Search form

Rom Awura 10

I Tansi I Tiri Me Yɛɛ Isirale Awura

Mɔmɔ‑rɛ Wurubuaarɛ Nsana I' Nyɛ Lɔrɔ

1Me-nanboana Yesu asonbo, i tansi i tiri me yɛɛ Isirale awura mɛ' nyɛ Wurubuaarɛ amɔlɛgɛ de mɛ' nyɛ mɔ asɛ gɛkyena. Lii gɛnen so mɔ, n kya kolɛ Wurubuaarɛ mi‑i sa mɔmɔ. 2N nyi mɔmɔ so yɛɛ nkana mɛ tansi kyu mɔmɔ-nyoro kyu sa Wurubuaarɛ ɔson mɔ. Mɛ mɛŋ kii bii ɔkpa ɔbono so i kaaborɛ mɛ' kyu de Wurubuaarɛ ɔ' nyɛ kyu ɔmɔ yɛɛ mɔmɔ-asen dɔ i boran mɔ. 3Mɛ mɛŋ nyi yɛɛ pɛi ne Wurubuaarɛ laa kyu nyamesɛ yɛɛ mɔ-gisen dɔ i boran mɔ, i kya lii daa mɔ Wurubuaarɛ gbaa-gbaa asɛ. Isirale awura mɔ berɛ, mɛ kya laarɛ mɛ' tɔgɛ mɔmɔ-gibaa so daa yɛɛ, “A gyi Wurubuaarɛ nbara ndɛ abɛɛ ndɛ so mɔ, Wurubuaarɛ laa wu yɛɛ aye-asen dɔ i boran.” Imɔso mɛ mɛŋ kya bara mɔmɔ-nyoro gɛsɛ sa Wurubuaarɛ de mɔ ne o' kyu mɔmɔ-asen dɔ yɛɛ i boran. 4I kya nyiile yɛɛ Kirisito gi logɛ gɛnɔɔbono asa mɛ laa gyi Wurubuaarɛ nbara mɔ so de Wurubuaarɛ o' kyu mɔmɔ yɛɛ mɔmɔ-asen dɔ i boran mɔ. Wurubuaarɛ gi san ɔ kya laarɛ daa yɛɛ o' kyu ɔkamaasɛ ɔbono ɔ laa ka gyan Kirisito so mɔ yɛɛ mɔ-gisen dɔ i boran.

5Abono mɛ laa tɔgɛ yɛɛ mɛ laa gyi Wurubuaarɛ nbara mɔ so daa pɛi de Wurubuaarɛ ɔ' lɔɔ kyu ɔmɔ yɛɛ mɔmɔ-asen dɔ i boran mɔ, Mosisi gi ŋmarasɛ mɔmɔ so ilaa yela yɛɛ,

“Ɔbono o gyi nbara mɔ so mɔ ne nan nyɛ kyena Wurubuaarɛ asɛ kyu naa de nmɔ so.”

6Abono, mɔ, mɛ laa ka gyan Wurubuaarɛ so de ɔ' mɔlɛgɛ mɔmɔ de o' kyu ɔmɔ yɛɛ mɔmɔ-asen dɔ i boran mɔ, mɛ ŋmarasɛ mɔmɔ so ilaa yela Wurubuaarɛ agyɛbi dɔ kee yɛɛ,

“Gɛŋ sa fo' taasɛ fo-nyoro yɛɛ,

‘Anɛ ne nan kpe Wurubuaarɛ dɔ sa me ne?’ ”

(Imɔ ne n gyɛ yɛɛ ɔ' kpaa kpelegɛrɛ Kirisito lii Wurubuaarɛ dɔ ba de ɔ' baa mɔlɛgɛ fo.)

7“Abɛɛ ‘Anɛ ne nan kpelegɛ kpe ibuni dɔ sa me ne?’ ”

(Imɔ ne n gyɛ yɛɛ ɔ' kpaa kyu Kirisito ba de ɔ' baa mɔlɛgɛ fo.)

8Mɔ, menɛ ne a laa wɔra de a' nyɛ Wurubuaarɛ amɔlɛgɛ mɔ? Gɛnen ɔkalan mɔ ne a kpɛ a kya tɔgɛ a sa asa yɛɛ, “Fɛ' ka gyan Kirisito so, fɛ' ka gyan Kirisito so” mɔ. Wurubuaarɛ agyɛbi mɔ a kya tɔgɛ yɛɛ,

“Wurubuaarɛ ɔkalan mɔ mɛŋ bo gɛta de fɛye;

ɔ bo fɛye-nnɔ dɔ ne ɔ bo fɛye-asen dɔ.”

9Imɔ ne n gyɛ yɛɛ nengyene fo nyamesɛ fo bugi fo-gɛnɔ tɔgɛ yɛɛ

“Yesu Kirisito ne n gyɛ Wura,”

ne fo sɔɔ gyi fo-gisen dɔ

yɛɛ Wurubuaarɛ gi kyingi mɔ lii ibuni dɔ mɔ,

Wurubuaarɛ laa mɔlɛgɛ fo de fo' nyɛ mɔ asɛ gɛkyena.

10I lii fɛɛ nyamesɛ kya sɔɔ gyi mɔ-gisen dɔ daa ne

Wurubuaarɛ kya kyu mɔ yɛɛ mɔ-gisen dɔ i boran.

Ne ɔ kya kii bugi gɛnɔ tɔgɛ imɔ sa asa ne

ɔ kya nyɛ Wurubuaarɛ kya mɔlɛgɛ mɔ de ɔ' nyɛ kyena mɔ asɛ.

