Search form

Revelesen 21

Bro Nkifrar hingrnayuk nfri hingrneft

(Sapta 21–22)

Nfri mounti nfri bbinysofthu mrokfot

1Nd wuroh bro kotkfot toh-yuk yimam htinimoyanmn ee tfit nfri mounti nfri bbinysoft yarim fnahmof. Ndwom barkof rhumo mounti bbinysoft rof bi rim fnahnimof. Yo marombt rot rpat rim fnahnimom. 2Yo Bro Nkifrarhu nfri taun Jerusalemr wuhtiyakmoyanr Bro Nkifrarpno yura kmi hefenr wutoh tanyhato fawihna-mor. Nd kmir rorhu wondhtpno yawihnamohat memom nndo mettn wondh marnya bomarnyetn bi niewut ram kunysn. 3Yo sia kingtpno wom bro tngt wanyakmoyant kfo nakuyaf memot, “Wawanyko! Bro Nkifrar be bi yawihnehato yimampno tohwor. Rompno tohruharn rorhu yufat hta-rahrm. Rorhu yufat htaruhatrm yimam rorn yima yuhum htahato rorn lotu hakurahm. 4Rroh nur nyingam rorn yak thurahrm. Yimam be nhai wom nohruhatm o nhai wom nurhato yima noh bb kunys rhuruhatm o nhai wom penkfot yakruhatm. Nd bingot rhumo ruheft nhai wom tfit rhuruhatt.”

5Yo nd sia kingtpno rhuyuk yimar tfit kfo memor, “Wawanyko. Nd barkof rhumo tamoh tamohr be bi yak thuhato bi tfit nfri shrkarpar bi htewa.” Yo tfit kfo memora, “Ndar mrokfot tu kfo mif kfoyet. Yimam wany yakiorahm. Ndnettn ndar mrokfot inji wawan-dfatwa.” 6Yo kfo memora, “Nd tamoh tamohr be bi hingrna kafkomoyanr. Nanrpaya barkofa yo nanrpaya wuroha, na kfomoya shrkar yarim fnahmor yo tfit na kforuha shrkar tfit rim fnah-nirahr. Yimar bupa knewur, yima toh nkifraniyuk bu yinharhu bupam he furarhotanr ye furarahrm. Nd bu yinharhu bupam yimam yanyeft toh nkifrewum. 7Fitoh yimar nda bbiny-softhu ufasoh nefroh bbukeft kahot nohwort, nd yimar nd na kfiwa shrkam hirhotanr yakrahrm. Yaknihato nd yimar to be nann rorhu Bro Nkifraya rhuruha yo ror nanhu yonr rhurahr.

8To ndwom ndwomt ginyetm kanjo yesisetm o Bro Nkifrarhu mrokfot wany yakio duham o fasoh hnomha nefm yakitohetm o yima was furetm o yaum kanjo ijoh tone htfasetm o yima tipetm o yima grwasetm o forkat haruhetm o yima wasyuk wajim haruhetm o yima htakyuk wajim haruhetm o tahi rmonm o nkifra tahim lotuyetm o yima kfo fura nhehetm, ndhtet ndhtet metm o yindarim, rroh tohyuk kmit bi kfohtetet. Nd bro muhr sarfa tahim kur nanyjar hasiwa kahrn yohnirahm. Be nhai tfit niakfot. Ndt nd wuroh nohefet.”

Jonr nfri Jerusalemr htimo yuhat

9Yo tfit wom mounmotr niamor. Nd nanpno niamo mounmotr to nd Bro Nikifrarhu 7-pela namburet dism yakitohmoa wom mounmotrn niamor. Nd mounmotr niamorn mikfo memora, “Wania. Waniakahtn yak nuhasruhann nd Sifsif Yonrpno kfo yibon hanita mett.” 10Bro Nkifrarhu Yafothat mthu nawohhato tuhafunamota. Tuhafunanihato hanymota tu yura bro kmi birn. Kmi bir hanyhato fak nuhasmota nd Bro Nkifrarhu nfri kmi Jerusalemr. Nd kmir tu Bro Nkifrarpno yura kmi hefenr wuhtanyhato fawih-namor. 11Nd kmir tu Bro Nkifrarhu bro nukeft yakhato kmir wayifatoh-mohat memom ka nndo tahi jaspatn fnhuhato funefm kambohritnewum. 12Nd kmi gnar gna habriyetrn gnam nhai brbo ritoh hanyrmom. Tu yurak-ngot wafakmom. Nd kmir 12-pela yifhatikm htamomr. Nd 12-pela yifhatikm 12-pela mounmotm toh nhombramomm. Nd 12-pela yifhatikm yufet bugam rhumom. Isrerroh 12-pela nkifraroh yufam htamomm. 13Nd kmirhu husfihus konam husfirpa husfirpa yifhatikm hta hanymomm. Marr yuwa muhwa isko husfirpa yifhatikm htamom. Yo tfit notko wom husfirpat htamom. Yo sautko wom husfirpat htamom. Yo tfit marr yohnita wesko wom husfirpat htamom. 14Nd taunt gna habrimo gnat, 12-pela bro yuke tahim hatohmomt gnat. Nd gnat hatohmo 12-pela tahim, Sifsif Yonrhu 12-pela aposerroh yufam htamomm.

