Search form

Gilɛɛnyiile 1

1Ilaa ibono i bo ɔwolɛ baarɛ dɔ faa, Wurubuaarɛ ne n kyu imɔ wɔra Yesu Kirisito abaa dɔ yɛɛ ɔ' lɛɛ imɔ nyiile mɔ-asonbo de mɛ' nyɛ nu ilaa ibono i laa baa ba mɔ. I maŋ kɛɛla ne ɔwolɛ baarɛ dɔ ilaa i laa ba gɛsintin. Owi ɔbono Yesu laa lɛɛ imɔ nyiile mɔ-asonbo gɛnen mɔ, o sun mɔ-ɔsɔɔ lii Wurubuaarɛ dɔ ba Gyɔn (me ɔbono n gyɛ mɔ-gɛsun ɔwɔrabo mɔ) asɛ. 2Yesu ɔsɔɔ mɔ gi yɛgɛ nɛ wu Wurubuaarɛ ilaa idɛ fɛɛ oderi yɛgɛ n kerɛ, ne nɛ ŋmarasɛ imɔ pɛwu yela fɛɛ gɛnɔɔbono nɛ wu imɔ mɔ de asa mɛ' nyɛ nu imɔ. Nɛ lɛɛ Wurubuaarɛ agyɛbi abono nɛ nu de ilaa ibono Yesu Kirisito gi buu sa me mɔ kee nyiile asa. 3Ɔbono ɔ laa kalɛ Wurubuaarɛ ɔkalan baarɛ agyɛbi sa asa mɔ gyɛ omudɛnsɛbo Wurubuaarɛ asɛ. Abono, mɔ, mɛ laa nu de mɛ' gyi amɔ so mɔ, mɛ wɔra amudɛnsɛbo kee. I lii fɛɛ owi ɔbono agyɛbi mɔ a laa ba gɛsintin mɔ gɛnen owi mɔ gi fuude.

Wurubuaarɛ de Yesu Kirisito

4Me Gyɔn ne n kya ŋmarasɛ gɛnen ɔwolɛ baarɛ n kya sa Yesu asonbo akpen sono abono a bo Esiya gɛsinkpan so mɔ.

Wurubuaarɛ ne n gyɛ ɔbono ɔ bo no, ɔ wolaa ɔ bo no, ne ɔ bo no gɛkpaa. Ɔ' sa fɛye so gɛwɔnsa dɛnsɛ. Wurubuaarɛ mɔ‑rɛ mɔ-Oduduu ɔbono ɔ bo gikpadɔ sono ne ɔ bo Wurubuaarɛ gɛgyapaa asɛ mɔ 5de Yesu Kirisito mɛ' sa fɛye so gɛwɔnsa dɛnsɛ de mɛ' sa fɛye gisen yuuli.

Yesu Kirisito ne n gyɛ ɔbono ɔ kya gyi gɛsintin

ne ɔ kya lɛɛ ilaa kamaasɛ nyiile anyamesɛ imɔ-ɔkpa so mɔ.

Mɔ ne n gyɛ ɔbono o wu'

ne ɔ gyangbara nyamesɛ kamaasɛ kyingi lii ibuni dɔ mɔ.

Mɔ kee ne n gyɛ gɛsinkpan so awura mɔ mɔmɔ-wura.

Nyisigyi ɔ' wɔra Yesu Kirisito-lɛɛ!

Mɔ ne n kya laarɛ aye-ilaa,

ne o kyu mɔ-nkalan sɔgɛ aye abono a kya ka gyan mɔ so mɔ

lii aye-ilaa nyɛnyɛn dɔ.

6Mɔ ne n yɛgɛ ne a wɔra fɛɛ awuragyibo

de asunbi alɛɛbo sa mɔ-sɛ Wurubuaarɛ.

I lii fɛɛ ɔ yɛgɛ a kya kpaa de i' lɔrɔ anyamesɛ mɔmɔ‑rɛ Wurubuaarɛ nsana.

Nyisigyi de gɛwuragyi i' wɔra Yesu-lɛɛ gɛkpaa-gɛkpaa.

I' ba gɛnen.

7Fɛ' nu yɛɛ Yesu laa kii ba mɔ‑rɛ Wurubuaarɛ awolɛ!

Nyamesɛ kamaasɛ laa wu mɔ de mɔ-ansi

de asa abono mɛ yii mɔ-gɛkelɛbi fondi mɔ pɛwu.

Gɛsinkpan so asa kpɛi-kpɛi pɛwu mɛ laa saawo lii mɔ so.

I' ba gɛnen.

8Wura Wurubuaarɛ yɛɛ,

“Me ne n gyɛ giyiigɛsɛ de laalaalogɛ.

Me ne n bo no,

me ne n wolaa n bo no,

ne me ne n bo no gɛkpaa.

Me ne n gyɛ Ɔlolonbo.”