11Mɛ ŋmarasɛ yela Wurubuaarɛ agyɛbi ɔwolɛ mɔ dɔ yɛɛ,

“Ɔbono ɔ ka gyan mɔ so mɔ, kaasɛ maŋ gyi ipeeli.”

12Gisɔɔgyi ilaa idɛ i gyɛ gɛsintin sa Gyuda awura de asa sɛnsɛ pɛwu. I lii fɛɛ anyamesɛ pɛwu mɛ bo daa Wura kolon. Ɔkamaasɛ ɔbono ɔ saawo terɛ mɔ mɔ, ɔ laa tansi wɔra ilaa sa mɔ. 13I dɛ daa fɛɛ gɛnɔɔbono Wurubuaarɛ gi tɔgɛ mɔ-agyɛbi dɔ mɔ. Ɔ tɔgɛ yɛɛ,

“Ɔkamaasɛ ɔbono ɔ saawo terɛ Wura Wurubuaarɛ mɔ,

ɔ laa mɔlɛgɛ mɔ.”

14Nnɛ so ne anyamesɛ mɛ laa saawo terɛ isa ɔbono mɛ mɛŋ ka gyan mɔ so mɔ? Ne nnɛ so ne mɛ laa ka gyan isa ɔbono mɛ mɛŋ ti nu mɔ so kerɛ mɔ? Nengyene asa mɛ maŋ nyɛ ɔko de ɔ' tɔgɛ mɔ-ilaa sa mɔmɔ mɔ, nnɛ ne mɛ laa wɔra de mɛ' nu mɔ so? 15Nengyene Wurubuaarɛ mɛŋ lɛɛ asa sun de mɛ' tɔgɛ mɔ-ilaa sa asa mɔ, i maŋ nyɛ atɔgɛbo. I dɛ daa fɛɛ gɛnɔɔbono mɛ ŋmarasɛ yela Wurubuaarɛ agyɛbi dɔ mɔ. Mɛ ŋmarasɛ yɛɛ,

“Asa abono mɛ naa mɛ kya tɔgɛ

Wurubuaarɛ ɔkalan konkonsɛ mɔ

mɛ kya sa asa mɔ,

mɔmɔ-ginaa gibono gi tansi gi kya gyi ginsi!”

16Imɔ‑rɛ imɔ gɛnen gbaa faa, iŋ taa gyɛ asa abono pɛwu mɛ nu ɔkalan konkonsɛ baarɛ mɔ ne n laarɛ mɛ' nu ɔkalan mɔ gɛsɛ. Gɛnen so mɔ, Wurubuaarɛ ikalan ɔtɔgɛbo ɔbono mɛ kya terɛ mɔ yɛɛ Isaya mɔ gi taasɛ Wurubuaarɛ yɛɛ,

“O Wurubuaarɛ, fo-ɔkalan ɔbono a tɔgɛ faa,

anɛ ne n sɔɔ mɔ gyi ne?”

17Imɔso pɛi ne nyamesɛ laa sɔɔ ɔkalan mɔ gyi mɔ, gɛnen mɔ, o nu mɔ. Ne nyamesɛ, mɔ, laa nyɛ nu ɔkalan mɔ mɔ, gɛnen mɔ, ɔ nyɛ ɔko gi tɔgɛ Kirisito ilaa sa mɔ.

18N kya taasɛ yɛɛ imɔso Isirale awura mɔ mɛ mɛŋ ti nu gɛnen Wurubuaarɛ ɔkalan baarɛ? Mɛ ti nu! I lii fɛɛ Wurubuaarɛ agyɛbi mɔ dɔ mɔ i tɔgɛ kyu lii ɔkalan mɔ atɔgɛbo mɔ so yɛɛ,

“Mɔmɔ-ilaa tɔgɛsɛ i nu gyan gɛsinkpan gɛten kamaasɛ.

Gɛsinkpan so gɛtɛɛko iŋ san

yɛɛ asa mɛ mɛŋ nu mɔmɔ-agyɛbi tɔgɛsɛ.”

19N' kii taasɛ kee yɛɛ, “Imɔso Isirale awura mɔ mɛ mɛŋ nu Wurubuaarɛ ɔkalan mɔ gɛsɛ?” Mɛ nu mɔ gɛsɛ. Gigyangbarasɛ mɔ, Mosisi gi ŋmarasɛ Wurubuaarɛ agyɛbi ako yela yɛɛ,

Wurubuaarɛ gi tɔgɛ sa Isirale awura mɔ yɛɛ,

“Asa abono fɛye yɛɛ mɛ mɛŋ bo gikɔ dɔ mɔ,

nan mɔlɛgɛ ɔmɔ de i' nyɛ loo fɛye!

Asa abono fɛye yɛɛ mɛ mɛŋ nyi ɔlaako mɔ,

nan mɔlɛgɛ gɛnen asa mɔ de fɛ' nyɛ kyu ginyadon.”

20Isaya kee gi taalɛ da gikan tɔgɛ Wurubuaarɛ agyɛbi ako yɛɛ,

“Mɔmɔ abono nkana mɛŋ kya pɛɛrɛ ansi de mɛ' bii me mɔ,

mɔmɔ ne nan nyɛ bii me.

Nan lɛɛ me-nyoro nyiile

asa abono mɛ mɛŋ kya taa taasɛ me so mɔ.”

21Isirale awura mɔ berɛ Wurubuaarɛ gi tɔgɛ kyu lii mɔmɔ so yɛɛ,

“Gɛkɛ kamaasɛ n kpɛ mi‑i buɛɛlɛ

gisomaanu de ansiɔlon awura adɛ

yɛɛ mɛ' ba de n' kun ɔmɔ.”

Ndamu Ɣɛtɛ Siwu

© Wycliffe Bible Translators 2008

More Info | Version Index