Search form

Revelation 18

Amo sisë Babylon ma-ioro'ioremu sisërë barë'iröhe jöhoje.

1Ëhi'amu gagorovo gavodeje anerae gö ö'idöre jioromo ruvebijamu. Hu darugo böröme baejë'ëro ruvebi'ego hesi ajohuro sa'ae aho'obëhe ajivo'amohijo. 2Sa'ae aho'obëhe ajivo'amo'ego ma-darugo'o uvohijo: Amoho barëjë'e höjo. Iho'e amo börömoho Babylon vejö'oho barëjë'e höjo. Avevejö'oho ë amoho Satan-are anera jabesi ame höjo. Aru'aho sisë jabesi öri ari'e höjo. Va'inumi'e ugo sisë ihe göëro göëro ë raromo jijiharue höjo. 3Ëhesi bëhoho ëhi höjo. Aehu magonaho hesi vörö'e jovo iromo simane sisërëromo hu'o önö'e vaejarue ëhi jië'e mue gemuoho ë amo rajoho jaburo sa'ae aho'obëhe röjëhijare höjo. Aehu magonaho'o önö'e mu vaejaruëhi sa'are a masijo ömo'ömohuro ë amo gemuore bimuvoromo javoji'e mue gö gö vaejare höjo. O Babylon amo rajohuro mahunö'e raromoromo bövie bise'e imo'i nimare höjo. Ëhi nimë'ëro inömo imo'amarue ariböviohuro sa'ae göro göro jioromo rueromo ë amore jabesi inömoho imoromo ëhuro moni ma'e jëvade höjo.

4Ëhi uvavamu hejë'i hejodeje ö'idöre huë gö uvavamu:

Nasi aribövioho ë amore raromarujoho vuonugo'i ruehëjo

ëhuro ë amo rajo jabesi gemuoroho bogo bimuvoromo mu sisëho vae'irarije höjo.

O jabuhu i'u baeruomajoho jemë bogo bae'irarije höjo.

5Ëamo rajehu mu sisë börömo bëhe vaebe rovaroho

God iae uehorovajëjo i'ue bojëmi'iro.

6Amo rajehu mu sisë vaeruomadëhi

jemëro i'uoho mana ëhi bojëmiromo

röhu gö'o döro börömo bëhe bojëmirëjo.

Jabuhu a ioro'ioro vörö'e jovo bojëmanovamu ue'ahoromo ijumorovarëhi

jemëro ëhi mana bojëmirëjo.

Röhu vörö ma-ma'e jovoho bojëmego ue'ahoromo ijumorovo avoho'irarëjo.

7Urimo amo rajehu nimoronimorohë'i jijihoromo mahunö'e raromarëhi

i'uoho mana ëhi bojëmego hara'uoromo huë vavaene baeruomo'irajo.

Magonahehu sarerivoromo uvajëhi: Na magonaho börömëro jevë'ëro dö maro hijaje höjo.

Na bogo doruoho hijaje höjo.

Bogo mae bogo huë vavaenoho bae hesi jevajë uvajëhi

ë amo rajohuro ëhi gemuoho sarerivoromo uehorovoromo uvoruomaje höjo:

No masije javuajëjo.

8Ëhuni majae gemuore jabesi i'uoho aho'obëhe ma-majioho rue barë'iramu sisërëjëvo'ajëjo.

Ae guomo guomo sisë baeromo vuovëvo'ajëjo.

Huë vavaene böröme jabesi örire rue'a'ajëjo.

Hömo majae rue'a'ajëjo.

Vënëro ravëvo barë'ajëjo

ë hesi bëhoho jabumë mevo gëromo i'u bojëmaje aho Bada God-are darugoho börömëro jië'ëro.

9Röhu sa'a gö gö a masijohuro ë amo rajohu'o bimuvoromo javoji'e muoho vaeromo hesi inöme marohë'e mae ujuohoromo mahunö'e raromë'ëro garöhe amoho vënëro ravoromo u'ivo ajiomo'iramu garuomoromo amo hesi jöëni vavaenimoromo nierusuburu'e bamoruomo'ë'e. 10Nierusuburu'e bamoromo ë amore huë vavaeni börömo baejaruoho garomo juhuonivoromo rori'o ëgoböviro riravo'ë'ö. Riravoromo uvoruomo'ë'e:

Babylon vaevë'e amo börömohajo.

E-e vaevë'e biriri'e amohajo.

Jemesi i'uoho ma-majioho baejë'e jëvajëjo.

