Search form

1 Korin 1

1-2Yek Pol douk God yet nohwalemu itoglu aposel umu nukage inak inek Jisas Krais ananin moul uli yenekumepagu asudak pas ipak. Yek yanu apakinu owaninu Sostenis wape ali wonekumepagu asudak pas ipak God ananipu elpech pape Korin uli. Ipak douk penek pas Krais Jisas ali God nenekepu patoglu duldulipali. Ali nohwalepamu punubu pupe ananipu atipu. Ohwak wonekasumagu ipak panu chanatimaguk elpech chape blanatimaguk walub uli. Echebuk douk chohwalu apakinu Diginali Jisas Krais ananin yeul uli. Anan douk apak manu echech apakinu atunu Diginali.

3Ohwak wakli apakinu Aninu God nunu apakinu Diginali Jisas Krais hugakomepu meyoh ali hunek ipakiluh apaluh hlulu kalbu.

Pol Nenek Tenkyumu God

4Wihlu wehlu yek yapemu yenek tenkyumu God umu agundak anan nenekepu penek pas Krais Jisas ali nagakomepu meyoh umu. 5Ipak douk penek pas Krais ali apalau chanatimaguk yopichi echudak. Echech douk echudak. Ipak palau nyanatimaguk yopinyi save, ali palau God ananin nebenyi strong umu piyagwleh enenyi enen yopinyi balan, ali umu puklipech ananin balan pukukwihen. 6Umu moneken, enyudak yopinyi balan umu Krais apak maklipepeyen uli douk nyanubu nyape dodogowin numun ipakiluh apaluh. 7Douk namudak ali nameitu abudak nyultab ipak penehilau ali pape pobeyogunmu apakinu Diginali Jisas Krais umu nutoglu yopugunmu abali, ipak douk wo tukwahepamu enenyi enen yopinyi presen douk God ananin Michin nyakepeyen uli e, wak. 8Ali Jisas Krais eke nugakomepu nunekepu piyotu dodogowipu aliga punak putoglomu ahudak hugikuk uli nyumnah. Anan eke nugakomepu namudak umu ahabuk nyumnah anan nutanamalimu, ipak eke kobi enen balan nyupenyipu, wak. 9Ali God douk nanubu nagipech ananin balan nenek ananin moul kalbaluli nohwalepu ali panaki penek pas ananinu Nuganinu Jisas Krais apakinu Diginali. Ali ipak panu anan pasuh atin tinytin.

God Ananich Elpech Chanadi-yagulmu

10Wakuli ipak Kristen! Yek douk Diginali Jisas Krais neke namba umu inek ananin moul. Douk namudak ali yek dakio yakli iklipepu dodogowiwe atuwemu pugipech enyudak yekin balan. Balan enyudak. Yek yakli ipak punatimaguk imas punubu pusuh atin tinytin. Sapos ipak punek namudak umu, ipak eke kobi punadi-yagulmu, wak. 11O ipak Kristen, enech chanaguk Klowi uli chaklipe chakli ipak yet pape panowipu palpak balan. 12Yek yaklimu enyudak. Ipak enepu pakli, “Apak magipech Pol uli.” Ali enepu pakli, “Apak magipech Apolos uli.” Ali enepu pakli, “Apak magipech Pita uli.” Ali enepu pakli, “Apak magipech Krais uli.”

13Ipak penek umu namudak? Ipak pakli Krais nanogwuduk chokunu atunu waka? Waka yek Pol yagak lowag krusemu igakomepu? Aduligu atugu wak. Ali ipak douk wo chunek baptais-umepamu yek Pol yekin yeul e. 14Yek douk yenek baptais umu Krispas nanu Gaias atum. Ali yek yenek tenkyumu God umu agundak yek wo inek baptais umu enepu alagun umu e. 15Douk namudak ali nameitu eke kobi enech elpech chuklipepu chukli echech chalau baptais umu yekin yeul, wak. 16Adul, yek yenek baptais umu Stefanas nanu ananigu nyulgu chopuk. Ali yek eke yenek baptais umu enech alagun waka wak. Enyudak yek wak idukemech e. 17Krais douk wo nuklipemu inak inek baptais umu elpech e, wak. Anan naklipemu inak iklipech God ananin yopinyi balan. Ali iklipech enyudak balan umu, yek kobi iyagwleh balan kobi douk chanubu chadukemech uli elpech cheyagwlehen uli balan, wak. Umu moneken, kedeke elpech ulkwip pulomu yek otuwe chukli yek yanubu yadukemech uli ali yaklipech balan yakukwihen kalbu. Ali echech ulkwip kobi pulamu enyudak balan umu Krais nagak lowag krusemu.