Gɛnɔɔbono I Ba Ne Nɛ Ŋmarasɛ Ɔwolɛ Baarɛ Mɔ

9Me Gyɔn ne n kya buu gɛnen ilaa idɛ n kya sa fɛye abono fɛ kya ka gyan Yesu so mɔ. Kyu lii aye‑rɛ Yesu ginyamesɛ kolon mɔ so mɔ, n gyɛ fɛye-nanbo mɔ-ɔson dɔ. Me‑rɛ fɛye kpini ne n kya wu ɔlaa wusɛ, a gyɛ Wurubuaarɛ awuragyibo ne a kya nyɛ gisen Wurubuaarɛ gɛsun mɔ dɔ. Nkana n kya wɔra Wurubuaarɛ agyɛbi mɔ so gɛsun n kya tɔgɛ Yesu ilaa mi‑i sa asa de mɛ' sɔɔ mɔ gyi. Imɔso asa ako mɛ gya me kpaa kyena apoo gikyaafiya belɛ giko so. Asa mɛ tɛ nno. Mɛ kya terɛ nno yɛɛ Patimosɛ.

10N bo nno gɛnen mɔ, Wurubuaarɛ ɔson gɛkɛ gɛko mɔ, Wurubuaarɛ Oduduu mɔ gi baa kyena me so. Ɔ tɛ me so mɔ, nɛ nu gɛnɔ gɛko me-gɛmara ken-ken fɛɛ gɛgandan. 11Gɛnɔ mɔ gɛ tɔgɛ sa me yɛɛ, “Ŋmarasɛ ilaa ibono fo wu mɔ wɔra ɔwolɛ dɔ de fo' kyu bunge Yesu asonbo akpen abono a bo isowolɛ sono idɛ so mɔ. Isowolɛ mɔ ne n gyɛ Efiso, Simɛɛna, Pɛgamum, Tayatira, Saadisɛ, Filadɛɛfiya, de Lawodisiya.”

Nɛ Wu Yesu Yelɛ Ifatela Igyanten Sono Nsana

12Nɛ nu gɛnen mɔ, nɛ kisee kerɛ de n' wu ɔbono ɔ kya tɔngɛ de me mɔ, n' baa kerɛ mɔ, ifatela igyanten sono iko ne. Sika kɔkɔɔ ne mɛ kyu wɔra imɔ. 13Ifatela igyanten mɔ nsana mɔ, nɛ wu ɔko fɛɛ gɛsinkpan so nyamesɛ, o suu gɛgbɛ bosorosɛ kpelegɛrɛ yii ne ilaa iko fɛɛ liide i laran mɔ-gikan so. Imɔ-nkyu i dɛ fɛɛ sika kɔkɔɔ. 14Mɔ-gimu dɔ iman i fuuli faa parɛ-parɛ fɛɛ okurufɛpuu. Mɔ-ansi abi a dɛ fɛɛ ɔgya ɔbono ɔ kya dɛɛ mɔ. 15Mɔ-ayaa a dɛ fɛɛ gibeletɔ ne n tɔ ɔgya dɔ kɛɛla ne mɛ lɛɛ tɔlɔsɛ. Mɔ-gigyɛbi' mɔ gi kya gbere fɛɛ abii dɔ ibon ne n bɔla gibɔla belɛ. 16Ɔ dɛ agyɛkpebi sono de mɔ-gibaa gyisɛ. Gɛki boyɛsɛ gɛko, gɛmara ɔyɛ, ansi ɔyɛ, gɛbono gɛ yelɛ sa gɛsintin agyɛbi mɔ gɛ bo mɔ-gɛnɔ dɔ, ne mɔ-ansi dɔ i kya ŋɛlegi fɛɛ owi.

17Nɛ wu mɔ gɛnen mɔ, nɛ tɔrɔ mɔ-ayaa dɔ fɛɛ nɛ wu' daa. Mɔ mɔ gi kyu mɔ-gibaa gyisɛ gyan me so, ne ɔ tɔgɛ sa me yɛɛ, “Gɛŋ selɛ gifuu. Me Yesu ne. Me ne n gyɛ giyiigɛsɛ de laalaalogɛ. 18N kpɛ n bo no. Nɛ naa kyena wu'. Ne idɛ kon, n bo no gɛkpaa-gɛkpaa. Lɛwu de nkyan isafuee i bo daa me-gibaa dɔ. 19Ŋmarasɛ ilaa ibono fo laa wu mɔ, ibono i bo no mɔ de ibono i laa baa ba gɛkaako mɔ, pɛwu yela. 20Ilaa ibono agyɛkpebi sono abono fo wu me-gibaa gyisɛ dɔ de ifatela igyanten sono mɔ i yelɛ i sa mɔ ilaa ne nan baa tɔgɛ faa. Agyɛkpebi sono mɔ a yelɛ a sa Wurubuaarɛ isɔɔ sono iko. Mɔmɔ ne n kya gyangbara sa Wurubuaarɛ asonbo akpen sono mɔ. Ne ifatela igyanten sono mɔ mɔ, i yelɛ sa Wurubuaarɛ asonbo akpen sono mɔ.”

Ndamu Ɣɛtɛ Siwu

© Wycliffe Bible Translators 2008

More Info | Version Index