Search form

Taatusi 2

Aye-Gɛsintin Ilaa Nyiilesɛ

1Fo berɛ, nyiile Yesu asonbo mɔ de mɛ' wɔra daa ilaa ibono i laa kyena de aye-gɛsintin ilaa nyiilesɛ mɔ. 2Tɔgɛ sa anyen abono mɛ ten ansi mɔmɔ dɔ mɔ yɛɛ mɛ' wɔra asa abono mɔmɔ-nwɔnsa gi dɛ. Mɛ' taalɛ mɔmɔ-nyoro. Asa mɛ' wu mɔmɔ-gidebi de mɛ' kyu buubuu sa ɔmɔ. Mɛ' ka gyan Yesu so de mɛ' laarɛ asa ilaa de mɛ' nyɛ gisen ilaa kamaasɛ dɔ, fɛɛ gɛnɔɔbono aye-ilaa nyiilesɛ i kya nyiile mɔ. 3Gɛnen kee ne, tɔgɛ sa akyiinyi abono mɛ bo mɔmɔ dɔ mɔ yɛɛ mɛ' kyu gisen dɛnsɛ de buubuu kyu kyena. Mɛ mɛŋ sa mɛ' naa mɛ kya kuli asa abɛɛ mɛ' wɔra asa abono nta ginun gi kya gyi ɔmɔ-amu. Mɛ' nyiile abolonbu abono mɛ bo ɔmɔ dɔ mɔ ilaa dɛnsɛ giwɔra. 4Mɛ' nyiile ɔmɔ de mɛ' laarɛ mɔmɔ-kuliana de mɔmɔ-biana ilaa. 5Mɛ' nyiile ɔmɔ de mɛ' taalɛ mɔmɔ-nyoro, mɛŋ sa mɛ' wɔra ilaayan. Mɛ' wɔra akyii denabo dɛnsɛ de mɛ' nu mɔmɔ-kuliana gɛdɛ. Mɛ' wɔra gɛnen ilaa dɛnsɛ idɛana pɛwu de mɔmɔ-akyenabi a mɛŋ sa a' yɛgɛ ɔko ɔ' nyɛ ilaa nyɛnyɛn iko tɔgɛ kyu lii Wurubuaarɛ ɔkalan mɔ so.

6Adega mɔ mɔ, tɔgɛ sa ɔmɔ kee yɛɛ mɛ' keda mɔmɔ-nyoro ilaa kamaasɛ dɔ. 7Fo gbaa-gbaa mɔ wɔra idɛnsɛ de asa mɛ' nyɛ wu kasɛ. Fo laa nyiile asa ilaa mɔ, nyiile ilaa kamaasɛ lii fo-gisen dɔ. Gɛŋ kyu sɛi seeli. 8Agyɛbi abono fo laa tɔgɛ mɔ a' wɔra agyɛbi abono asa mɛ maŋ sɔɔ amɔ so akyɔɔlɛ. Wɔra ilaa idɛ pɛwu gɛnen de i' wɔra aye-akyobo mɔ ipeeli gɛnɔɔbono mɛ maŋ nyɛ ilaa nyɛnyɛn iko tɔgɛ kyu lii aye so mɔ.

9Abono mɛ tɛ awura asɛ mɔ, nyiile ɔmɔ yɛɛ mɛ' nu mɔmɔ-wuraana gɛdɛ ilaa kamaasɛ dɔ. Mɛ' wɔra ilaa ibono i laa gyi mɔmɔ-wuraana ginsi. Mɛŋ sa mɛ' tɔngɛ de mɔmɔ-wuraana 10abɛɛ mɛ' wɔra gɛbaawɔra. Mɛ' gyi gɛsintin sa mɔmɔ-wuraana ilaa kamaasɛ dɔ. Mɛ' kyena de mɔmɔ-wuraana kanpɛ de asa mɛ' wu yɛɛ Wurubuaarɛ aye-ɔmɔlɛgɛbo mɔ ilaa nyiilesɛ mɔ i boran.

11I kya nyiile yɛɛ Wurubuaarɛ gɛwɔnsa dɛnsɛ gɛbono ɔ kya sa aye so mɔ gɛ ti lii gɛwi. Imɔ ne n gyɛ yɛɛ o sun Kirisito de ɔ' mɔlɛgɛ aye anyamesɛ pɛwu lii aye-ilaa nyɛnyɛn giwɔra dɔ. 12Wurubuaarɛ gɛwɔnsa dɛnsɛ gɛdɛ ne n kya yɛgɛ ne ɔ kya bela aye. Ɔ kya nyiile aye yɛɛ a' taa ilaa ibono mɔ Wurubuaarɛ kya kyo mɔ giwɔra yɛgɛ de aŋ baa yɛgɛ gɛsinkpan gɛdɛ so ilaa i' gyi aye-amu. A' yɛgɛ aye-ansi a' dɛ, a' gyi gɛsintin sa Wurubuaarɛ, de a' selɛ mɔ owi ɔbono a san a bo gɛsinkpan so faa. 13A tɛ gɛnen gɛkyena mɔ mɔ, aye-nwɔnsa gi gyan gɛkaabono Yesu Kirisito aye-gitɔbelɛ de aye-ɔmɔlɛgɛbo mɔ laa ba gɛsinkpan so de mɔ-nyisigyi ɔ' lii gɛwi mɔ. 14Mɔ Yesu gbaa-gbaa ne n kyu mɔ-nkpa fuɛ sa aye ka gikɔ de ɔ' lɛɛ aye lii ilaa nyɛnyɛn giwɔra pɛwu dɔ. O kyu mɔ-nkpa fuɛ sa aye gɛnen de ɔ' lɔrɔ aye yela sa mɔ-nyoro yɛɛ a' wɔra mɔ-wolɛ asonbo abono mɔmɔ-asen a fuuli ne ilaa dɛnsɛ giwɔra wolɛ ne n kpɛ i gyan mɔmɔ-ansi so mɔ.

15Kyu ilaa ibono nɛ nyiile fo gɛrɛ mɔ pɛwu nyiile Yesu asonbo mɔ. Kyu gɛnsipɛɛrɛ tɔngɛ de mɔmɔ de fo' gya mɔmɔ lii mɔmɔ-ilaa nyɛnyɛn giwɔra dɔ. Yelɛ fo-gɛbelɛnsɛ gɛbono fo kya gyi mɔ so ken-ken. Gɛŋ sa fo' yɛgɛ de ɔko ɔ' kerɛ fo ta.

Ndamu Ɣɛtɛ Siwu

© Wycliffe Bible Translators 2008

More Info | Version Index