Search form

Lok 1

1Kin Teopil (Théophile) ka kitci apitendagozian kidojibiamon. Mane a8iagog ogi k8ag8e ojibiana8a adi ka pi iji8ebiziag nina8itinakag. 2Ogi ojibiana8a ka pi iji kikinoamago8adjin ini8e ka pi 8abadamindjin ockadok kagi iji8ebanig, kagi anonagani8indjin kidji tibadjimondjin Kije Manidon omin8adjimo8ini. 3Nogom dac 8e8enda nigi nanada8i kikendan kakina adi ka pi iji8ebag. Nigi inendan dac kada min8acinoban oo8e kidji ojibiamonan, 4kidji gi ketcinamendaman kekin e teb8emagag ii kagi pi kikinoamago8an.

Pejig ajeni tibadjimo kidji nta8igindjin Cabadisan (Jean-Baptiste)

5Meg8adj Herod e ogima8igobanen Coda (Judée) akikag, tegoban iima pejig Coda8inni aiamie ogima Zakani (Zacharie) e ijinikazogobanen, mi aa8e pejig igi8eni8ag Abiabanikag ka iji tibendagozi8adj, 8eckadj kagi aiamie ogima8igobanen. Sabet (Élisabeth) dac ijinikazonigoban Zakani okokomiman. Kitci aiamie ogima Eraniban (Aaron) iji odaiagiziban ke8in Sabet. 6Eji niji8adj ok8aiak8abamigo8agoban Kije Manidon. Kitci 8e8enda onadotana8a8abanin kakina ka Tibendjigendjin odinakonige8inan acitc kakina adi kagi iji 8idamagendjin Kije Manidon kidji todjigadenig. 7Anic dac ka8in odabinodjijimisibanig, Sabet mega ki ijigigoban ega kidji aia8adjin abinodjijan, acitc aja kitci anicinabe8ibanig Sabet acitc Zakani.

8Nigodin Zakani otaji anokita8abanin Kije Manidon e aiamie ogima8idj. 8intami8a mega ijinag8aniban kidji aiamie8adj, igi8eni8ag Abiabanikag ka iji tibendagozi8adj, 8eckadj kagi aiamie ogima8igobanen. 9Aiamie ogimag 8ikobidjigadenibanin ako o8izoni8an pejig e taci8adj kidji pidigedj ka Tibendjigedj okitci aiamiemigi8amikag acitc ka minomatenig aiamie pig8ini kidji iji ick8azag. Ii dac apitc, Zakani ki onabamagani8igoban. 10Meg8adj dac e ick8azamogobanen ka minomatenig aiamie pig8ini, kakina a8iagog kagi ma8adjiidi8apan ag8adjik aiamiebanig.

11Zakani dac ogi 8abaman ka Tibendjigendjin pejig odajenimini, e tajigaba8indjin okitcinikikag ineke kitcit8a 8isini8aganikag taji ka iji ick8azigadenig ka minomatenig aiamie pig8ini. 12Apitc dac Zakani ka 8abamadjin, ki kitci kock8endam acitc ki kitci segizigoban. 13Ini dac ajenin ogi 8idamagon: “Zakani, ka8in segiziken. Kije Manido mega ogi nodan kidaiamie8ini. Sabet kikokomim oga nta8igian kig8izisan. John kiga ijinikana. 14Maiagotc kiga kitci sogi min8endan, acitc mane a8iagog kada modjigendamog apitc nta8igindjin. 15Aa8e mega kig8izis oga kitci inenimigon ka Tibendjigendjin. Panima ega 8ikad kidji minik8edj cominaboni kek8an ka macka8agaminig. Mizi8ena oga pidigeckagon Mino Manidon teci8ag ki ick8a nta8igidj. 16Oga 8idjian mane Israel a8iagon kidji gi koki teb8eta8andjin ka Tibendjigendjin Okije Manidomi8an. 178in nitam kada pi tibadjimo, ab8amaci tag8icinindjin ka Tibendjigendjin. Tabickotc 8eckadj niganadjimo8inni Eli kagi kitci macka8izidj e 8idjiigodjin Mino Manidon, mi pejig8an ke ijinagozidj kig8izis. Oga 8idjian naben kidji koki sagiandjin odabinodjijimini, acitc oga 8idjian ini8e ega ka ndota8andjin Kije Manidon kidji gi kagita8endamindjin, midac kidji k8aiak8adizindjin. Mi ke todag kig8izis, a8iagog kidji gi ick8ata8adj apitc pi tag8icinindjin ka Tibendjigendjin,” ki ikido8an ini ajenin.

