunbi ne fɛ kya lɛɛ fa‑a sa Wurubuaarɛ. Ne fɛɛ me-nkalan ne nan wɔra fɛɛ nta nbono mɛ lɛɛ asunbi ne mɛ kya worogɛ mɔ, nkana i laa wɔra me ɔkon. I nyɛ ba gɛnen mɔ, nan gyi ɔkon de i' yɛgɛ fɛye kee fɛ' gyi ɔkon. 18Gɛnen kee ne fɛɛ i ba gɛnen mɔ, i kaaborɛ fɛ' yɛgɛ i' wɔra fɛye ɔkon de i' nyɛ wɔra me kee ɔkon.

Timoti De Epaforoditusɛ Ilaa

19Kyu lii Wura Yesu so mɔ, n kya sa gɛwɔnsa yɛɛ i maŋ kɛɛla ne nan sun Timoti fɛye asɛ. Nɛ nyɛ nu fɛye so mɔ de me-gisen gi' tɔrɔ me. 20Meŋ baa n bo ɔko fɛɛ mɔ. Fɛye-ilaa i tiri mɔ lii mɔ-gisen dɔ. 21Asa sɛnsɛ berɛ mɛ kya kerɛ mɔmɔ-lɛɛ daa pɛi. Iŋ gyɛ Yesu Kirisito-lɛɛ. 22Fɛye gbaa-gbaa fɛ nyi gɛnɔɔbono Timoti baarɛ gi lɛɛ mɔ-gidebi wolaa nyiile mɔ. Me‑rɛ mɔ a kya wɔra Wurubuaarɛ ɔkalan konkonsɛ mɔ so gɛsun dabɔlɛ mɔ, a wɔra fɛɛ ɔsɛ de obi. 23Imɔso nɛ kpɛ wu gɛnɔɔbono me-ilaa i kya kpe de mɔ, nan keda mɔ sun fɛye asɛ. 24Wura Yesu ɔlon dɔ mɔ, nɛ sɔɔ gyi yɛɛ i maŋ kɛɛla ne me gbaa-gbaa kee nan ba fɛye asɛ nno.

25Nɛ kerɛ faa, Epaforoditusɛ, aye-nanbo Yesu ɔson mɔ dɔ ɔbono fɛ lɛɛ sun yɛɛ ɔ' baa kyɛ me-takpo mɔ, i tiri yɛɛ n' lɛɛ mɔ-ɔkpa de o' kii ba fɛye asɛ. Me‑rɛ mɔ a wɔra gɛsun ne a kɔ sa Wurubuaarɛ ɔson mɔ dabɔlɛ. 26Ɔ kya nyingi fɛye pɛwu so. O nyi ibono fɛ nu mɔ-gilɔ mɔ so, ne i bo mɔ gɛwɔnsa yɛɛ ɔfaa fɛ tɛ de nwɔnsa. 27Gɛsintin so mɔ, ɔ lɔ. Ɔ laarɛ o' wu gbaa. Wurubuaarɛ ne n su mɔ so. I mɛŋ gyɛ mɔ wolɛ. O su me kee so de meŋ baa kii wu gɛnsinyan baa bɔla de ibono n kya wu faa. 28Gɛnen so mɔ, i kpɛ i kya da me kpa-kpa yɛɛ n' yɛgɛ mɔ de o' kii ba fɛye asɛ kusaa. Fɛ kii wu mɔ mɔ, i laa wɔra fɛye ɔkon, de me kee me-gisen gi' tɔrɔ me. 29Imɔso fɛ wu mɔ mɔ, fɛ' kyu ɔkon belɛ sɔɔ mɔ abaa anyɔ Wura Yesu ginyen dɔ de fɛ' kyu buubuu kyu sa gɛnen asa abono ɔnan. 30I san pii ɔfaanan o wu' Kirisito gɛsun mɔ so. Ilaa ibono fɛ laa wɔra sa me mɔ, ɔ yelɛ fɛye-giyaa dɔ wɔra imɔ kaaborɛ mɔ-nkpa gi laarɛ gi' lii mɔ-gibaa.

Ndamu Ɣɛtɛ Siwu

© Wycliffe Bible Translators 2008

More Info | Version Index