Search form

1 Timoti 3

Sioskfot toh yukatohyuk yimam tu dborioh nefm yakitohkfot

1Na kfo mifwa, yimar kangr, sioshu toh yukatoh yimaya atoha, hifa. Ndt tu dborioh hingrnefet. 2Nd sios toh yukatohyukrhu yau nmbuham, toh nmbuham be yak teh marnyakfot. Nhai rorhu wom fasoh nmbuhat yimam wahti nkriyafokfot. Nd yimar be rpa metrpatpno tohkfot. Nd yimarhu yima yuhur yak hta bohtahato rorhu wiyauyau nmbuhat dukefmpno yaukfot. Womm yakhato hifa rika bukr yak htakfot. Rorn Bro Nkifrarhu mrokfom womm kfo nuhas bonuhasetr rhukfot. 3Nhai nd yimar bupa bebm yehato kfo mmo bammokfot. Nhai nd yimar tamoh nefenm bmbri kah rifhur mfnahhato tir tuyaknikfot o finji nakni-kfot. Nhai wommpno nakfo befenm rhukfot. Hifa yima yuhurn tamohm nakfo ptha marnyakfot. Ror nhai be mfro maru dukefrn rhukfot. 4Nd yimarhu yon tuhanm hifa hifa yak hta bohtahato rom rhu marnyakfot. Yonm be yifemrhu yinhitn rhu digr marnya-kfot. 5Yimar nhai turhu yon tuhanm hti yukatohaf hany marnyakahrm, nd yimar nhai Bro Nkifrarhu sioskfot toh yukatohruhatrt. 6Nd hingrneft tohyuk yimar nhai nfri Kristen yimarn nd hingrneft tohkfot. Nhai. Bi Kristen tohngotet yimarn nd hingrneft yak-hato htakfot. Nfri yimar nd hingrneft yakrahrt, to be turhu yufathu yura htaneftpno Bro Nkifrar tfit wahtarahr Satanr wahtamo kanjo. 7Mrokfo hatoh hna duha yimar nd hingrneft yakneft, nhai mrokfom. Ndhtet yimar yakettn to be nhai Satanrhu rugitn fkniruhatr riruh aruhyuk yimam mrokfo bebm turuhatmm.

Sioshu hingrnanhoyuk yimam dborioh nefm yakitohkfot

8Sioshu hingrnefm hingrnanhoyuk yimam Kristenmpno tu dborioh nefm yakitohkfot. Nhai rom hus tngetm rhukfot. Nhai rom wain bupam yehato kfo mmo bammokfot. Nhai maruham hmarsiyakt yakkfot. 9Wutha yima yuhumpno nd tafont yak nriyafmo tu yafothet mrokfot, nd yimam yakitoh-kfot. 10Kangko sioshu hingrnanhoyuk yimam ayaknom, afo yakhato htikfot rroh hingrnefm. Tu hifa hingrna marnyewume ee btn nd hingrneft yak htakfot. 11Rroh metm nhaf tu dborioh nefm yakitohkfot. Mirahm tihtrwonom akekutnom. Rorhu yima yuhur yak hta bohtatahato rorhu wiyauyau nmbuhat dukefmpno yaukfot. Rroh rhu nmbuham be rhu marnya bomar-nyakfot. 12Sioshu hingrnanhoyuk yimar rpa metrpatpno rhukfot. Rorhu yon tuhanm yak hta bohta marnyakfot. 13Yimam sios hingrneft tohhato hifa hingrna marnyem, nd yimam tu dborioh yufat yakrahm. Nhai yakrmi hanyruhatm rom Jisasr hikwa yuhat wommpno kfo pthaneft.

Bro Nkifrarhu kafrohet mrokfot tafont htamort

14Ninpno nianeft bi yibon hanita, ndar gontwat be wandfiwant. 15Kanga na nia duha yinyeft o awi knga hatohneft, ndar gontwatn bi mrokfom yakrahnm nom Bro Nkifrar hiket yimanmoh toh yuham. Nom Bro Nkifrar hikwa tuhan yindarinom, nom toh nkifraniruha Bro Nkifrarhu yon kunyenom. Nomn dany rahur kanjo nd Bro Nkifrarhu yafothet mrokfot hatohwonomt. 16Rpa yima yuhuri rpa tngr nom rpat tohhato kfo pthafkfot Bro Nkifrar nom yak nuhasmo tu yafothet mrokfothu mnat. Nd mro-kfothu mnat inji kroht:

Tu yima mif that yaknehato,

mifak dborhamotr,

tuhant yindars htimomr.

Ror tu mndohmb yima mifr tohmor.

Nhai wom tamoh nefenr rhurmorr.

Ndm Bro Nkifrarhu Yafothatn yak nuhasyukem.

Mounmotm hti bugamomr.

Rorhu mrokfom yimam yaknimomm,

kmi kmi kfo ptha habrimomm.

Ndar bbinysofthu yimam wany yakiomomr.

Bro Nkifrar yura hamuhmorrn,

bro yufat hemorr.

Bro Nkifrarhu Mrokfot

© 2013-06-11, Wycliffe Bible Translators, Inc. All rights reserved. More Info | Version Index