Search form

Lok 3

Adi Cabadis ka iji paba kagik8edj

(Inabin acitc Matio 3.1-12; Mak 1.1-8; John 1.19-28)

1Aja midatcin acitc nanopibon inigik ma8adji e kitci ogima8ipan aa Tipirias (Tibère). Iima dac Coda (Judée) akikag, Pons Pilat (Ponce Pilate) kitci ogima8iban. Iima Galilee akikag, Herod (Hérode) kitci ogima8iban. Pilip (Philippe), Herod o8idjiki8en, Itoria (Iturée) acitc Tarakonitis (Trachonite) akikag iji kitci ogima8ibanin. Iima Abilin (Abilène) akikag, Lisanias (Lysanias) kitci ogima8iban. 2Annas (Anne) acitc Kaiapas (Caïphe) aiamie ogima8ibanig ma8adji ka niganizi8adj. Mi ii apitc Cabadis (Jean-Baptiste), Zakani (Zacharie) og8izisan, ka odisigodjin Kije Manidon odikido8inan meg8adj pig8adakamigokag ka tegobanen. 3Cabadis dac ki paba ijagoban mizi8ena 8ajagam Jourdain sibini. Paba kagik8egoban oo8e: “An8endizok acitc sigaadazok. Midac Kije Manido kiga kasiamago8a kipatado8ini8an.”

4Mi ka ijisenig adi niganadjimo8inni Isaia kagi iji ojibiamogobanen omazinaiganikag:

“A8iag kada tag8icin kidji pabibagidj pig8adakamigokag.

Mi oo8eni ke ikidodj:

Eco8iok kidji tag8icig ka Tibendjigedj.

Ojitamaok e k8aiakojimonig mikanani.

5Kakina pasadinan kada tabida8ise8an

acitc kakina pik8adinan acitc pik8adinajican

kada tabida8ise8an.

Kakina mikanan ka 8agackijimogin kada k8aiakojimonon.

Kakina aianodj ka inijimogin kada minojimonon.

6Midac kakina ka taci8adj a8iagog oga 8abadana8a

adi Kije Manidon eji ag8acimigo8adjin.”Ésaïe 40.3-5

7Kitci mane a8iagon ogi pi nda 8abamigobanin Cabadis, kidji gi sigaada8adjin. Ogi inan dac: “Kina8a madji a8iagog! Tabickotc ka pitcibo8inezi8adj kinebigog kidijinagozim! A8enen kagi kikinoamago8eg kidji kackito8eg kidji ojidameg Kije Manido otibakonige8in ke pijamaganig? 8Kicpin teb8e an8endizo8eg, kidinendagozim kidji 8abadjigadeg e mino ijitcigeieg. Ka8in inendakegon: ‘Ka8in kiga tibakonigosimin, Abanaamikag (Abraham) mega kidiji kitci odadamimin.’ Ceck8at iidi kidinendana8a! Ki8idamonom kidji kijigabameg8a igi asinig. Kije Manido ogagi meckodjian ini asinin Abanaam okitci anike ojisan kidji gi ijinagozindjin. 9Aja ick8a tacaigade ozidak kidji kicka8agani8i8adj mitigog ka odji 8adadabigicino8adj. A8enatigigotc ega mino minatigo8idj kada kicka8agani8i acitc kada madjocte8ebinagani8i.”

10Igi8e dac a8iagog ogi k8ag8edjima8abanin: “Adi dac kegi todamagiban?”

11Cabadis dac ogi nak8e8ajian: “Aa ka aiagin nijin pizika8aganan, pejig oda minan ini8e ega ka opizika8aganindjin, acitc aa ka aiag midjimini, mi pejig8an ke todagiban.”

12Nandam ka ma8adjia8adjin conian kitci ogiman odji, ke8ina8a ogi pi nda 8abama8an kidji sigaadago8adjin acitc ogi k8ag8edjima8an: “Kikinoamage8inni! Adi kegi todamagiban?”

13Ogi nak8e8ajian: “Ka8in a8acamej k8ag8ed8ekegon conia inigik ka iji inakonigo8eg kidji k8ag8ed8eieg.”

14Midac ke8ina8a nandam cimaganicag ogi k8ag8edjima8an: “Nina8it dac, adi kegi todamagiban?”

Ogi nak8e8ajian: “Ka8in kimodimakegon a8iagog oconiami8an, acitc ka8in 8aiejimakegonig a8iagog kidji aia8eg oconiami8an. Mi iji min8endamok adi e taso conia8eieg.”

15A8iagog nagazi8agoban kidji tag8icinindjin ini8e Kije Manidon kagi ikidonipanin kidji pidjinija8andjin. Kakina dac inendamo8agoban: “Mi ne8ad aa Cabadis Kije Manidon kagi ikidonipanin kidji pidjinijaogodjin.” 16Cabadis dac ogi inan: “Nin nibikag kidiji sigaadaonom. Anic dac pejig a8iag nage kada pi tag8icin, na8adj kitci macka8izi apitc8in nin. Ka8in tibise nidapitendagozisi kidji abiskobida8agin omakizinan. 8in dac Mino Manidokag acitc ickodekag kiga iji sigaadago8a. 17Mi maia tabickotc a8iag ka ick8atadj kidji kizi8adjin anominan ejinagozidj. Oga papa8ibanian kidji managodenig ega ka iji minozindjin. Oga ma8adjian dac anominan, otatasonigi8amikag oga iji naasan. Oga ick8azanan dac ega ka min8acinigin kegonan ickodekag ega 8ikad ka ata8enig.”

18Cabadis mane kodag kegonan ogi mikodanan e kagik8edj, min8adjimo8ini e tibadjimota8adjin a8iagon.