18Zakani dac ogi inan ajenin: “Adi ke odji kikendaman ii8e teb8e kidji iji8ebag? Nin nikitci comisi8inan, acitc nikokomim ke8in aja kitci kokomi8i.”

19Ajeni ogi nak8e8ajian: “Nin Gabriel, kabe nidanokita8a Kije Manido. Nigi pidjinijaog kidji aiamiinan acitc kidji pidamonan oo8e min8adjimo8in. 20Ndotan! Teb8e kada odjitcise kagi ininan kidji iji8ebag. Anic dac ka8in kidodji teb8etasinan nidikido8inan. Mi ke odji ega nta8ean, acitc ka8in kiga kackitosin kidji anim8ean pinici ini8e kegonan kidji iji8ebagin,” ki ikido.

21Meg8adj dac ii apitc, kakina a8iagog ag8adjik ka te8apan otaji pia8abanin Zakanin. Ki kitci mamakadendamobanig kitci kin8ej e tanedindjin pidigamig. 22Apitc ka sagaag, ka8in ododji kackitosinagoban kidji anim8edj. Ogi nisidotana8a dac egi ijinamindjin Zakanin pidigamig kitci aiamiemigi8amikag. Motci mamadjinikebaniobanin acitc ka8in nta8esibanin.

23Apitc Zakani ka ick8atadj egi mikimodj aiamiemigi8amikag, ki ki8e. 24Kegapitc okokomiman Sabetan ki kigicka8asonigoban. Nanokizis inigik ka8in odji sagaasi omigi8ami8akag aa8e Sabet. 25Ki ikido: “Ka Tibendjigedj nigi kitci kidimagenimig. Ka8in 8ikad mina8adj a8iagog kegoni nigagi odji igosig ega egi pi odabinodjijimi8ag.”

Pejig ajeni pi tibadjimo kidji nta8igindjin Jesosan

26Apitc nigod8asokizis inigik Sabet e ani kigicka8adjin ini abinodjijan, Kije Manido ogi ijinija8an odajeniman, Gabriel ka ijinikazondjin, pejig odenakag Nazaret ka ijinikadenig Galilee akikag. 27Ogi ijinija8an pejig ockinigik8ekag, Mani ka ijinikazondjin. Aja Mani ki inaco8anagani8igoban kidji 8idigemadjin pejig naben, Josep ka ijinikazonigobanen, ogima Davidiban odanike ojisan. 28Midac aa ajeni ki pidige adi eji tenipanin Manin acitc ogi inan: “Kidanamikon! Ka Tibendjigedj kigi kitci ca8enimig acitc ki8idjiog!”

29Mani ki kitci kock8endam e nodag ii, acitc ki mamidonendam adi 8a ikidomaganig ajeni odanamikage8in. 30Ini dac ajenin ogi igon: “Mani, ka8in segiziken. Teb8e Kije Manido kica8enimig. 31Abinodjij kiga kigicka8a. Kiga og8izisinan, acitc dac Jesos kiga ijinikana. 32Kada kitci apitendagozi acitc Kije Manido ma8adji ka icpendagozidj Og8izisan kada ijinikanagani8i. Kije Manido ka Tibendjigedj oga minan kidji ogima8indjin tabickotc Davidiban, 8eckadj okitci anicinabembanin. 33Kagige kada ogima8i Israel a8iagokag. Ka8in dac 8ikad kada poni ogima8isi,” ki ikido ajeni.

34Mani dac ogi inan ajenin: “Ka8in maci ni8idji tajikemasi nabe, adi dac kegi odji iji8ebizian iidi?”

