Search form

MA FILIPISE 3

Sibɔlɔlɔ Dzɛ Nɖe Ɔnukuare Sire.

1Kawirikɔ̃ ne, wũ manyii, so si siɣɔ mi sɔ miɖe mawɛ̃ ku Bosate. Iitɔrɛ me sɔ loaledza ara wagbe itsɛrɛ itã mi, alasɔ ne loatã sɔ itikpi kuiwɛ̃ iibabɔrɛ mi iso ne.

2Minyɔ so i maturi lalaa, mma nsɛ mabara ara lɛ makpɛkpɛ mmɔ iso. Mma nsɛ maɣɛ sɔ ngbɛsi matu sirɛrɛ̃ ne. 3Bo nɖe mma lotu sirɛrɛ̃ i ɔnukuare ame, alasɔ boto bosɔrɛ Ɣaa i ɔ̃ Siwarã ame fiɛ boba isoɣɔ i ngbã mɛ bosi i mawɛ̃ ibaragu Kristo Yesu ame. Boisɛ bosiai sosina ame kurabarara kukuwɛ̃.

4Mme ne, loawo ndamu ɔɖe i sosina kurabarara ame loɖo ɔbiara gɔ lobu sɔ ɔba ɔri gɔmɔ, fiɛ loba ara gbodzoo wa iso loaya. 5Mme ne, wũ iyi farafanava iso matu me sirɛrɛ̃, Israelse mɔmɔ loɣe me, lobɔrɛ i Benyamin kakpa ame fiɛ loɖe ɔ Hebrise gɔdɛĩ. I Mose mmara iso ibara ame ne, ɔ Farisise loɖe. 6Lowe ɔmɛrɛ̃ i mmara iso iɖe ame sɔ lota loya i mafɔɖedze ikuri iso. Si mmara maasu manya sibɔlɔlɔ ne, tee maibanya ikpi kuiwɛ̃ i wũ iso.

7Ɣɛɛ ara wa ɔɖuɖu lola loɔnyɔ sɔ aɖe me kusia ngbe ne, aisire me kuira nɔme ala Kristo ɔso. 8Fiɛ iiɖe nwagbe kere, ɣɛɛ ne, kuira iisifɔ me kuɣa iɖo sɔ loatsue Kristo Yesu lɛ Bosate. Ne ɔso fiɛ losɛ lobu wũ ira biara lɛ aku wa maasu maawiri sɔ Kristo aapɛgu me kɔrɔ̃ ne. 9Fiɛ lobie sɔ bo gu wũ aabara mawɛ̃ pelepele. Losiina sibɔlɔlɔ kusiwɛ̃ dzɛ lofɔ lobɔrɛgu i mmara iso ibara ame. Kiniɔ ne, sibɔlɔlɔ dzɛ loba ne, lofɔ sɛ̃ lokigu i Kristo kafɔkaɖe ame, sibɔlɔlɔ dzɛ lobɔrɛ i Ɣaa kɔrɛ ne, kafɔkaɖe iso siki. 10Nnɛ pɛ ka loto lobie kiniɔ nɖe sɔ loatsue Kristo, ɔle gɔ lotara wũ ɔbɔrɛgu i makpise ame, sɔ loawegu wũ inyɛwe fiɛ loabaragu mawɛ̃ i ɔ̃ kukpi ame. 11Fiɛ lobie sɔ loawe ɔriinyɔ sɔ mme wũ Ɣaa aatara me ɔbɔrɛgu i makpise ame losɛ ngbã.

Paulo Ɔɣɛ Kumɛgɔ Ɔ̃abara Fiɛ Ɔ̃ana Kusia.

12Wũ kɔrɔ̃ iipɛgu nnɛ loto lonyɔ ɔri, fiɛ loiyi ana. Ɣɛɛ ne, loto lokpɛ̃ teteree sɔ iapɛgu me kɔrɔ̃, alasɔ Kristo Yesu ɔɔsu me ɔbara ɔ̃ ɔre. 13Wũ manyii, loito loɣɛ sɔ nnɛgbe ɔɔpɛgu me kɔrɔ̃ koko, ira ka iwɛ̃ pɛ iso i wũ adzuni ka asia. Ne nɖe sɔ, loaɣara ira biara nɛ loɔfe, losu wũ ɔle ɔɖuɖu losia i nnɛ nse me i katɔ̃ iso. 14Ne ɔso lotere ise teteree sɔ loaɖe iso lofɔ kuso gɔ i Ɣaa ɔkpere me ɔtã iki i Kristo Yesu iso i ngbã mɛ loaba i kato ame ne.

15Mitã adzuni wagbe si awe i bo ma ɔɖuɖu loɔmɔ i Siwarã ame, ɣɛɛ si mi ɔrere ba adzuni mama ne, Ɣaa to ɔ̃aɖi ɔte wũ. 16Nda awe i nnɛmɔ aase o-o ne, mitã bokɛlɛgu i katɔ̃ i Siwarã siri dzɛ iso bosɛ.

17Wũ manyii mikɛlɛ i katɔ̃ misore me si mikarã inɔ i mma nsi ngbã lɛ kumɛgɔ bosɛ bote mi iso. 18Loɔɣere mi lonya, fiɛ loto loledza iɣɛ ku nnɔmɛ sɔ, maturi gbodzoo si ngbã mɛ nto mite sɔ matsiri kukpi gɔ i Kristo ɔkpi i kudziri iso. 19I kawirikɔ̃ ne, mmagbe to maabo i itɔkpe nɛ loisɛ inyi ame alasɔ ma Ɣaa nɖe ma iyiri. Ara wa ikote sɔ aakpɛ̃ ma kunuarɛ ne, wã iso masɛ mana isoɣɔ fiɛ kayi gagbe iso ara pɛ iso i ma adzuni sia. 20Bo ɣɛɛ ne, Ɣaa sigarakaɖekɔ̃ mare boɖe, fiɛ bosi bosia bo Ɖidze gɔ nɖe Bosate Yesu Kristo sɔ ɔ̃abɔrɛ i kato ɔba. 21Ɔto ɔ̃afinikira bo siturina dzɛ nna ɔle ngbe ɔbara lɛ ɔ̃ sire dzɛ nto sifiɛ iki i ɔle gɔ ɔsɛ ɔsu ɔkpadzɛ̃ ara ɔɖuɖu ɔpia i ɔ̃ kayirinɔ ame.

Ndamu Ɣɛtɛ Siwu

© Wycliffe Bible Translators 2008

More Info | Version Index