Search form

MA FILIPISE 4

Paulo Ɔɣere Ma Filipise Ara Wa Si Mabara.

1Ne ɔso wũ manyii ma losɛ loɖɔɛ, mi ma nsɛ mipia me isoɣɔ fiɛ mi nɖe wũ kuso, mi iti ame loto lobu ɔwi biara. Miya teteree i Bosate ame.

2Loto Ewodia gu Sinteke i kukpa sɔ manɔgu so ara karɔ̃ lɛ manyiibi i Bosate ame. 3Fiɛ fɔ ngɔ fɔ nɖe wũ rabaradze laa ana ne, buai marɔ̃go inyɔ magbe, alasɔ maɔbuai me gbaã i Itɔ̃me Bielea iɣɛ ame ku Klemens gu wũ marabaradze laa ɔɖuɖu ma ayere loibawo ɔrɔ, ɣɛɛ ma ayere pia i Ɣaa magbanadze ɔko ame.

4So si siɣɔ mi ɔwi biara i mi mawɛ̃ ibaragu Bosate ame, loto loledza iɣɛ sɔ, so si siɣɔ mi!

5Miwe ɔtu ɣɔa mitã maturi ɔɖuɖu alasɔ Bosate iba ɔɔbore ibo. 6Midaaya so iso i kuira ame, ɣɛɛ si mito mikparama kayi ne, miɣere Ɣaa ara wa ɔɖuɖu mito mibie si mipɛ wũ siba i wã iti. 7Iyɔ Ɣaa isobuɛ nɛ karɔ̃ i maturi iibawo ɔnɔ aadzuɛ̃ mi situ gu adzuni ɔɖuɖu gɔ mibara mawɛ̃ ku Kristo Yesu.

8Kawirikɔ̃ ne wũ manyii, mitã mi adzuni si ayi ku ara wa nɖe asɛɛ, nwa lokote atã ile, nwa nɖe ɔnukuare, nwa lokote atã kuwarɛ, nwa loya, nwa iso i kuira iinina, ara wa nsɛ alɛ ɔnyɔ gu nwa lokote sɔ ɔturi aabara. 9Misore wũ nsɛgbai i ara wa misuã gu nwa mifɔ mibɔrɛgu i wũ kɔrɛ, wũ ikaɖe gu kurabarara ame. Iyɔ Ɣaa gɔ nsɛ ɔtã isobuɛ aawegu mi.

Paulo Ɔpɛ Ma Filipise Siba I Ma Karatã Iti.

10So ɔɣɔ me gbaã i Bosate ame sɔ i ɔwi dzoroo kama ne, lofɔ karatã lobɔrɛgu i mi kɔrɛ. Atoa sɔ iiɖe ɔsɛ̃ misɛ̃ sɔ miito mibuai me ku ɔwi gɔmɔ ame ne, miina ɔri sɔ miasese me karatã. 11Loito loɣɛ nnɛgbe si ite sɔ minyua me misɛ, alasɔ loɔsuã kumɛgɔ i ira biara nɛ loba aabo me anɔ. 12Loɣe nnɛ nɖe kusa fiɛ loɣe nnɛ nɖe karana. I wã ɔɖuɖu ame ne, loɔsuã kumɛgɔ ikote sɔ ɔturi aase si kukã pia ɣee araɖea pia, si kusa pia, ɣee karana pia. 13Ɔle gɔ i Kristo ɔtã me ɔso ne, loawo ira biara kanya ɔya.

14Ɣɛɛ ibua ilɛ sɔ mibuai me i wũ amɔrɛ̃ ame. 15Mi ma Filipise ɣe kukaakɔ sɔ karɔ̃kasɛkɔ̃ ɔwi gɔ lobɔrɛ i Makedonia fiɛ losɛ Itɔ̃me Bielea imomo ipɛ karɔ̃ ne, mi ɔnɔwɛ̃ pɛ losese me karatã fiɛ mifɔ wũ kusɛkusɛ. 16Gɔ lowe i Tesalonika ne, mila miɔsese me karatã ɔwi ku ɔwi. 17Iiɖe karatã loto lobie lobɔrɛgu i mi kɔrɛ, ɣɛɛ kusia gɔ miana i kato iki i karatã iso ɔso. 18Miɔtã me kuso kɔra miɖodza. Karatã ga misese me mikigu i Epafrodito iso ɔba kaapɛgu me kɔrɔ̃, ne ɔso kuira iisinya me. Mi karatã gagbe to kafɔrɛ̃ kɔrɔ̃kɔrɔ̃ lɛ ara wa mafɛ̃ matã Ɣaa fiɛ abo wũ anɔ, apia wũ isoɣɔ. 19Ne ɔso Ɣaa gɔ loto losɔrɛ aatã mi mi ara nyaa ɔɖuɖu wa loanya mi iki i Kristo Yesu karana gu ikpawaĩ ame.

20Mitã bole bo Ɔse Ɣaa ita i kiniɔ ito ikɛlɛ. Si iba ngbɔ.

So Imala.

21Loya Ɣaa maturi ma ɔɖuɖu nɖe Kristo Yesu mare. Manyii ma ɔɖuɖu mpia i ngbe ɔya mi o-o! 22Ɣaa maturi ma ɔɖuɖu mpia i ngbe ɔya mi, titirio mma mpia i Roma Igarakpakpa iyo ame.

23Bosate Yesu Kristo abualɛra si awegu mi.

Ndamu Ɣɛtɛ Siwu

© Wycliffe Bible Translators 2008

More Info | Version Index