35Ajenin dac ogi nak8e8ajiigon: “Mino Manido kiga pidigeckag, acitc ma8adji ka icpendagozidj Kije Manido kiga minig omacka8izi8in. Mi ke odji kitcit8a8izidj aa abinodjij ke nta8igidj, acitc Kije Manido Og8izisan ke odji ijinikanagani8idj. 36Ndotan! Kitcina8emagan Sabet ke8in kigicka8aso, ockina8esan opian. Aja kitci kokomi8i. Ikidonani8anoban ega 8ikad kidji odabinodjijimidj. Misa8adj dac, nogom aja nigod8asokizis8ezi8an e kigicka8adjin. 37Ka8in mega kegoni op8ana8itosin Kije Manido.”

38Misa Mani ki ikido: “Ka Tibendjigedj nidanokita8a. 8egona todaojidj Kije Manido ii ka ikido8an.”

Midac ka iji naganigodjin ajenin.

Mani onadaodeoman Sabetan

39Ka8in kin8ej ka ick8a 8abamadjin ajenin, Mani ki madja, kitci kijika e ijadj pejig odenakag, ka iji pik8adina8anig Coda (Judée) akikag. 40Zakani omigi8amikag ki iji tag8icin, Sabet ocomisimikag. Ki pidige, acitc ogi anamika8an Sabetan. 41Apitc Sabet e nodag e anamikagodjin Manin, ki odji mamadji8an ka kigicka8adjin otcidjiciman. Sabet dac ogi pidigeckagon Mino Manidon. 42Ogi inan dac Manin, e kitci kiji8edj: “Kakina e taci8adj ik8e8ag kin a8acamej Kije Manido kica8enimig, acitc oca8eniman ini abinodjijan ka kigickaomadjin. 43Ka Tibenimijidj odjodjoman nipi odisig. Nikitci mina8azinan dac! 44Apitc ka nodaman e anamikaojian, abinodjij ka kigicka8ag ki odji mamadji epitci mina8azidj. 45Kica8endagozinan! Kigi teb8etan ka ikidopan Kije Manido kidji iji8ebanig.”

Mani onigamo8in

46Mani dac ki ikido:

“Nidjitcagoc odicpeniman ka Tibendjigendjin,

47acitc Kije Manido ka Ag8acimijidj niminig

kidji kitci modjigendaman.

48Nigi mik8enimig mega,

nin odanodaganik8eman ka tabasendizondjin.

Apanigotc dac kakina a8iagog ke ani aianike nta8igi8adj

kada ikido8ag egi kitci ca8enimijindjin Kije Manidon.

49Kije Manido mega, 8in ma8adji ka macka8izidj,

ka kitci mamakadendag8anigin kegonan

ogi todanan nin odji.

Kitcit8a8endag8ani o8izon.

50Apanigotc okije8anan kakina a8iagon ka manadjiigodjin.

51Odojitonan ka kitci mamakadendag8anigin kegonan

kidji 8abadai8edj omacka8izi8in.

Odobenija8an a8iagon ka kitci kitenimondjin.

52Ota8ebicka8an kitci ogiman

acitc odapitendagozian ini8e ka kidimagizindjin.

53Kitci mane mino kegonan ominan a8iagon ka ka8askadendjin,

acitc otoja8an ka kitci oconiamindjin

ega kegonan kidji aiamindjin.

54-55O8idoka8an Israel a8iagon, ka anokitagodjin.

Ka8in odji 8anikesi apanigotc kidji mino toda8adjin

Abanaaman (Abraham) acitc kakina odanike ojisini,

mi mega ka inagobanen 8eckadj kikitci anicinabeminabanin.”

Mi ka ikidodj Mani.

568aiej nisokizis Mani ogi 8idji tajikeman Sabetan. Kegapitc dac ki koki ki8e.

Ka nta8igidj Cabadis (Jean-Baptiste)

57Aja ijiseniban kidji nta8igindjin Sabet odabinodjijiman, ki og8izisi dac. 58A8iagog pecodj ka tajike8adj Sabetikag acitc otcina8emaganan ki nodage8an ka Tibendjigendjin egi kitci mino todagodjin, kakina dac ogi 8idji modjigendamoma8an.

59Apitc ini abinodjijesan ka pejigota8ate8ezindjin, kakina mina8adj ki tag8icinog kidji pak8ej8agani8indjin. Onada8enima8abanin odadaman o8izoni “Zakani” kidji ijinikazondjin ini abinodjijan. 60“Ka8in” dac ki ikido8an odjodjoman. “ ‘John’ kada ijinikazo.”