11Ëhi uvoruomo'iramu sa'ae dinö'e dinö'e raromoromo inömo imoromo moni mana ujuoharue ariböviohuro ë amo hesi jöëni vavaenimoromo nierusuburu'e bamoruomo'ë'e. Ëhesi bëhoho urimë'i ë amo rajehu imo'amarue a jabesi inömo imo'amoromo moni bojëminövaroho ë i'u baeröhe majare evare iae barë'ë'e. Barë'iramu ae bogojië'ëro jabumë inömoho bogo imo'amoromo monioho bae'ë'ö. 12Jabesi gold silver munë gö gö maho nienia maho bogo imo'amoromo monioho bae'ë'ö. Sanuovë'e niöge kavuë'e nu ano'e gö gö ëhu'o bogo imo'amoromo monioho bae'ë'ö. Ridi'e ije nu ano'e gö gö ëhu'o bogo imo'amoromo monioho bae'ë'ö. Inömo inömo mi danehu avoho'amaroho ijo maehu avoho'amaroho rövë'e munë maehu ajaniehu munë nu ano'o göehu göehu avoho'amaroho ëhu'o bogo imo'amoromo monioho bae'ë'ö. 13Rihu'e i maho ridi'e oso ihe gö gö vëniro buejego ridivajoho o sino avohorovaruoho o mu rabe rabe vaejaruoho ëhu'o bogo imo'amoromo monioho bae'ë'ö. Wine jovoho olive ijo bajo jovoho flour-ho wheat-ho cow-ho sheep-oho horse-oho ëhu'o bogo imo'amoromo monioho bae'ë'ö. Maratu mabëhe horse-ehu jagu bava'aruoho ëhu'o bogo imo'amoromo monioho bae'ë'ö. Ae magonahe aru'aho'e jioruomajeje röhu mahu mi'o ë'aruëhi ëhi guduamo'amoromo imo'amarueje ae gö jabesi muemu vaeröhego. Ae magonahe mi va'ëne imo'amaruëhioho ëhioho bogo imo'ë'ö. Ijonöho aho bogo imo'amo'iramu ëhuni imo'amarue ariböviohuro nierusuburu'e bamoruomo'ë'e. 14Nierusuburu'e bamoromo uvoruomo'ë'e: Vaevë'e amoho ijo baje gö gö i'i ganiganiëgajoho iae barëjëhë'e höjo. Jemë inöme marohë'e mae o bövie bise'e ajivë'e ma-mabëhe jëvadoho sisërëjëhë'e höjo. Dinö'e röhu maho birohorëjo. 15Iae ë inömo amo rajo jabesi örire imo'amoromo mana marohë'e ma ujuoharohuro ë amo rajehu huë vavaeni vi'ehi börömo baejaruoho gëromo juhuonivë'ëro rori'o ëgoböviro riravo'ë'e. Ëgoböviro riravoromo huë vavaene baeromo nierusuburu'e bamoruomo'ë'e. 16Nierusuburu'e bamoromo uvoruomo'ë'e:

E-e vaevë'e vaevë'e amo börömohajo.

Sanuovë'e niögu mabëhe kavuë'e ma-mabëhe io'amonövarije höjo.

Nieniae gold-ehu inömo göehu göehu avoho'amaroho gurasijiomoromo avohorovonövarije höjo.

17Jaruvoho jemesi inömo marohë'oho ma-majioho ijumëhë'e höjo.

Boat muebe'amarue aribövioho boat ma'enarue aribövioho boat-re raromoromo mu vaeromo moni baejarue aribövioho boat-re va'arue a ioro'ioroho ëho jaburo rori'o ëgoböviro riravoromo 18garöhe Babylon amoho vënëro ravoromo u'ivo ajiomo'iramu garuomoromo ma-darugo'o uvoruomo'ë'e: Sareri amo börömo böröme jiade höjo. Ëhi jië'e amoho urimoho bogojiade höjo. 19Ëhi uvoruomoromo vavaenimorovoromo tohotohoho jabesi simanore bu'ödivorovoromo nierusuburu'e bamoromo uvoruomo'ë'e:

E-e vaevë'e vaevë'e amo börömohajo.

Boat baeromo sö jovore va'arue ae aho'o noro ë amo rajore nosi inömoho imëvoromo

manaho marohë'e mae ujuohë'e javuajëjo.

Jaruvoho ma-majioho sisërëjë'e höjo.

Ëhi uvoruomo'ë'e.

20Röhu ö'idö rajoho apostle ömo'ömoho jö God-aro baeromo majëhijarue aribövioho God-are aribövi ioro'ioroho jemëro nimorohore. Ëamo rajehu jemesi örire sisë'i vaejëvaroho God-ro ëho gëromo ë hesi i'uoho mana bojëmijë'eje.

21Röhu darugo'e anerae gemuëro munë ha'osi börömo börömoho banigojiomoromo sö jovore bu'ö'ego jovo gagore be'abuehijo. Jovo gagore be'abue'ego anerahuro uvavohijo: Ëmunëhu e'ure be'abuejë'ëro ijonö bogo gavaruëhi amo börömo böröme Babylon i'ue baeromo ëhi ma-ioro'ioremu beva'oromo sisërë'iramu ijonöho bogo ga'a'anuëjo. 22Gita bejaruoho jö iaruoho virikö huosiharuoho hëgö huaruoho ë hesi huëho ë amoroho ijonöho bogo he'a'anuëjo. Inömo javuo bövi bise'o avoho'amarue aribövioho ë amoroho ijonöho bogo birohëvo'anuëjo. I sa'ijovaje munë hunuohunuovo'ego garahörö'e baejajoho ë amoroho ijonöho bogo he'a'anuëjo. 23Iro buno'irae'ego ajivajoho ë amoroho ijonöho bogo ga'a'anuëjo. A'o magonaho'o masurovoromo nimoronimoroharuoho ë amoroho ijonöho bogo he'a'anuëjo. Röhu amo rajomë urimo jemesi moni mu vaejarue ariböviohuro sa'a ioro'ioroho iosirëmiromo masije jëvade höjo. Jemëro sareri sareri'e muoho vaeromo sa'ae aho'o jabesi uehoroho ijumëharije höjo.

24Röhu jö God-aro baeromo majëhijarue ariböviohu'o God-are aribövi ioro'iorohu'o ë amore o dinö'e dinö'e raromaruoho muo'amamu vuovëvë'oho ë amo rajo jabesi sisë höjo. Iae ëhuni ë amoho sisërë'ajëjo. Anerahuro ëhi uvohijo.

God-are Jögoru Iꞌoho

© Wycliffe Bible Translators, Inc. All rights reserved. More Info | Version Index