Search form

KAƉIKATE ƆKO 15

Ɣaa Makpabo Ɔbɔ Inyɛwe Aka Akɔdzɛ Tsɔra.

1Nwagbe kama ne, lonya iwawãra mama i kato nɛ mba ɣii gbaã. Ne nɖe Ɣaa makpabo ikɔdzɛ ma nrɔɔ̃ ame i inyɛwe aka akɔdzɛ pia ne. Inyɛwe akɔdzɛ wagbe nɖe atsɔra wa loaɖi Ɣaa sikpã tsɔra ate ne.

2Lonya ɔpo gɔ nse lɛ aɣɔɣɔɛ wa ame lorɛtɛ lɛ ɔtɔ. Mma loɖe bɔi lalaa gu ɔ̃ kumiamia itĩ gu ɔ̃ iyere ara kukame iso ɣɛ i aɣɔɣɔɛ katɔ̃ fiɛ Ɣaa ɔpia ma sisango i nrɔɔ̃ ame. 3Maka Mose gɔ nɖe Ɣaa ɔɖabo gu Sɛrɛrerɔ̃ Ibi kuka sɔ,

“Bosate Ɣaa gɔ nɖe ɔle ɔɖuɖu Sate, fɔ kurabarara ɔmɔ fiɛ kuse ɣaa gbaã.

Fɔ gɔ fɔ nɖe kayiiso ɔɖuɖu igara,

fɔ siri se bɔlɔlɔ

fiɛ aɖe ɔnukuarese.

4Nna mpia fiɛ ɔ̃ibanigã-ɔ Bosate?

Fiɛ nna loibapia fɔ iyere kuwarɛ?

Alasɔ fɔ ɔnɔwɛ̃ fɔ nse sekelee

fiɛ maturi ɔɖuɖu aabɔ ma ati karɔ̃ matã-ɔ.

Alasɔ maɔnya fɔ sibɔlɔlɔ kurabarara.”

5Nnɛgbe kama ne, lonya isɔrɛyo nɛ mpia i kato gu Ɣaa sikati ikpayo nɛ ame ɔsɛ ɔsɛ ɔsese ise. 6Ɣaa makpabo ikɔdzɛ ma nto inyɛwe aka akɔdzɛ ɔbɔrɛ i isɔrɛyo. Mapia awu fudza wa nse sekelee fiɛ ato afiɛ gelegelegele. Masu sikãrɛtɛa kufiami matɔ so i agbegbe. 7Ne ara wa mba ngbã aka ana iwɛ̃ ɔsu sikãrɛtɛa arɔi akɔdzɛ wa ame i Ɣaa gɔ mba ngbã fiɛ ɔpia ɔwi biara sikpã pia ɔtã Ɣaa makpabo ikɔdzɛ magbe ne. 8Kuɣɔ gɔ nto kubɔrɛ i Ɣaa ikpawaĩ gu ɔ̃ ɔle ame ɔyi Ɣaa isɔrɛyo kpitii. Kuwɛ̃ iiwo isɔrɛyo ame ɔbo gbɔgbɔɔgbɔ inyɛwe aka akɔdzɛ wa i Ɣaa makpabo ikɔdzɛ mamɔ ɔbɔ ɔfe aro.

Ndamu Ɣɛtɛ Siwu

© Wycliffe Bible Translators 2008

More Info | Version Index