Search form

Rom Awura 12

Fɛ' Kyu Fɛye-Nyoro Kyu Sa Wurubuaarɛ

1Imɔso me-nanboana Yesu asonbo, Wurubuaarɛ gitolon belɛ gibono ɔ bo sa aye so mɔ, n kya kolɛ fɛye: fɛ' kyu fɛye-nyoro wɔra Wurubuaarɛ abaa dɔ de owi kamaasɛ ɔbono fɛ naa mɔ, i' wɔra fɛɛ fɛ gyɛ daa mɔ-asunbi atɔ. Gɛnen ne fɛ laa lɔrɔ fɛye-nyoro yela sa Wurubuaarɛ de fɛ' gyi mɔ-ginsi. Imɔ ne n gyɛ oduduu dɔ-lɛɛ ɔson ɔbono ɔ kaaborɛ nyamesɛ o' kyu son Wurubuaarɛ mɔ. 2Fɛ mɛŋ sa fɛ' kasɛ asa abono gɛsinkpan so ilaa wolɛ ne n bo mɔmɔ-nwɔnsa dɔ mɔ. Fɛ' yɛgɛ Wurubuaarɛ ne ɔ' sa fɛye-nwɔnsa pobɔrɔ de i' kyɛɛgɛ fɛye-akyenabi. Ɔ kya kyɛɛgɛ fɛye gɛnen mɔ, fɛ laa nyɛ bii yɛɛ Wurubuaarɛ gɛlaarɛ ilaa ne n gyɛ ilaa dɛnsɛ giwɔra, ilaa ibono i kya gyi ginsi, de ilaa ibono i kya wɔra ɔdan kpaa logɛ mɔ.

3Wurubuaarɛ gi wɔra ilaa sa me ne nɛ baa bingiri mɔ-ɔsɔɔ. Imɔso n kya tɔgɛ mi‑i sa fɛye ɔkamaasɛ yɛɛ ɔ mɛŋ sa o' kyu mɔ-nyoro yɛɛ ɔ gyɛ nyamesɛ dɛnsɛ abɛɛ isa tirisɛ don gɛnɔɔbono ɔ dɛ mɔ. Fɛye ɔkamaasɛ ɔ' dɛsɛ mɔ-nyoro so de ɔ' kerɛ daa gisɔɔgyi gibono ɔkara Wurubuaarɛ gi sa mɔ mɔ de ɔ' bii nyamesɛ ɔbono ɔnan ɔ gyɛ mɔ. 4Kirisito mɔ‑rɛ mɔ-adɛ mɛ dɛ fɛɛ nyamesɛ nyoro. Nyamesɛ nyoro gi gyɛ daa ilaa kolon, yɛgɛ nmɔ dɔ mɔ i bo nten kpɛi-kpɛi nbono gi bo ilaa wɔrasɛ kpɛi-kpɛi. Gɛnen ne 5aye Kirisito asonbo mɔ kee a nyaakyɔ, yɛgɛ aye‑rɛ Kirisito ginyamesɛ kolon gibono a wɔra mɔ so mɔ, i yɛgɛ aye pɛwu a dabɔlɛ wɔra nyamesɛ kolon, ne aye dɔ ɔkamaasɛ bo no sa asa sɛnsɛ pɛwu.

6Gɛnɔɔbono nyamesɛ nyoro nten kpɛi-kpɛi gi kya kpaa abara mɔ, gɛnen kee ne Wurubuaarɛ gi kyɛɛ aye ɔkamaasɛ adawo kpɛi-kpɛi de a' kyu kpaa abara. Imɔso a' kyu amɔ kpaa abara gɛnen. Nengyene Wurubuaarɛ gi sa fo ɔko yɛɛ fo' nu mɔ-ikalan de fo' lɛɛ tɔgɛ sa asa mɔ, gɛnɔɔbono ɔkara fo sɔɔ imɔ gyi mɔ ne i kaaborɛ fo' lɛɛ tɔgɛ. 7Nengyene Wurubuaarɛ gi sa fo ɔko yɛɛ fo' kpaa fo-nanboana Yesu asonbo mɔ mɔ, kpaa mɔmɔ gɛnen. I kii i gyɛ daa Wurubuaarɛ ilaa ginyiile ne o kyu sa fo mɔ, kyu imɔ nyiile asa. 8Nengyene i gyɛ gitɔgɛ keda asa nyoro ne o kyu sa fo ɔko mɔ, tɔgɛ keda mɔmɔ-nyoro. I kii i gyɛ daa asa ayɛ giwɔra ne Wurubuaarɛ gi kyu sa fo mɔ, wɔra ayɛ lii fo-gisen dɔ. Nengyene Wurubuaarɛ yɛɛ fo' wɔra ɔgyangbarabo sa asa mɔ, wɔra gɛsun mɔ fɛɛ ɔgyangbarabo ne fo gyɛ gɛsintin. Nengyene i kii i gyɛ daa gitolon ne Wurubuaarɛ gi kyu kyɛɛ fo ɔko mɔ, bugi fo-gisen su asa so.