61Ki inagani8i dac: “Ka8in a8iag iidi ijinikazosi kitcina8emaganikag.”

62Ogi k8ag8edjima8abanin dac ka iji odadamindjin e mamadjinik8ebanio8adj, kidji kikendamo8adj adi 8a ijinikanadjin odabinodjijiman. 63Zakani dac ki k8ag8ed8e kegoni kidji iji ojibiigedj acitc mi oo8e ka ojibiag: “ ‘John’ ijinikazo.” Midac kakina a8iagog ki kitci mamakadendamog. 64Teci8ag dac Zakani ogi kackiton kidji koki anim8edj, acitc teci8ag ogi icpeniman Kije Manidon. 65Kakina dac a8iagog pecodj ka tajike8adj ki kitci segizi8ag, acitc mizi8e ka iji pik8adina8anig Coda (Judée) akikag ki nodagani8ani adi ka pi iji8ebag. 66Kakina a8iagog ka nodage8adj e ikidonani8anig ki mamidonendamog, acitc ki k8ag8ed8e8ag: “Adi ke ani iji8ebizidj aa abinodjij?” Ki paietenag8ani mega ka Tibendjigendjin omacka8izi8ini e 8idjiogodj aa8e abinodjij.

Zakani ka niganadjimodj

67Zakani, aa abinodjij odadaman, Mino Manidon ogi pidigeckagon acitc ki niganadjimo oo8e:

68“Icpenimik ka Tibendjigedj,

mi aa Israel a8iagog Okije Manidomi8an.

Ogi pi ag8aciman mega odanicinabeman.

69Kigi pidjinijaamagonan a8ian e kitci macka8izindjin

kidji ag8aciminak.

8in odanodaganan kitci ogiman David, odaiagizi aa a8iag.

70Aja 8eckadj oo8e kagi pi tibadjimogobanen Kije Manido,

e abadjiadjin okitcit8a niganadjimo8inniman.

71Teb8e Kije Manido ki ikido kidji nagadjiigo8ak,

ega kidji gi madji todago8ak igi8e ka 8i miganigo8ak

acitc igi8e ka kitci madjenimigo8ak.

72Ki ikido kidji kidimagenimadjin

8eckadj kikitci anicinabeminabanin,

acitc kidji mik8endag okitcit8a nakomo8in.

73Kije Manido teb8e ogi inan Abanaaman (Abraham),

8eckadj kikitci anicinabeminaban,

74kidji 8idjiinak, ega kidji madji todago8ak

igi8e ka madjenimigo8ak,

midac kidji gi anokita8aiak ega kidji tajinijiak,

75midac kidji paiekideeiak acitc kidji k8aiakoziak

inigik ke pimadiziak e anokita8aiak.

76Kin dac, nidabinodjijim,

‘Kije Manido ma8adji ka icpendagozidj oniganadjimo8inniman’

kiga ijinikanigo.

Ab8amaci pi tag8icig ka Tibendjigedj,

kin nitam kiga tibadjimonan,

kidji 8idama8ad8a a8iagog kidji eco8i8adj

kidji tag8icinindjin ka Tibendjigendjin,

77acitc kidji 8idama8ad8a ka Tibendjigedj odanicinabeman

kidji pi ag8acimadjin e kasiama8adjin opatado8ini8an.

78Kikije Manidominan mega kitci minodee acitc kitci kije8adizi.

Kina8it odji Kije Manido 8edji ki pidjinijaag 8asea8ini

8ak8ig ka odjimaganig,

tabickotc ako ka mokaag kizis ka ijinag8anig,

79misa kidji 8aseanig a8iagog ka iji kacki tibikanig ka te8adj,

ka kotamo8adj kidji nibo8adj,

acitc kidji kikinoamaonak adi ke todamak

kidji pimadiziak pekadendamo8inikag.”

Mi ka ikidodj Zakani.

80Misa ki ani obigi aa abinodjij, acitc mane ogi ani nisidotan kegoni, eckam e ani kitci k8aiak8adizidj. Ki tajike pig8adakamigokag pinici kidji odjitcisenig kidji kikenimagani8ipan Israel a8iagokag.

Kije Manido Odikido8in: Ocki Mazinaigan

Algonquin New Testament © 1998 Canadian Bible Society

More Info | Version Index