Search form

Matyu 18

Agundak God Nape Nebenalimu Ananich Elpech Umu, Yeul Douk Nyakih Meinyi Elpen?

(Mak 9:33-37; Luk 9:46-48)

1Ali ababuk nyultab, amam disaipel hanamali Jisas ali hasalikanu hakli, “Omuni eke nyupe nebenyi agundak God nape nebenalimu ananich elpech umu?” 2Jisas nemnek ali nahwalu enen batowin nyanaki. Ali nalawen nenyosopu nyeyatu olokohun umu amam. 3Ali naklipam nakli, “Aduligu atugu yaklipepu. Sapos ipak kobi punek senis putukemaguk enenyi enen yowenyi ali kobi putoglu kobi chokwichimu, ipak eke kobi puwich agundak God nape nebenalimu ananich elpech umu, eke wak. 4Elpen douk nyunubu nyunek daunim umu enyen yet nyupe kobi enyudak chokwinyi batowin uli, enyen eke nyunubu nyupe nebenyi agundak God nape nebenalimu ananich elpech umu. 5Ali meichi elpech douk ulkwip pulamu yek ali chugakamu enen batowin kobi enyudak umu, echech douk chagakomu yek.”

Elpech chunek Kipahechi Chunek Yowenyili Imas Chunenek Yologi

(Mak 9:42-48; Luk 17:1-2)

6Jisas balan nyeilen ali nakli, “Sapos enen elpen nyunek enen echudak chokwichi batowich douk nyenek bilip umu yek uli nyunek enen yowenyimu, enyudak douk nyanubu nyenek yowenyi. Ali sapos chuhwen chusoh anam nebemi utam enyenyik lobik ali chuwachen nyugluk lougumu yous ele, enyen deke nyupe sisahw kwalowi ati. Wakuli namudak eke wak. 7Mapilich apudak atapichi elpech douk chapemu chenek elpech chenek yowenyili. Adul, enenyi enen yowenyi imas nyutoglu, wakuli mapilich echebuk elpech douk chuneken nyutogloluli.”

8Ali naklipech enen woblen balan. Nakli, “Sapos ipak enen enyenyis wis o yolihw nyunekenyu nyunek enen yowenyimu, orait nyak imas nyubleyech nyuwachechuk meyoh. Enyudak douk kalbamu atus ati wis o yoliluh chupemepu ali pupe kalbu eheh nyumneh. Kedeke pukli biech chupemepu atimu, ipak eke chuwachepu pugluk nyih douk hanu hape eheh nyumneh uli. 9Ali sapos anap nyakip nabep punekenyu nyunek enen yowenyimu, orait nyak nyunubu nyutukapuk meyoh. Enyudak douk kalbamu atup meyoh pupemenyu ali nyupe kalbu eheh nyumneh. Kedeke nyukli bias supemenyu atimu, nyak eke chuwachenyu nyugluk nyih douk hanu yowebuli wabul hel uli.”

10Jisas balan nyeilen ali nakli, “Ipak punenek yologi. Eke pukli pichogeik enen echudak chokwichi batowich. Adul ati yaklipepu. Echechich enselahas douk wihluwehlu chanopemu chape agundak yekinu Aninu napemu gani iluh heven.” [ 11Yek Anudak Alman yatoglu aduligeinyi elpen uli douk yanakimu igakamu chanak chawichuk uli elpech umu inalawech chutanomali chupe kalbu.]

Jisas Naklipech Woblen Balan Umu Atin Nyanak Nyawichuk Uli Sipsip

(Luk 15:3-7)

12Jisas balan nyeilen nakli, “Sapos ananu alman nunokech 100-poleich sipsip ali enen nyunak nyuwichuk ele, ipak pakli deke nunek malmu? Adul ati, anan deke nutukemaguk echudak enech 99-poleich chiyotuk anatu nukut ali wata nutanamu nunak nulimu enyudak atin douk nyanak nyawichuk uli. 13Aduligu atugu yaklipepu. Abudak nyultab nunak nugwaten abali, anan eke nunubu nunehilaumen nichalakuk kobi nenehilaumu echudak enech 99-poleich douk wo chunak chuwichuk ulimu e. 14Ali douk namudak ati. Ipakinu Aninu nape iluh heven uli douk nanubu nakli wak umu enen echudak chokwichi batowich nyunak nyuwichuk, wak.”

