Search form

KAƉIKATE ƆKO 4

Kumɛgɔ Mato Masɔrɛ Ɣaa I Ɔ̃ Sigarakaɖekɔ̃.

1Nwagbe kama ne, lonya kayogodɔ̃ ga losese kase i kato.

Ne silɔ dzɛ loɖe katɔ̃ siɖegu me ika fiɛ sire lɛ kadadã ɔkpere me siɣere sɔ, “Ya ba i kato ngbe si loɖi ara wa loaba i nwagbe kama lote-ɔ.” 2Ɔluwɛ̃ ne, Ɣaa Siwarã ɔbo i wũ ame lonya sigaraiyara i kato nɛ iso i ɔwɛ̃ si. 3Ngɔ nsi i sigaraiyara iso to ɔfiɛ lɛ yaspa gu sardis ata wa lofɔ kuɣa fiɛ ɔbebei gɔ nto ɔfiɛ teteree lɛ emerald ita ɔki ilɔ sigaraiyara. 4Sigaraayara sinyɔ-ana mama ana ɔki alɔ sigaraiyara nɛgbe fiɛ makpakpa sinyɔ-ina ma mpia awu fudza fiɛ matɔ̃me sikãrɛtɛa sigaraikoto si i sigaraiyara wagbe iso. 5Kado imama gu kado iɖu gu silɔ agbãagbã to abɔrɛ i sigaraiyara ame. Sikaniɛ aka akɔdzɛ ɔmɔɛ̃ sito i sigaraiyara katɔ̃. Nwagbe nɖe Ɣaa Siwarã aka akɔdzɛ ne. 6I sigaraiyara katɔ̃ ne, ira iwɛ̃ nɛ nse lɛ ɔpo nɛ masu aɣɔɣɔɛ wa ame lobua akpa mabara ala se, fiɛ ne ame ɔkpa waĩ.

Ara ana awɛ̃ wa mba ngbã fiɛ anɔmi ɔyi wã iso katɔ̃ gu kama ɔki alɔ sigaraiyara kakɔi biara. 7Ara wa mba ngbã ngbe iɖeakatɔ̃ se lɛ dzata, inyɔare se lɛ nantsuĩrɛrɛ̃, itɛare katɔ̃ se lɛ ɔturi kare fiɛ inaare se lɛ finikpo gɔ nto ɔfɛrɛrɛ awe. 8Ara ana wa mba ngbã ngbe ɔɖuɖu ba abue akuɔ akuɔ, fiɛ wã iso kakɔi biara ɔyi ku anɔmi. Kasɛ̃ i kakɔme ne, ato kuka gɔ aisɛ alo sɔ,

“Isekele, isekele, isekele

nɖe Bosate Ɣaa gɔ nɖe Ɔle Ɔɖuɖu Sate

ngɔ loɔsɛ ngbã ɔnya, fiɛ ɔsi ngbã, fiɛ ɔto ɔ̃aledza iba.”

9Ɔwi biara ne, ara wa mba ngbã ngbe to asu ile gu kato ikɔlɛ gu siba ipɛ atã ngɔ nsi i sigaraiyara iso fiɛ ɔ̃ibakpi ɔnya. 10Si ato abara ngbɔ ne, makpakpa sinyɔ-ina mamɔ sɛ makɔlɛ mafu i ɔ̃ katɔ̃ masɔrɛ ɔ̃ gɔ nsi ngbã ɔwi biara. Masɛ maɖi ma sigaraikoto masɛ i sigaraiyara katɔ̃ maka kuka male wũ maɣɛ sɔ,

11“Bosate gu Ɣaa!

Isekele, kuwarɛ gu ɔle ɔkotegu-ɔ.

Alasɔ fɔ lobara ara ɔɖuɖu,

abara wã fiɛ atã apia ngbã

i fɔ kuɖɔɛ kanya.”

Ndamu Ɣɛtɛ Siwu

© Wycliffe Bible Translators 2008

More Info | Version Index