Search form

Rom Awura 13

Fɛ' Bara Fɛye-Nyoro Gɛsɛ Sa Abɛyin Abelɛnsɛ

1Fɛye ɔkamaasɛ ɔ' bara mɔ nyoro gɛsɛ sa mɔ-abɛyin abelɛnsɛ. I kya nyiile yɛɛ iŋ gyɛ Wurubuaarɛ so mɔ, mɔmɔ ɔko‑rɛ ɔko maŋ nyɛ gɛnen gɛbelɛnsɛ gɛbono. Wurubuaarɛ ne n yela mɔmɔ. 2Imɔso fo ɔbono fo kine yɛɛ fo maŋ nu fɛye-abɛyin abelɛnsɛ gɛdɛ mɔ, ilaa ibono Wurubuaarɛ gbaa-gbaa gi yela mɔ ne fo kine gɛnen. Imɔso fo laa nyɛ imɔ so gisobiidɛ. 3Ilaa dɛnsɛ awɔrabo mɛŋ kya selɛ abelɛnsɛ abono mɛ kya kerɛ nbara gigyi so mɔ. Ilaa nyɛnyɛn awɔrabo ne n kya selɛ gɛnen abelɛnsɛ abono. Fɛŋ kya laarɛ fɛ' wu mɔmɔ de i' ŋmaa fɛye-asen mɔ, fɛ' wɔra ilaa dɛnsɛ. Fɛ wɔra ilaa dɛnsɛ mɔ, fɛ laa nyɛ de abelɛnsɛ mɔ mɛ' yen fɛye. 4Ɔbelɛnsɛ ɔbono ɔ kya kerɛ nbara gigyi so mɔ gyɛ Wurubuaarɛ osunbo ɔbono Wurubuaarɛ ne n lɛɛ mɔ yɛɛ ɔ' kpaa fɛye. Nengyene ilaa nyɛnyɛn ne fɛ wɔra mɔ, fɛ wu mɔ mɔ, i kaaborɛ i' ŋmaa fɛye-asen. I kya nyiile yɛɛ iŋ gyɛ giyan so ne ɔ bo ɔlon fɛye so. Ɔ gyɛ Wurubuaarɛ osunbo ɔbono ɔ yelɛ Wurubuaarɛ giyaa dɔ de ɔ' biidɛ ilaa nyɛnyɛn awɔrabo giso ka gikɔ. 5Imɔso i kaaborɛ ɔkamaasɛ ɔ' bara mɔ-nyoro gɛsɛ sa abɛyin abelɛnsɛ. I mɛŋ gyɛ gisobiidɛ gibono fɛ laa nyɛ mɔ wolɛ so. Gɛnɔɔbono fɛ laa bii fɛye-gisen dɔ yɛɛ fɛ wɔra ilaa ibono i boran mɔ kee so mɔ, fɛ' bara fɛye-nyoro gɛsɛ sa abɛyin abelɛnsɛ.

6Gɛnen ilaa ibono kee so mɔ, too-too ɔbono abɛyin laa yela yɛɛ fɛ' too mɔ, fɛ' too. I kya nyiile yɛɛ i tiri yɛɛ abɛyin abelɛnsɛ mɛ' kpɛ mɛ kya wɔra gɛsun gɛbono Wurubuaarɛ gi kyu wɔra mɔmɔ-abaa dɔ mɔ. 7Ilaa ibono i kaaborɛ fɛ' wɔra sa ɔkamaasɛ mɔ, fɛ' wɔra imɔ sa mɔ. I gyɛ too-too ne fɛ laa too daa‑o, lɛnpoo ne i gyɛ daa‑o, fɛŋ sa fɛ' gbigbili gimu. Ne i gyɛ buubuu ne i kaaborɛ fɛ' kyu sa ɔko mɔ, fɛ' kyu buubuu sa kaasɛ. I gyɛ nyisigyi ne i kaaborɛ ɔko ɔ' nyɛ lii fɛye asɛ mɔ, fɛ' kyu nyisigyi sa mɔ.

