Search form

Hebrews 8

Iesu hu nosi priest börömo jiaje jöhoje.

1Na jajivobe rovode jö hesi bëhoho aviëhije. Naehu jajivode ëhi jië'e priest börömoho javue. Hu ö'idöre ajiomoromo God eni jië'e aehu böröme namijaje a hesi övo manö hijë'eje. 2God-hu jiajire osa hesi muoho vaejajeje. Ëhesi bëhoho huro God-are javu hesi priest muoho vaejajeje. Ëjavuoho bogo maja aru'aho va'ëne amoho jianovo'i a'i God-are javu maeje. Bogo ma-aehu avoho'i Badaro avohë'eje. Ëosa hesi muoho nosi priest börömohuro vaejajeje.

3Amo priest masije aho'o muro bahijarue hesi bëhoho jaburo mi suvuore övo suvuore gö gö God bojami'iröhego. Ëhuni priest muro bahijarueje. Jabesi muoho ëhi jië'ëro nosi priest börömohu'o övo suvuore jio'ë'e God bojami'iröhego. 4Röhu Iesu sa'are hi'ibejo bogo priest-oho jio'ibejo ë hesi bëhoho hesi Levi rajo priest-ëremu ë muoho vaeromo Jew rajo jögorure jajivare suvuoroho God-are örire bojamijaruëro jië'ëro. 5O Levi rajo priest mu vaejaruoho ëho ö'idöre jiaje muoho va'ëneje. Ëmuoho ma-aru'ahonö'e jio'i bogo mahoje. Aviëhi jianove. Moses-ro God-are niögu javuoho avoho'ia'amu evare God-ro uavadeje: Gavë'iajo. Ja'o na'o dahorure ariromo naehu röjahijamu hejanëhi bövie bise'e ëhi vaenëjo. Amo priest ömo'ömohuro ëhi ö'idöre jiaje mu va'ëne vaejarueje. 6A'i Iesuhu baejade priest muohuro Levi rajo priest jabesi muoho iosiramiromo börömohoje. Ëhesi bëhoho Iesuro priest börömëro jië'ëro God'o no ae aho'obëhe nosi ririre namiromo öroho avohahuoromo God-hu muebejavuoröhe jögoroho avohahuajeje. Ëjögoru Iesuhu avohahuajohuro Levi rajo priest jabesi jögoroho iosiramiromo mahoje. Ëhesi bëhoho Levi rajehu muebejarue jögoru God-hu Jew rajo aevo'i bojëmadevare evare ma-bisemu ajëmi'i uvadeje. A'i Iesuhu avohahuaje jögoru God-hu aevo'i bojamuadevare evare böröme ajamui'i uvadeje. Ëhu'ëro Iesuare jögorohuro Levi rajo jabesi jögoroho iosiramijë'eje.

7Levi rajo priest-ehu muebejare jögoru urimo bojamuijadoho eni jio'ibejo God jögoru göho bogo bamo'i uehorovo'ibejo ajamui'iröhëni. Bëhoho bogojio'ibejo. 8Röhu God-hu jövade jö hesi aribövi bogo eni jioruomaje jöho hesi surire jajivoromo ëhi uvë'eje:

Badaro ëhi uvajëjo: Iae majae ijonöho nasi aribövi muebejëvo'irode jögoru i'oho avohoromo

Israel rajohu'o Judah rajohu'o mëmi'ejöjo.

9Mami'e jabesi hijo miono'o muebejëvo'irode jögoru mëmodëhioho bogo ëhi jië'e jögoroho mëmi'ejöjo.

Jabesi hijo miono'e Egypt sa'are jëvamu naehu söjëgo rovodevare evare majare jögoroho mëmode höjo.

Mëmamu jaburo jögoroho bogo biririvoromo ejeho'i vuonugare höjo.

Ëhuni naro jabumë bogo gëvanovode höjo. Badaro ëhi uvajëjo.

10Röhu Badaro uvajëjo: Ëmajaho barë'iramu aviëhi jië'e jögoroho Israel rajoho mëmi'ejöjo.

Naehu nimaje ëhi ëhi ë'onövo'iröhe jöho jabesi simanore ba'amëho'iramu uehorovoruomo'ajëjo.

Jabesi dë vövöbajo'ere jajivëho'iramu ejehoruomo'ajëjo.

Ëhi'o'iramu jabumë muebejëvo'irode börömoho jevo'ajëjo.

Jabumë nasi aribövi mae jioruomo'ajëjo.

11Amo rajëro göëro göho bogo röjahirovoromo

aganëro göëro göho bogo majahirovoromo uarovo'aruëjo: Bada avoho gahëjo.

A ininore ëhi va'o a masijore aho'obëhe na ge'a'aruëjo.

12Jabuhu sisë vaejaruoho naro jabumëni vavaenimoromo

jabesi sisëho ma-ioro'ioremu uehorovoromo vuonugëho'ejöjo.

13Ëjögoroho i'e hö uvade hesi bëhoho urimore bojamuade jögoroho iae mamiraejë'eje. Röhu jöe rabe mamiraeromo sisërëbe va'ajoho ëho ma-burëro barë'ië'e.

God-are Jögoru Iꞌoho

© Wycliffe Bible Translators, Inc. All rights reserved. More Info | Version Index