Search form

Matio 24

Jesos 8idamage kidji nici8anadjiomaganig Coda8inni kitci aiamiemigi8amini

(Inabin acitc Mak 13.1-2; Lok 21.5-6)

1Jesos ki sagaam Coda8inni kitci aiamiemigi8amikag, acitc meg8adj e ani madjadj, okikinoamaganan ogi pi nazikagon e 8abadaigodjin adi kagi ijitcigadenig kitci aiamiemigi8amini acitc kodagian migi8aman iima ka iji acidakisinigin. 2Jesos dac ogi inan: “Ki8abadana8a na kakina ii? Teb8e ki8idamonom, kada odjitcise nigodin ega iaga pejig asinig kidji aiag8ita8abi8adj. Kakinagotc kada k8enabagodjinog.”

Ke iji8ebag ab8amaci ponaki8ag

(Inabin acitc Mak 13.3-8; Lok 21.7-11)

3Jesos ki a8i abigoban Olip (Oliviers) pik8adinajicikag. Okikinoamaganan dac eta ogi pi nazikagon, acitc ogi k8ag8edjimigon: “8idamaocinam anapitc ke iji8ebag ii, acitc 8egonen ke 8abadai8emagag e odjitciseg kidji pi koki tag8icinian, acitc kidji ponaki8ag.”

4Jesos ogi nak8e8ajian: “Iag8amendamok ega kidji 8aiejimigo8eg. 5Mane mega a8iagog kada pija8ag ni8izoni e abadjito8adj, acitc kada ikido8ag: ‘Nin aa8e Kije Manidon kagi ikidonipanin kidji pidjinijaogodjin.’ Mane dac a8iagon oga 8aiejima8an. 6Kiga nodana8a e mad8e migadinani8ag pecodj acitc kiga nodagem e mad8e migadinani8ag 8asag anodj 8edi. Ka8in dac segizikegon ii odji. Panima ii kada iji8eban, ka8in dac maci kada ponaki8asinon. 7Pejig8eieg a8iagog ka inakanezi8adj oga migana8an a8iagon pakan ka inakanezindjin, acitc a8iagog pejig aki ka tajike8adj oga migana8an a8iagon pakan akin ka tajikendjin. Kada ka8askadani8an acitc kada k8ig8an aianodjigotc. 8Apitc ii iji8ebag, mi maia tabickotc ik8e ka madapinedj kidji nta8igindjin odabinodjijiman ke ijinag8ag.”

Adi ke iji8ebizi8adj ka teb8etamo8adj

(Inabin acitc Mak 13.9-13; Lok 21.12-19)

9“Kina8a dac kiga takonigom kidji nanekadjiigo8eg acitc kiga nisigom. Kakina ka inakanezi8adj a8iagog kiga madjenimigo8ag, e nosoneojieg. 10Ii dac apitc, kitci mane ka teb8etamo8adj oga 8ebinana8a oteb8etamo8ini8a. Kada mamijimidi8ag, acitc kada madjenimidi8ag. 11Kada kitci mane8ag ke kagina8icki8adj, e ikido8adj e niganadjimo8inni8i8adj, acitc oga 8aiejima8an kitci mane a8iagon. 12Kada kitci obese eckam eckam madjido8in. Ii dac odji, kitci mane a8iagog kada poni sagiidi8ag. 13Aa8e dac ega ke ana8endjigedj, ka sogigaba8idj dac, mi aa8e ke ag8acimagani8idj. 14Mizi8ekamig dac kada tibadjimonani8an oo8e min8adjimo8in, ka odji kikendjigadenig Kije Manidon Odogima8i8ini. Kakina dac ka inakanezi8adj a8iagog kada nodage8ag oo min8adjimo8ini. Ick8a dac ii, mi apitc ke ponaki8ag.”