9Fɛ' laarɛ abara ilaa lii fɛye-asen dɔ. Fɛ' kyo ilaa nyɛnyɛn giwɔra de fɛ' wɔra ilaa dɛnsɛ. 10Fɛ' laarɛ fɛye-nanboana abono fɛye‑rɛ mɔmɔ fɛ bo Yesu ɔson mɔ dɔ ilaa fɛɛ anyibi ne fɛ gyɛ. Fɛ' buu fɛye-nanboana don gɛnɔɔbono fɛ kya buu fɛye-nyoro mɔ. 11Fɛ' nyanga ansi wɔra Wurubuaarɛ gɛsun mɔ. Fɛŋ sa fɛ' yɛgɛ fɛye-nyoro gi yɔɔ fɛye. Fɛ' bugi fɛye-gisen pɛwu daa de fɛ' son aye-Wura Yesu. 12Fɛ' kyu fɛye-ansi gyan ilaa ibono Wurubuaarɛ gi ka yela sa fɛye mɔ so de ɔkon. Nengyene fɛ bo ɔlaawusɛ dɔ mɔ, fɛ' nyɛ gisen. Fɛ' dalaa owi kamaasɛ dɔ. 13Ilaa i tiri fɛye-nanboana abono mɔmɔ kee mɛ kya son Yesu mɔ, fɛ' kpaa mɔmɔ de fɛ' bugi ansi keda asafo.

14Nengyene asa mɛ kya ka fɛye-ansi mɔ, fɛ' kolɛ Wurubuaarɛ ayuule sa ɔmɔ. Fɛŋ sa fɛ' tɔgɛ nnɔ wɔra mɔmɔ. 15Fɛ' gyi ɔkon kpaa abono mɛ kya gyi ɔkon mɔ de fɛ' kpaarɛ ansikyu kpaa abono mɛ kya su mɔ. 16Fɛ' wɔra gɛnɔ kolon. Fɛŋ sa fɛ' nyiile fɛye-nyoro. Fɛŋ sa fɛ' lɛɛ ansi yɛgɛ abono asa mɛŋ kya buu yɛɛ mɛ gyɛ asa gbaa' ako mɔ. Fɛŋ sa fɛ' kyu fɛye-nyoro yɛɛ fɛye ne n nyi ɔlaako.

17Nengyene ɔko gi wɔra fo ɔko ilaa nyɛnyɛn mɔ, gɛŋ sa fo' kyu ilaa nyɛnyɛn ka mɔ gikɔ. Fɛ' kerɛ de fɛ' wɔra ilaa ibono ɔkamaasɛ laa wu yɛɛ i boran mɔ. 18Fɛ' wɔra fɛye-lɛɛ abaa ɔkara de fɛ' kyu gisen yuuli kyena de nyamesɛ kamaasɛ. 19Me-kyɛmenɛana adɛnsɛ, nengyene ɔko gi wɔra fɛye ɔko ilaa nyɛnyɛn iko mɔ, kaasɛ ɔŋ sa ɔ' ka mɔ imɔ gikɔ. Ɔ' yɛgɛ Wurubuaarɛ ne ɔ' biidɛ mɔ-giso. I lii fɛɛ i bo Wurubuaarɛ agyɛbi dɔ yɛɛ,

“Me ne n kya biidɛ ilaa nyɛnyɛn awɔrabo giso.

Me ne nan ka ilaa nyɛnyɛn giwɔra gikɔ.

Me Wurubuaarɛ ne n tɔgɛ gɛnen.”

20I kii i bo Wurubuaarɛ agyɛbi dɔ gɛtɛɛko kee yɛɛ,

“Nengyene akon a dɛ fo-ɔkyobo mɔ, sa mɔ agyudɔ de o' gyi.

Nengyene bolefɔ dɛ mɔ mɔ, sa mɔ nkyu de o' nun.

Fo kya wɔra gɛnen ilaa idɛ pɛwu fo kya sa fo-ɔkyobo mɔ,

i kya wɔra fɛɛ ɔgya de agyangbalii ne fo kya kuu

fo kya bun mɔ-gimu so gɛnen.”

21Fɛ mɛŋ sa fɛ' yɛgɛ ilaa nyɛnyɛn i' gyi fɛye so. Fɛ' wɔra ilaa dɛnsɛ de i' yɛgɛ fɛ' nyɛ ɔlon ilaa nyɛnyɛn giwɔra so.

Ndamu Ɣɛtɛ Siwu

© Wycliffe Bible Translators 2008

More Info | Version Index