15Nd mounmotr nanpno kfo pthamor, gore hingrnayet yak hafot mis fakitohmor. Nd kmiti kmi gnat yo kmi yifhatikroh yak hafotyuk yak hafot mis fakitohmor. 16Nd kmirhu 4-pela konakfom yak hafotmohat rpa hafott tohmom. Tu mounmotrhu yak hafot miye yak hafotmohat, biyef, guref, yo manoh manoh kimbohnefm, yo yurak mingiahuko wayakmo hafott to be nd rpa 2,200 kilomita hafotrpat fakmorm.+17Kmi gnat bbinysoftpno wagnak gna hamuhmohat, 144 mita wafakmot gnat. Nd kmi gnat mounmotr yak hafotmohat yima mifm yak hafotwa yak hafote fak hafotmort.

18Gnat hingrnamohat, Bro Nkifrar jaspa tahirpaye hingrnamort. Yiro kmi rawofthu tamoh tamohm be gorrpaye hingrnamorm. Nd kmir memom nndo binasohtn kak dbratwor. 19Gnat wahtakmo tahim, Bro Nkifrar wonk wonk fnhu nmboretet tahim yakhato nde hta nmboret htfas marnyamort gnat. Barkof wahtakmo tahis, jaspa tahis htamor, yo tfit namba 2 tahis blupela sapaia tahis htamor yo tfit namba 3 tahis aget tahis htamor, yo tfit namba 4 tahis grinpela emerar tahis htamor. 20Yo tfit namba 5 tahis sadonikis tahis htamor, nd sadonikis tahis wonk wonk fnhu nmboretwot, kkupa kanjo fnhu yo ganyom fnhu, inji fnhutt. Yo tfit namba 6 tahis, kkupa kanjo fnhuyet konirian tahis htamor. Yo namba 7 tahis, yelopela fnhuyet krisorait tahis htamor. Namba 8 tahis, ndt womhtet grinpela berir tahis htamor. Namba 9 tahis, ndt nhaf womhtet yelo fnhuyet topas tahis htamor. Namba 10 tahis, krisopres tahis htamor. Namba 11 tahis, haiasin tahis htamor. Namba 12 tahisne womhtet kkupa kanjo fnhuyet ametis tahis htamor. 21Yo 12-pela yifhatikm rom dborioh biskfot kutewumm perm. Nde hingrnamorm yifhatikm. Rpa rpa yifhatikm rpa rpa bro perkfot yakhato hingrnamorm. Yihotam rom gorrpaye hingrnamorm. Memom nndo binasohtn kak dbratwot.

22Nhai wom temperr nd taunt htirmoya. Nhai. To nd hta nngrajohet Bro Nungothet Nkifrari yo Sifsif Yonr to fitha tohetfn nd kmir tfit temperetr rhurmor? Nhai. Tuha tohetfn tuha lotumoumr. 23Yo nd taunt nhai marr tarmor o yamt tarmot. Nhai. Tu Bro Nkifrarhu nukefrpat fakmott. Yo Sifsif Yonrn taunthu lamr rhumor. 24Kmi-yakmiroh met yindarim be nd taunthu nukefrpatn tohhato yaurahm o tamoh tamoh nefm narahmm. Yo bbinysofthu kingm rroh dborioh dborioh shrkar nhaf be nd taunrpat hnerahmm. 25Nd taunt nhai yifungt tohruhatt, be nd Bro Nkifrar hayuk nukefrpatn kmit rhu hasoraht. Ndnettn nhai taunthu yifhatikm frkihruhatmm. Yifhatikm be inji tfanyetm rhu hasorahm. 26Yima yimaroh wondht, marut, nd taunrpat hafknirahmt. 27Tmift nd fasoh fasoh shrkar, yo nd fasoh fasoh nefm nayet yimam yo nd kfo fura bofura hanyet yimam, nhai nd taunt yiruhatm. Be tu nhai mif. Yimam bi rroh yufam bi nd Sisif Yonrhu toh nkifraniyuk gonborngtn htetm, romrpam nd taunt fknirahm.

Bro Nkifrarhu Mrokfot

© 2013-06-11, Wycliffe Bible Translators, Inc. All rights reserved. More Info | Version Index