Search form

Revelation 9

1Ëhi'ego anerae ëhi niö'i ëhi niö'iehu hëgö huaroho röhu number 5-huro huohijo. Huamu gavode jijoho ö'idöre jioromo sa'are be'abuejë'e jiamu gagorovo gavodeje gua gago ëgobövi ma ë hesi ojo jiovarue key-oho aëro jiji hesi örire bojami'ego baejamu. 2Gua hesi ojo jiovarue key-oho baenugoromo gago ëgobövi hesi ojoho jiovohijo. Jiovo'ego vëni börömo böröme gua gagore jioromo u'ivoromo rojomohijo. Rojomoromo majaho tugoho'ego öri ari'oho aho'obëhe ramoramovohijo. 3Ramoramovo'ego guaeviguaeviëro vëni u'ire jioromo sa'are ruvebiruomohijo. Ruvebiromo ë guaeviguaeviohuro niani'ö hesi vörö va'ënoho baejareje ae ijumo'amoröhëni. 4Vöröho baeromo röhu heruomadeje uëvavamu: Garasie ije ö'e iruno'e resu resue rabe rabe sa'are jiajoho bogave ijumo'irarijëjo. God-are soru varijore bogojië'ohemu ijumëvorëjo. 5Ijumëvë'oho jabumë nadi muo'amëvo'irögoro niani'öehu umijego vi'ehëgaje ëhi jië'e vi'ehoho manaere övo gö mine bojëmibe va'orëjo. Ëhi uëhijo. 6Ëhi uëvadëhi ë manaere övo gö mine hesi uhure ë ijumëvë'e aribövioho vuovo'i nëgo'ë'e. Vuovo'i nëgo'iramu vuovo'i öroho bogo biroho'ë'ö.

7Röhu ë guaeviguaevi jabesi sino haho'oho muorovo'irögoro avohëhare horse-oho va'ëne jio'amohijo. O jabesi simanore gold'e bosö va'ënoho didi'ëho'amë'e jiohijo. O jabesi nu ano'oho a nosi nu ano'o va'ëne jio'amohijo. 8O jabesi simano uoho magonahe simano rudu'e jabesi u jiajëhi ëhi jiohijo. O jabesi anoho vösö'e lion jabesi ano va'ëne jiohijo. 9Röhu aehu muorovo'irögoro biriri'e niögehu vinebi tugohoromo io'amarue ëhi jië'e biriri'e niögoho vinebire io'amë'e jiohijo. O vivojehu diohodiohovoromo huosihë'oho ëho muorovo'i va'i horse-ehu maratu jagu ujuohoromo darugo'o va'ego garahörö'e baejego hejaruëhi ëhi jiavohijo. 10Röhu jabumë uho'e jio'amohijo. Jabesi uhoho vörö'e niani'ö uho va'ëne jio'amohijo. Vöröho uhore jië'ëro ë uhohuro manaere övo gö mine umibe va'ë'ö. 11Röhu ë guaeviguaevi jabesi börömo vaeromo muebejëvaje aho gua gago ëgobövi muebejaje anera sisëhoje. Ëanera hesi ihoho Hebrew jöëro uvarueje: Abaddon-ajo. O Greece jöëro uvarueje: Apollyon-ajo. Ëiho hesi bëhoho bövi bise'o ijumo'amajohoje.

12Guaeviguaevi rueruomade vavaeni'e muoho iae barë'i röhu buruhehu uvade vavaeni'e muoho niö'i gö'o rue'ë'e.

13Iae anerae övo gö minehu hëgö huaroho röhu number 6-huro hëgöho huohijo. Hëgöho huamu hejodeje God-are nuninö namijaje gold'e maratu osore osore jioromo uvavamu. 14Uvoromo ë vejö'e hëgö huaje aneraho uavavohijo: Nume anerae ëhi niö'i ëhi niö'i Euphrates jovo börömore tövëvaroho jiovo nugö'ö'amëjo. 15Jiovo nugö'ö'amëjamu rue hëgö huade anerahuro ë anerae ëhi niö'i ëhi niö'i tövëvaroho jiovo nugö'ö'amohijo ae aho'obëhe sa'are raromaruoho niö'i gemu tarioromo niö'i nugo'i gemu muo'amo'iröhego ë aneraho ëhi niö'i ëhi niö'i God-ro tövëvoromo bamëvë'ëro ë majaho ë manaeroho ë vadunoho rovego jiovo nugö'ö'amego ë sa'are aribövioho muo'amëvoröhego. 16Röhu ë anerae 4 jabesi horse-re va'arue muorovo aribövioho iae 200 million jiadeje. Ëjöho iae na hejodeje. 17Röhu ë muorovo'iröhe horse jabesi o horse va'arue muorovo aribövi jabesi nu ano'oho nia'ovoro gavodeje. Jabesi vineboho biriri'e niögohuro tugohoromo io'amë'e jiohijo. Röhu biriri'e niögu jabesi nu ano'oho kavuë'e vëni hödu va'ëne rövë'e vëni u'i va'ëne o hövë'e munë ravoromo hödu hövë'e jiajëhi ëhi jio'amohijo. Röhu horse jabesi simanoho lion jabesi simano va'ëne jio'amohijo. Röhu vëni höde vëni u'e o hövë'e munë ravoromo hödu hövë'e jiajëhi jië'oho ëho jabesi jö'ore jioromo suorovohijo. 18Horse jabesi jö'ore jioromo suorovoromo vëni hödoho o u'oho o hövë'e munë hövë'e jiajëhi jië'oho ë mu sisëhuro ae aho'obëhe sa'are raromaruoho niö'i gemu tariojaroho niö'i rëmo'i gemu ravëvo barëjadeje. 19Röhu ë horse jabesi vöröho jabesi jö'ore o jabesi uhore jiohijo. Jabesi uhoho simano'e jiohijo ëhuro ae ijumo'amo'iröhëni. Jabesi uhoho simano'e jië'ëro ëhu'ëro ë uho jabesi nu ano'oho sigobu sisë jabesi nu ano'o va'ëne jiohijo.

20Ëmu sisëhuro ëhi rueromo ijumëvo'ego a ioro'ioroho vuovëvo'i ioro'ioroho bogo vuovëvohijo. Bogo vuovëvadeje röhu inömo sisë jabesi övehu avohoromo uehorovaruoho bogo uehorovoromo vuonugo'i a'i inömo sisë gold-ehu o silver-ehu o copper-ehu o munë göehu göehu o ijehu avoho'amaroho sarerivoromo uvoruomohijo: Ëho aru'aho'e höromo uehorovemu uehorovoruomohijo. Röhu ëhi jië'e inömoho bogo uheriharueje. Bogo hejarueje. Bogo jijiharueje. Ma-momorö'öjarueje. Ëhi jië'e inömohu'o aru'aho sisëhu'o uehorovaruoho bogo vuonugo'i ëhi ma-uehorovoruomohijo. 21Ëhi ma-uehorovoromo a muo'amarue muoho bogo vuonugoromo iro oso'e muoho bogo vuonugoromo önö'e muoho bogo vuonugoromo vajiohu'e muoho bogo vuonugo'i ma-vaemu vaeruomohijo.

God-are Jögoru Iꞌoho

© Wycliffe Bible Translators, Inc. All rights reserved. More Info | Version Index