Kada kitci kodagito8ag a8iagog

(Inabin acitc Mak 13.14-23; Lok 21.20-24)

15“8eckadj ako, niganadjimo8inni Danian (Daniel) omikomaban ini a8ian ‘Kitci madji kegon ka kitci kotadendag8ag’ ka ijinikazondjin. Kiga 8abama8a dac aa madji a8iag pidigamig kitci aiamiemigi8amikag, taji ma8adji ka iji kitcit8a8endag8anig. Aa8e ke nabo8adag oo8e, panima 8e8enda oda k8ag8e nisidotan. 16Ii dac apitc, igi8e Coda (Judée) akikag ka tajike8adj, panima pik8adinakag kada ipai8e8ag. 17Aa8edi 8agidabak8an omigi8amikag ke teg8en, ka8in kadagi pidigebatosi kidji a8i ma8adobidodjin odaiman. 18Mi pejig8an, aa8e okitigan akikag ke teg8en, ka8in kadagi koki ki8esi kidji nda nadji8idodj opizika8agan. 19Ii dac apitc, kada kitci kodagito8ag ik8e8ag ke kigicka8a8ag8en abinodjijan acitc igi8eni8ag ke tcodjocikea8aso8ag8en. 20Aiamieok dac ega panima kidji madjipai8eieg meg8adj e pibog kek8an e aiamie kijigag. 21Ii mega apitc, na8adj kada kitci sogendag8an kodagito8in apitc8in kakina kodagian ka pi tag8agin, ka ako madji tag8ag aki pinici nogom, acitc ka8in mina8adj 8ikad pejig8an kada iji8ebasinon. 22Kicpin Kije Manido ega ki inendagiban kidji adji8inag inigik ke iji kodagitonani8anig, ka8in a8iag kadagi pimadjiosiban. Ini8e dac a8iagon odji kagi onabamadjin 8edji ki adji8inag inigik ke iji kodagitonani8anig.”

23“Kicpin dac a8iag igo8eg: ‘Inabiok! Aja ooma te aa8e Kije Manidon kagi ikidonipanin kidji pidjinijaogodjin!’ kek8an: ‘Iima te!’ ka8in teb8eta8akegon. 24Nandam mega a8iagog kada pija8ag e kagina8icki8adj e ikido8adj: ‘Nin aa8e Kije Manidon kagi ikidonipanin kidji pidjinijaogodjin’ kek8an: ‘Nin niniganadjimo8inni8inan.’ Kada kitci mamada8izi8ag acitc kada mamada8akamigizi8ag, kidji k8ag8e 8agackibina8adjin 8a8adj ini8e a8iagon Kije Manidon kagi onabamigondjin. 25Ndotamok! Kigi 8idamonom nigan ke iji8ebag.”

26“Kicpin dac igo8eg: ‘Inabiok! Pig8adakamigokag 8edi te!’ ka8in 8edi ijakegon. Kicpin igo8eg: ‘Inabiok! Mi ooma eji kazodj!’ ka8in teb8eta8akegon. 27Apitc mega tag8icig Aa8e Ka pi Anicinabe8iidizodj, kakina a8iagon oga 8abamigon. Mi maia tabickotc ka kitci 8asakoneseg 8abanog pinici nigabianog, mi ke ijinag8anig apitc pi tag8icig Ka pi Anicinabe8iidizodj.”

28“Taji ke iji tanatenig8en o8ia8 a8esiz kagi nibodj, mi iima ke iji ma8adjiidi8adj kakagig.”

Ka pi Anicinabe8iidizodj kada tag8icin

(Inabin acitc Mak 13.24-27; Lok 21.25-28)

29“Teci8agigotc dac ick8asenigin ini kodagito8inan, kada ani makade8asige kizis acitc ka8in kada tcakasigesi tibikikizis. 8ak8ikag kada odagodjinog 8anagocag acitc kakina kegonan icpimig kada ninigise8an. 30Midac 8ak8ig niga odji pi nagozinan e pi tag8icinian, nin, Ka pi Anicinabe8iidizodj. Kakina dac a8iagog ooma akikag kada kitci pabibagi8ag acitc kada kitci ma8i8ag, acitc niga 8abamigog, nin Ka pi Anicinabe8iidizodj, kidji pi najiseian nena8idj 8ak8ikag, e kitci macka8izian acitc e kitci icpendagozian. 31Kada nodag8an kitci podadjigan acitc niga ijinija8ag nidajenimag mizi8ekamig kidji a8i ma8adjia8adjin kakina a8iagon kagi onabamimagin.”

Jesos odadisokanan minatigon

(Inabin acitc Mak 13.28-31; Lok 21.29-33)

32“Pagidinik minatig kidji kikinoamago8eg kegoni. Apitc o8adik8anan madjiginigin acitc onibicibagoman sagiginigin, kikikendana8a aja pecodj kidji nibig. 33Midac pejig8an, apitc 8abadamegon ini kegonan e iji8ebagin, kiga kikendana8a aja e ani peconag8anig kidji tag8icig Ka pi Anicinabe8iidizodj. 34Teb8e ki8idamonom, ka8in kakina kada nibosi8ag a8iagog nogom ka pimadizi8adj, ab8amaci kakina ii iji8ebag ka ikido8an. 358ak8i acitc aki kada ponise8an, nidikido8inan dac 8in ka8in 8ikad kada ponisesino8an.”