God Ananin Save Uli Strong Douk Krais Atunu

18Echebuk elpech douk chagimu ahudak yah douk eke elpech chunak chuwichuk uli chagimah uli douk chakli enyudak balan umu Jisas nagak lowag krusemu douk meyaluhin wohinyi balan. Wakuli apak douk God nape nanalawapu matanamali mape kalbaluli makli enyudak balan douk nyanubu God ananin nebenyi strong.

19Balan nyetemu God ananik buk uli douk nyakli namudak. God nakli, “Yek eke ibo echebuk douk chanubu chadukemech uli echechin save yen ichagienyuk. Ali chopuk eke ibouk echechin nyanubu yologinyi tinytin ichagienyuk.”

20Douk namudak ali nameitu amudak hanubu hadukemech uli almam amamin save eke nyugakomom malmu? Ali amudak douk hanamu nebenyi skul halau nebenyi save uli amamin save eke nyugakomom malmu? Ali chadukemech uli elpech douk nameitu chanu kipaichi chapemu chalpak balan atin uli echechin balan eke nyugakomech malmu? Wak meyoh. God douk anenek apudak atapich elpech douk chanubu chadukemech uli echechin save nyatoglu kobi douk lahahainyimu.

21God douk nanubu nadukemech uli nagipech ananin laik ali nenek echudak elpech umu echech yet chugipech echechin nebenyi save ali chubilak kobi chudukemu anan, wak. Wakuli anan nakli nulau elpech chutanamu chupe kalbamu douk namudak. Anan nakli wosik umu apak muklipech ananin yopinyi balan wolobaichi elpech. Ali echebuk douk chukli enyudak balan douk adulin ali chuhwen chugipechen uli, anan eke nunolawech chutanamali chupe kalbu. Enyudak balan apak maklipechen uli, apudak atapichi elpech douk chohwalen lahahainyi. 22Umu moneken, echech Juda douk chanubu dodogowich atich umu chakli chutik enyudak God atunu neneken uli moul. Ali echech Grik chanubu chagipech ahudak yah douk echebuk douk chaulimu wolobainyi save uli chagipechah uli. 23Wakuli apak douk maklipech balan umu chenek nyilim umu Krais lowag kruse ali chanu nagak umu. Apak maklipechen ali echech Juda chemneken ali nyenekech chanubu chakli waken. Ali echech Grik chakli enyudak balan douk lahahainyi. 24Wakuli apak Juda manu ipak Grik chopuk douk God anohwalapaluli makli enyudak balan douk nyaklimu God ananin strong nyanu save douk nyanubu Krais atunu. 25Umu moneken, enyudak God ananin balan douk elpech chohwalen umu lahahainyi uli, enyen douk nyanubu nyechalakuk elpechin save. Ali moul douk God neneken ali elpech chatulin chakli wo dodogowin uli e douk nyanubu dodogowin atin nyechalakuk elpechin strong.

26O ipak yekipu elpech, ipak wata ulkwip pulamaguk likuk susubati God nohwalepu patoglu Kristen abali. Ababuk nyultab, ipak panatimaguk douk enepu gwodipu meyoh palau wolobainyi apudak atapin save. Ali chopuk, enepu gwodipu meyoh palau nebechi yeguh, ali enepu gwodipu meyoh patoglu dodogowipali yeguh chakihepali. 27Wakuli echebuk elpech douk apudak atapichi elpech chohwalech lahahaichi uli, echech douk God ananaglahech umu chupe ananich atich. Anan nenek namudak umu nunekech ablan echudak chanubu chadukemech uli elpech. Ali echebuk elpech douk apudak atapichi elpech chatulich chakli echech wo dodogowichi uli e, echech douk God ananaglahech umu nunekech ablan dodogowichi elpech. 28Ali echebuk elpech douk elpech chohwalech yowechi meyoluhichi yeguh wakech uli, echech douk God ananaglahech umu nunek enechi enech dodogowichi echudak chunu yeguh hwakihechi elpech kobi dodogowich ali chutoglu meyoluhich yeguh wakechi. 29Anan douk nenek namudak umu kobi enen atin elpen enyen yet nyutuk enyenyin yeul nyukih umu nyukli God nutulin, wak. 30God douk nenekepu penek pas Krais Jisas ali God nenek Krais natoglu bawagas umu apakin save. Apak douk monek pas Krais ali God dakio natulupu nakli apak dudulipali elpech. Ali Krais atunu nenekapu mape God ananipu atupu. Ali natalupu nakwachih-apamu yowenyi douk nyowechik-apaluli ali nenekapu mape fri. 31Douk namudak ali God nakli apak mugipech enyudak balan nyetemu ananik buk uli. Balan douk enyudak, “Echebuk elpech douk chukli chutuk echechich yeguh chukih uli, echech imas chutuk Diginali ananin atin yeul nyukih.”

God Ananin Balan

© 2013, Wycliffe Bible Translators, Inc. All rights reserved. More Info | Version Index