19Cabadis ogi kaganonabanin kitci ogiman Herod. Herod mega ki iji niba8igoban o8idjiki8en o8idigemagani, Herodiad ka ijinikazonigobanen, acitc kitci mane kodag madji kegonan ki iji panaagegoban. Mi Cabadis 8edji ki kaganonapanin. 20Misa Herod ani8ag ki panaage, ogi kiba8an Cabadisan kibaodimigi8amikag.

Jesos ka sigaadazodj

(Inabin acitc Matio 3.13-17; Mak 1.9-11)

21Apitc ka taji sigaadazo8adj kakina a8iagog, ke8in Jesos ki sigaadazo. Meg8adj e taji aiamiegobanen Jesos, 8ak8ig ki ceseni, 22acitc Mino Manidon ki pi najise8an 8agidj 8inikag, mi maia omimi ka 8abizidj ejinagozindjin ini Mino Manidon. Midac a8iag 8ak8ig ki odji anim8e: “Kin Nig8izis ka kitci sagiinan. Kikitci min8endamiijinan.”

Jesos ka odaiagizidj

(Inabin acitc Matio 1.1-17)

238aiej nisomidana8e pibon8ezigoban Jesos apitc ka madji kikinoamagegobanen. Inenimagani8iban teb8e ini Josep og8izisan. Mi oo8e 8edaiagizipan Josep:

Eli (Héli) ini og8izisibanin Josepan.

24Matat (Matthat) ini og8izisibanin Elin.

Lepi (Lévi) ini og8izisibanin Matatan.

Melki (Melchi) ini og8izisibanin Lepin.

Janai (Jannaï) ini og8izisibanin Melkin.

Josep ini og8izisibanin Janain.

25Matatias (Matthatias) ini og8izisibanin Josepan.

Amos ini og8izisibanin Matatiasan.

Neam (Nahum) ini og8izisibanin Amosan.

Esli ini og8izisibanin Neaman.

Nagai (Naggaï) ini og8izisibanin Eslin.

26Maat (Maath) ini og8izisibanin Nagain.

Matatias (Matthatias) ini og8izisibanin Maatan.

Semein (Séméin) ini og8izisibanin Matatiasan.

Josek (Josech) ini og8izisibanin Semeinan.

Joda ini og8izisibanin Josekan.

27Joanan ini og8izisibanin Jodan.

Resa (Rhésa) ini og8izisibanin Joananan.

Zorobabel ini og8izisibanin Resan.

Salatiel ini og8izisibanin Zorobabelan.

Neri ini og8izisibanin Salatielan.

28Melki ini og8izisibanin Nerin.

Addi ini og8izisibanin Melkin.

Kosam ini og8izisibanin Addin.

Elmadam ini og8izisibanin Kosaman.

Er ini og8izisibanin Elmadaman.

29Jesos ini og8izisibanin Eran.

Eliezer ini og8izisibanin Jesosan.

Jorim ini og8izisibanin Eliezeran.

Matat (Matthat) ini og8izisibanin Joriman.

Lepi (Lévi) ini og8izisibanin Matatan.

30Simian (Siméon) ini og8izisibanin Lepin.

Coda (Juda) ini og8izisibanin Simianan.

Josep ini og8izisibanin Codan.

Jonam ini og8izisibanin Josepan.

Eliakim ini og8izisibanin Jonaman.

31Melea ini og8izisibanin Eliakiman.

Menna ini og8izisibanin Melean.

Matata (Matthata) ini og8izisibanin Mennan.

Natan (Nathan) ini og8izisibanin Matatan.

David ini og8izisibanin Natanan.

32Jesse ini og8izisibanin Davidan.

Obed ini og8izisibanin Jessen.

Booz ini og8izisibanin Obedan.

Sala ini og8izisibanin Boozan.

Naasson ini og8izisibanin Salan.

33Aminadab ini og8izisibanin Naassonan.

Admin ini og8izisibanin Aminadaban.

Arni ini og8izisibanin Adminan.

Esrom ini og8izisibanin Arnin.

Peres (Pharès) ini og8izisibanin Esroman.

Coda (Juda) ini og8izisibanin Peresan.

34Tcekap (Jacob) ini og8izisibanin Codan.

Aisik (Isaac) ini og8izisibanin Tcekapan.

Abanaam (Abraham) ini og8izisibanin Aisikan.

Tara (Thara) ini og8izisibanin Abanaam.

Nakor (Nachor) ini og8izisibanin Taran.

35Serok (Seruch) ini og8izisibanin Nakoran.

Ragao (Ragau) ini og8izisibanin Serokan.

Peleg (Phalek) ini og8izisibanin Ragaon.

Eber ini og8izisibanin Pelegan.

Sala ini og8izisibanin Eberan.

36Kainam ini og8izisibanin Salan.

Anapaksad (Arphaxad) ini og8izisibanin Kainaman.

Sem ini og8izisibanin Anapaksad.

No8a (Noé) ini og8izisibanin Seman.

Lamek ini og8izisibanin No8an.

37Matosala (Mathusala) ini og8izisibanin Lamekan.

Enok (Hénok) ini og8izisibanin Matosalan.

Jared ini og8izisibanin Enokan.

Maleleiel (Maléléel) ini og8izisibanin Jaredan.

Kainan ini og8izisibanin Maleleielan.

38Enos ini og8izisibanin Kainanan.

Set (Seth) ini og8izisibanin Enosan.

Adam ini og8izisibanin Setan.

Kije Manido dac ini og8izisibanin Adaman.

Kije Manido Odikido8in: Ocki Mazinaigan

Algonquin New Testament © 1998 Canadian Bible Society

More Info | Version Index