Search form

Gilɛɛnyiile 5

Ilaa Ibono I Laa Baa Ba Mɔ Ɔwolɛ

1Nɛ wu Wurubuaarɛ tɛ mɔ-gɛgyapaa so ɔ dɛ ɔwolɛ ɔko de mɔ-gibaa gyisɛ. Gɛnen ɔwolɛ mɔ, mɛ ŋmarasɛ ilaa ibono i laa baa ba mɔ bɔla mɔ-ansi de gɛmara ne mɛ bɔɔ mɔ fɛɛ gifengen, ne mɛ kyu gimara kyu daasɛ mɔ nten sono de ɔko kpɛi ɔ mɛŋ sa ɔ' nyɛ sangɛ mɔ. 2Nɛ wu Wurubuaarɛ dɔ ɔsɔɔ ɔlolonbo ɔko yelɛ ɔ kya taasɛ ken-ken de ɔkamaasɛ ɔ' nyɛ nu yɛɛ, “Anɛ ne n kaaborɛ ibono ɔ laa nyɛ fɔlɔgɛ idaasɛ mɔ de ɔ' sangɛ Ilaa Ibono I Laa Baa Ba Mɔ ɔwolɛ mɔ?” 3Ɔ taasɛ gɛnen mɔ, mɛ kerɛ Wurubuaarɛ dɔ de gɛsinkpan so de gɛsinkpan ɔbɔ dɔ pɛwu, mɛŋ nyɛ isa ɔbono ɔ bo ɔkpa de ɔ' taalɛ sangɛ ɔwolɛ mɔ de ɔ' kerɛ mɔ dɔ mɔ. 4Nɛ nu yɛɛ iŋ nyɛ isa ɔbono ɔ kaaborɛ ɔ' sangɛ ɔwolɛ mɔ de ɔ' kerɛ mɔ dɔ gɛnen mɔ, nɛ su gikyɔ-gikyɔ. 5N kya su mɔ, abelɛnsɛ mɔ dɔ ɔko gi tɔgɛ sa me yɛɛ, “Gɛŋ baa su. Kerɛ, Gyuda gɛsu dɔ guuni mɔ, Yesu ɔbono ɔ gyɛ Oloobu Deefidi ɔpaa dɔ mɔ, gi ti wolaa kɔ lii. Mɔ ne n bo ɔkpa de ɔ' fɔlɔgɛ idaasɛ sono mɔ de ɔ' sangɛ Ilaa Ibono I Laa Baa Ba Mɔ ɔwolɛ mɔ”.

6Nɛ kerɛ Wurubuaarɛ gɛgyapaa de ilaa inan mɔ nsana de abelɛnsɛ mɔ nsana mɔ, nɛ wu Yesu yelɛ fɛɛ sandɛ, fo laa tɔgɛ yɛɛ mɛ kyu mɔ kyɔɔlɛ daa. Ɔ bo ase sono abono a kya lɛɛ mɔ-ɔlon nyiile, ne ɔ bo ansibi sono. Ansibi adɛ ne n gyɛ Wurubuaarɛ Oduduu ɔbono ɔ bo gikpadɔ sono mɔ. Wurubuaarɛ gi sun mɔ-Oduduu baarɛ ba gɛsinkpan so gɛten kamaasɛ gyan. 7Wurubuaarɛ sandɛ mɔ gi kpaa sɔɔ ɔwolɛ mɔ lii Wurubuaarɛ gibaa gyisɛ dɔ. 8Ɔ nyɛ ɔkpa sɔɔ ɔwolɛ mɔ gɛnen mɔ, nfono mɔ, ilaa inan ibono i bo nkpa mɔ de abelɛnsɛ oko anan mɔ mɛ kpelegɛ dɛ mɔ-ayaa dɔ mɛ kya yen mɔ. Abelɛnsɛ mɔ ɔkamaasɛ dɛ ilaa iko fɛɛ aduule de sika kɔkɔɔ gɛlɛpɛbii, ne anuwanterɛ a bo gɛmɔ dɔ. Anuwanterɛ mɔ a yelɛ sa Yesu asonbo ndalaa.

9Abelɛnsɛ oko anan mɔ mɛ bii ɔlon pobɔrɔ yɛɛ,

“Fo Yesu wolɛ ne n kaaborɛ ibono fo' nyɛ ɔkpa

sɔɔ Ilaa Ibono I Laa Baa Ba Mɔ ɔwolɛ mɔ,

fɔlɔgɛ mɔ-idaasɛ mɔ.

I kya nyiile yɛɛ fo ne mɛ kyɔɔlɛ,

ne fo-nkalan gi sɔɔ anyamesɛ kiiri sa Wurubuaarɛ

mɛ san mɛ tɛ mɛ sa mɔ.

Fo ne n sɔɔ anyamesɛ lii ɔpaa kamaasɛ dɔ,

gɛdɛ kamaasɛ dɔ, asa oyuduu kamaasɛ dɔ,

de gɛsinkpan kamaasɛ so.

10Fo ne n yɛgɛ ne gɛnen asa mɔ

mɛ wɔra awuragyibo de asunbi alɛɛbo sa aye-sɛ Wurubuaarɛ.

I lii fɛɛ fo yɛgɛ mɛ kya kpaa

de i' lɔrɔ anyamesɛ mɔmɔ‑rɛ Wurubuaarɛ nsana.

Abono fo sɔɔ gɛnen mɔ

mɛ laa baa gyi gɛwura gɛsinkpan asa pɛwu so.”

Soso De Gɛsɛ Awura Pɛwu Mɛ Kya Yen Wurubuaarɛ Mɔ‑rɛ Yesu

11Nfono mɔ, nɛ kerɛ mɔ, Wurubuaarɛ dɔ isɔɔ sakpii belɛ abono nyamesɛ maŋ taalɛ bii mɔmɔ-gɛgyɔnɔ mɔ mɛ kyaabɔɔ Wurubuaarɛ gɛgyapaa mɔ de ilaa inan ibono i bo nkpa mɔ de abelɛnsɛ mɔ. Nɛ nu sakpii mɔ pɛwu 12kya kpen yɛɛ,

“Gɛbelɛnsɛ, awuratɔ, ɔlaako ginyi, ɔlon, buubuu,

nyisigyi, de ayenbi i kaaborɛ Yesu.

Mɔ ne n gyɛ Wurubuaarɛ sandɛ

ɔbono mɛ kyu mɔ kyɔɔlɛ sa anyamesɛ mɔ.”

13Nfono mɔ, nɛ nu ilaa kamaasɛ ibono Wurubuaarɛ gi lɛɛ Wurubuaarɛ dɔ, de gɛsinkpan so, gɛsinkpan dɔ, de nkyu dɔ, ilaa kamaasɛ ibono i bo imɔ pɛwu dɔ mɔ i kya tɔgɛ yɛɛ,

“Ayenbi, buubuu, nyisigyi, de ɔlon

i' wɔra mɔ ɔbono ɔ tɛ gɛgyapaa mɔ so mɔ-lɛɛ

de Wurubuaarɛ sandɛ mɔ-lɛɛ gɛkpaa-gɛkpaa!”

14Mɛ kpen gɛnen mɔ, ilaa inan ibono i bo nkpa mɔ i kyule yɛɛ, “I' ba gɛnen!” Ne abelɛnsɛ mɔ mɛ kpelegɛ dɛ Wurubuaarɛ mɔ‑rɛ mɔ-sandɛ mɔ ayaa dɔ mɛ kya yen ɔmɔ.

Ndamu Ɣɛtɛ Siwu

© Wycliffe Bible Translators 2008

More Info | Version Index