Kije Manido eta okikendan apitc ke ponaki8anig

(Inabin acitc Mak 13.32-37; Lok 17.26-30,34-36)

36“Ka8in dac a8iag okikendasin anapitc maia ke ponaki8anig. Ka8in 8a8adj ajenig 8ak8ig ka te8adj okikendasina8a, ka8in 8a8adj Kije Manido Og8izisan okikendasini. Mi eta Kije Manido Kidadaminan okikendan. 37Kagi iji8ebag meg8adj No8a (Noé) ka tepan, mi maia pejig8an ke iji8ebag apitc tag8icig Aa8e Ka pi Anicinabe8iidizodj. 38Ii apitc, ab8amaci nikibig, a8iagog 8isini8agoban acitc minik8e8agoban, acitc nabeg acitc ik8e8ag niba8i8agoban, pinici No8a kidji pidigedj kitci tcimanikag. 39Ka8in dac kegoni ododji nisidotasina8a igi a8iagog, pinici kidji kitci nikibinig acitc kidji ani nisaba8e8adj kakina. Mi iidi ke iji8ebag apitc tag8icig Ka pi Anicinabe8iidizodj. 40Ii dac apitc, nijin nabeg kada te8ag kitigan akikag. Pejig dac kada madji8inagani8i, kodag dac kada naganagani8i. 41Nijin ik8e8ag ma8asag kada tcibak8e8ag. Pejig dac kada madji8inagani8i, kodag dac kada naganagani8i.”

42“Eco8iok dac! Ka8in mega kikikendasina8a apitc ke tag8icig ka Tibenimigo8eg. 43K8ag8edjitaok kidji nisidotameg oo8e. Aa a8iag ka tibendag migi8amini ka8in okikenimasi8an anapitc ke odisigodjin kimodi8innin meg8a tibik. Kicpin dac kikenimapanin anapitc ke odisigodjin, kada eco8iban, acitc oda taji pian ega kidji kimodji pidigendjin omigi8amikag. 44Midac ke odji eco8ieg kekina8a. Aa mega Ka pi Anicinabe8iidizodj kitci kaiezigotc kada odji tag8icin maia apitc ega odji pejig e pieg.”

Ka teb8eiendagozidj anokitage8inni acitc aa8e ega ka teb8eiendagozidj

(Inabin acitc Lok 12.41-48)

45“A8enen dac aa8e anokitage8inni ka teb8eiendagozidj acitc ka kagita8endagozidj? Mi aa ke igodjin okackaman: ‘Kiga nagadjiag kakina a8iagog nimigi8amikag ka anokitaoji8adj meg8adj ke tanedian. Kakina pepejig e taci8adj kiga minag midjimini eko tibise8adj apitc odji 8i 8isini8adj,’ inagani8i. 46Kicpin dac okackaman apitc pi ki8endjin 8abamigodjin 8e8enda e anokita8adjin, kada mino iji8ebizi aa anokitage8inni. 47Teb8e ki8idamonom, okackaman oga minigon kakina odaimini kidji nagadjitodjin. 48Mamidonendamok dac adi ke ijisegiban kicpin ega k8aiak anokitagepan aa anokitage8inni, acitc dac inendagiban oo8eni: ‘Kin8ej kiabadj kada inedi nikackam.’ 49Omiganan dac kodagian o8idji anokitage8inniman, acitc o8idji 8isiniman acitc o8idji minik8eman ini8e ka nta ki8ack8ebindjin. 50Kegapitc dac nigodin kada tag8icino8an okackaman, apitc ega pabajine piadjin, ka8in mega okikendasin adi ke ijigijiganig kek8an ke taso tibaiganeanig apitc ke tag8icinindjin. 51Aa dac kacka oga kitci sogacte8an ini anokitage8innin. Oga sagidji8ebinan kidji 8idji8andjin ini8e ka kimodizindjin, taji ke iji kitci ma8indjin acitc ke iji kitci mamad8eabideckandjin ke apitci kodagitondjin.”

Kije Manido Odikido8in: Ocki Mazinaigan

Algonquin New Testament © 1998 Canadian Bible Society

More Info | Version Index