Fɛ' Laarɛ Abara

8Fɛŋ sa fɛ' keda ɔko gikɔ. Fɛ' kyu too fɛye-nyoro so daa yɛɛ fɛ laa laarɛ abara ilaa fɛɛ gɛnɔɔbono nyamesɛ dɛ gikɔ ne ɔ kya laarɛ ɔ' ka gimɔ mɔ. I lii fɛɛ ɔbono ɔ kya laarɛ mɔ-nanbo nyamesɛ ilaa mɔ, gɛnen kaasɛ ɔbono kya gyi Wurubuaarɛ nbara mɔ pɛwu so ne. 9Nbara mɔ nko ne n gyɛ yɛɛ, “Gɛŋ sa fo' lii fo-ka abɛɛ fo-kuli gɛmara laarɛ ɔko; gɛŋ sa fo' mɔɔ isa; gɛŋ sa fo' yuuri; gɛŋ sa fo' yɛgɛ fo-ansi a' pɛɛrɛ ɔko ilaa so.” Gɛnen nbara ndɛ de nsɛnsɛ mɔ pɛwu gi kya yii daa de nbara kolon so yɛɛ, “Laarɛ fo-nanbo fɛɛ fo-nyoro.” 10Fo nyamesɛ fo kya laarɛ fo-nanbo mɔ, fo maŋ wɔra mɔ ilaa nyɛnyɛn. Imɔso fo ɔbono fo kya laarɛ fo-nanbo nyamesɛ ilaa mɔ, fo kya gyi Wurubuaarɛ nbara mɔ pɛwu so ne.

11Fɛ' wɔra gɛnen ilaa ibono nɛ tɔgɛ faa. I lii fɛɛ fɛ nyi aberɛ abono dɔ a bo faa. Fɛɛ fɛ dɛ mɔ, fɛ' kyingi. Lii gɛkaabono a daa gikagyan Yesu so mɔ, gɛkɛ kamaasɛ gɛ kya kɔɔgɛ nkɛ nbono gi san de Wurubuaarɛ ɔ' mɔlɛgɛ aye de a' nyɛ mɔ asɛ gɛkyena mɔ. 12Gɛdɛ gɛ kya laarɛ gɛ' kɛ kon. Imɔso a' taa ilaa nyɛnyɛn ibono gibiri dɔ awura mɔ mɛ kya wɔra mɔ yɛgɛ. A' wɔra ilaa dɛnsɛ fɛɛ asa abono gɛdɛ gɛ kɛ ɔmɔ mɔ. Aye-idɛnsɛ giwɔra i' wɔra fɛɛ adontɔ ne a dɛ a kya kyu kun aye-nyoro lii ilaa nyɛnyɛn giwɔra dɔ.

13Aye-akyenabi a' wɔra ɔdan fɛɛ asa abono gɛdɛ gɛ kɛ mɔmɔ, ne mɛ taa gibiri dɔ ilaa wɔrasɛ yɛgɛ mɔ. A mɛŋ sa a' wɔra asa abono mɛ kya gyan' wɔra ilaayan, abɛɛ a' wɔra nta aboobo, abɛɛ a' laarɛ agyibara, abɛɛ a' wɔra ilaa ibono iŋ gyɛ iwɔrasɛ mɔ. A mɛŋ sa a' laarɛ gɛluu abɛɛ a' yɛgɛ aye-nanboana ilaa i' wɔra aye gɛlaaloo. 14Fɛ' yɛgɛ Wura Yesu Kirisito ɔ' wɔra fɛɛ fɛye-ngbɛ suusɛ de fɛŋ sa fɛ' sa fɛye-ɔbolɛ gɛlaarɛ ilaa ɔkpa de i yɛgɛ fɛ' wɔra ilaa nyɛnyɛn.

Ndamu Ɣɛtɛ Siwu

© Wycliffe Bible Translators 2008

More Info | Version Index