Search form

Revelation 5

Huhohë'e sure God-are Sheep Harihe Iesu gemuehu jiovo varijëne jöhoje.

1Ëhi'amu gavodeje röho mare hiromo muebejavuaje aho God-ro hesi övo mahuro huhohë'e suroho ma'enë'e jiamu. Ësuroho ruë jajivo vië jajivoromo huhohoromo sivaëro aho'o 7 ëmino'e suroho badihi taemo'amë'e jiohijo. 2O gavodeje darugo'e anerahuro ma-darugo'o uvamu: Rahu a böröme javë'oho badihi taemo'amade sivaho goho'amoromo suri jiovo'iranoho eni javajëjo. 3Ëhi uvamu röhu ö'idöre sa'are sa'a uhure ëhi jië'e a börömoho nahoromo bogo mae bogo birohareje huhu ë suri jiovoromo adaho'iröhoho. 4Ëhi jië'e aho bogo birohamu ëhuni na sisë maro nivodeje. 5Nivamu a duvahe gemuëro uevadeje: Nadi nivo'i ave jöho hejëjo. A böröme gemu iae eni jiajëjo. Lion-hu mi ioro'ioro iosirëmiromo darugo'e jiajëhi huro Judah rajo ioro'ioroho ëhi iosirëmiromo darugo ma'e höjo. David urimo hinövade a hesi ujo böröme höjo. Ëahuro sisëho ruahö'öjë'ëro sivae 7 goho'amoromo suri jiovë'oho hu eni höjo.

6Eni höjamu hejë'i gavodeje Sheep Harihoho namijamu. Mami'e aëro anamu guomë'ëro sinore batato'e jië'e ëhi namijamu. A duvahoho ruë numë riravo rova'ego God rajahijarue maje 4-ho ruë numë riravo rova'ego ë Sheep Harihoho riri mare God-are röho ma hesi ririre namihijo. ËSheep-oho dane aho'obëhe 7 o nune aho'obëhe 7 ëhi jio'amohijo. Ënune aho'obëhe 7 jabesi bëhoho God-are Aru'ahe 7 sa'ae dinö'e dinö'e rëmö'öjadohoje. 7Amo ë Sheep Harihohuro rueromo röho mare hijaje aho God hesi övo mare jiaje suroho baehijo. 8Suroho bae'ego God rajahijarue maje 4-ho a duvahe aho'obëhe 24-ho jaburo Sheep Harihu hesi nuninö sa'are ague aho raromohijo. Jabumë gemu gemu gita övore ujuohë'e gold'e ramare ridi'e buejarue vëni u'oho ujuohë'e jiohijo. Ridi'e buejarue vëni u'i hesi bëhoho God-are ariböviehu hesi örire atarue jö'o ögohoje. Gita'o ramare vëni u'ohu'o ujuohë'e ague aho raromoromo 9jö i'oho ioromo uaruomohijo:

Ja maëremu javë'ëro ëhuni suri baeromo siva goho'amë'oho eni javajëjo.

Aëro anagamu jasi köho otehoromo guomane höjo. Guomoromo ëhuro ae ajëmijane höjo.

Agane gö gö huë gö gö sine gö gö sa'ae dinö'e dinö'e sisë'i raromaroho

jero guomoromo ëhuro imëvoromo baejëvoromo God-arinö rëmane höjo.

10God-arinö rëmoromo jabesi ihoho döro bamëhamu

ëhuro jabumë masije riravoromo priest muoho baejare höjo

nosi A Böröme God hesi muoho vaenövoröhëni.

Priest muoho baejë'ëro ijonö masije vaeromo

sa'are ae muebejëvoruomo'ajëjo.

11Ëhi uaruomamu naro garomo hejodeje anerae aho'obëhe mae bogo adaho varijënoho uvoruomamu. God-are röho maho o God rajahijarue majoho o a duvahoho ëho ririro jio'amo'i ë aneraho aho'obëhe ruë numë raromo rova'oruomohijo. 12Raromo rova'oromo ma-darugo'o uvoruomohijo:

Anamu guomade Sheep-oho mae höjo.

Ëhu'ëro darugo maho inömo inöme aho'o uehoro maho vörö maho

iho maho aji maho ma-hesiro gemu höjo.

Noro hu gemu rajahi'ejarëjo.

13Ëhi uvoruomamu hegorovo hejodeje God-hu bamade bövie bise'e ö'idöre sa'are sa'a uhure jovo gagore raromaruoho ëho jaburo aho'obëhe uvoruomavamu:

God röho mare hijaje ahu'o Sheep Harihohu'o

iho maho aji maho darugo maho ma-jabesiro gemu höjo.

Ëhi jiemu jiobe va'ië'ego jabumë gemu rajëhiemu rajëhinövo'ejarëjo.

14Ëhi uvoruomamu hegorovo rue God rajahijarue maje 4-ho jaburo uvoruomohijo: Ëjöho iae mae-ëjo. O a duvahoho jaburo sa'are ague aho raromoromo God'o Sheep Harihohu'o rajëhiruomohijo. jöhoje.

God-are Jögoru Iꞌoho

© Wycliffe Bible Translators, Inc. All rights reserved. More Info | Version Index