Search form

Ibrani 1

Alla Ilepa kai tamata baue Yesuse

1:1-3

1Kena akmenare Alla Ilepa rebai boka kai iteki ntuana menaru baue nabiaru. Rebai sesi Ilepa kaise Ilepae aturane, rebai sesi Ilepa loko Italuke, rebai sesi Iono tanda herane kai cara mamakete lekwe. 2Po pamuli meije rebe lau mo nusare koho nere Ilepa kai ite baue Eni Nanare. Alla Itolae nusare kai pusue taneiaru baue Eni Nanae mere. Kai Alla Iteu peneka be pusue taneiaru Eni Nanae mere Enie. 3Eni Nanae mere pine Iaseluke be Alla Eni kbasare ela titinai. Eni atate sakesa kai Alla ruaIje neka. Ile lekwe pine Iraka nusare kai pusue yelu mei nusa meije kena Eni lepate rebe esi kbasare ktili titinaije, leke atia yake. Kena Iampune iteki dosaru peneka, pine Irue kena otoi maka kbasa ndete surgare, sapleuke Alla Maka Kbasa elake titinaije Eni makwanale.

Yesuse Eni kbasare ela lesi bei malekate

1:4-14

4Alla Eni Nanae mere Isupu kbasa elake titinai, lesi bei malekate, kai Alla Iono Eni nane mere esupu holmate titinai, lesi bei Iono malekate eni nane.

5Alla Ibeteke loko malekate mo po Ibeteke loko Eni Nanare be,

“Ale Auku Anae.

Bei petu meije Aure Amamu.”+

Kai Ibeteke lekwe be,

“Au meije AmaI, kai Auku Anae kenaI.”+

6Kai kena Alla Iulake Eni Nanae menare Ilomei nusa meije+, Iombe,

“Auku malekata,

suke pusumi tatu loko Auku Anae meije.”+

7Kai kena malekataru, Alla Ibeteke be,

“Au ulake malekataru esi tapa Au

saka balate ehbuere

kai saka auwe klitine.”+

8Po Alla Ibeteke loko Eni Nanae mere be,

“Ale Alla, Apleta saka Kamale rame eti pela.

Apleta kena nkenale kai Alemake mo.

9Asuka rebe nkenale titinai,

kai lalemu tiake rebe tiare.

Bei mere hoko Amu Alla Ibitike Ale

kai Iono Asupu holmate bei tamata,

kai lalesi ndina

le Alere elesi bei Amu ebearu.”+

10Alla Ibeteke loko Eni Nanare lekwe be,

“Ale Tuhane, kena menaije Atolae nusare,

kai Ale ruaMu tolae lanite.

11Pusue meru namake atialu kai umalabai

saka pakiane,

po Ale, Ara me rame.

12Nusare kai pusue rebe mei nusare

namake Alouke saka lapune

rebe malabai peneka,

kai Aselie kena makete.

Po Ale, Aleli kwale mo,

kai Amu nasite pusu moneka.”+

13Alla Ibeteke loko malekate mo po Ibeteke loko Eni Nanare be,

“Arue sapleuke Auku makwanale,

eti Au ono Amu musuaru

esi tatu lokoMu.”+

14Ele mere hoko esi tinaije malekataru saisa? Malekataru Alla Eni roa rebe esi layani Allare, kai esi supu ulake bei Alla kena tapa tamata rebe esi supu hlamate.

Janji beluke

© 2012, Wycliffe Bible Translators, Inc. All rights reserved. More Info | Version Index