Apak Imas Munek Stret umu Elpen Nyenek Yowenyili

15Jisas balan nyeilen nakli, “Sapos enen ipakinyi elpen nyunek enen yowenyimu enen ipak yekipalimu, orait nyak nyunubu nyunamu enyebuk elpen, ipak atipu pupe ali nyugilapen yowenyi douk enyen nyeneken umu nyak uli. Sapos enyen nyumnek nyakin balan umu, orait nyak douk anyagabeyen nyalawen nyatanomali nyape kalbu. 16Wakuli sapos enyen kobi nyumnekenyamu, orait nyitak nyutukulmu atin o biech elpech alagun chilenyu umu ipak punatimaguk puklipen umu nyumnek ali nyutukemaguk enyenyin yowenyi. 17Wakuli sapos enyen nyukli wak umu nyumnekepamu, orait puklipu chanatimaguk God ananich elpech. Puklipech ali enyen chopuk nyukli wak umu nyumnek echech alagun umu, orait ipak iken putulin pukli enyen douk nyaduk echech wo chudukemu God uli e chanu amudak halau tagis uli almom. 18Adul ati yaklipepu. Ihenyumali yowenyi douk elpech cheneken ali ipak puhwen pupe dadag apudak atap uli, God chopuk eke nuhwen nupe dadag gani iluh heven. Ali ihenyumali yowenyi douk elpech cheneken ali ipak kobi puhwen pupe apudak atap uli, God chopuk eke kobi nuhwen nupe gani iluh heven, wak.

19Ali douk yakli iklipepu alagun. Sapos biepu pape apudak atap uli punubu atip ulkwip umu pukli pulau enech echudak ali punek beten umu pulawech umu, orait yekinu Aninu nape iluh heven uli eke nukepeyech umu atugun. 20Sapos biech o biech atin elpech chunak chuwachabal chupe anagun ali ulkwip pulomu yek umu, orait yek douk chopuk yanech mape.”

Jisas Naklipam Woblen balan Umu Apak Kobi Ulkwip Pulomu Yowenyi Kipahechi Chenekenyumopu Uli

21Pita nanakimu Jisas ali nasolikanu nakli, “Diginyali, sapos enen yekinyi nyupemu nyunek enen yowenyimu yek umu, orait yek eke kobi wata isuh enyudak enyen nyenekenyume uli yowenyi ali ikwuleyenyuk makunih? 7-poleih ati, waka?”

22Ali Jisas naklipanu namudak. Nakli, “Yek douk wo iklipenyamu 7-poleih ati e, wak. Yakli wolobaihi 490-poleih wosik.”

23“Nyak mnek. Elpech chuwich agundak God nape nebenalimu ananich elpech umu douk kobi enyudak pasin ananu king neneken ulimu. Anan nape ali nakli nuklipu ananim henemanu moul uli umu hubemanu nosog. 24Anan douk anapemu hunaki hugabe balan ali chalawali ananu douk nenek dinaumanu nebebali utabal 10 milion kina uli. 25Chalawanali ali anan wo dodogowinamu nube enyudak nebenyi dinau e, wak. Namudak ali ananinu nebenali nakli, ‘Anudak alman nunu okwok kwunu batowich chunu ihechumali echechich echudak eke kipahechi chutalich. Chutalich umu chunemech moul meyoh ali utabal chutalich umu eke blunamu ananin dinau.’

26Anudak nenek moulamu king uli nemnek namudak ali nanak nabih noduk ahlubus halakatimu anudak king ali naklipanu nakli, ‘Nya, nyak nyuneleke ali nyupe nyunobuke yalup meyoh. Dinau eke ibeyen iyatenyumenyu.’ 27Ananinu nebenali natik namudak ali nanubu nenelekanu. Ali naklipanamu dinau anyeneken nyugakuk meyoh. Ali nokleyonoguk nanak.

28Anudak nenek moulamu king uli natoglu aduk ali nogwatu ananu amam atin moul umu. Anan douk nenekanu dinau gwodubal utabal 10 kina ati. Natoglu nogwatonu ali nanubu nape nasuhwonu lobik ali nakli, ‘Aliga beme utabal likuk nyenek dinaumobol yek uli.’ 29Anudak amam atin moul umu nemnek ali nanubu nabih noduk ohlubus natau atap ali nasolikanu nakli, ‘Nya, nyak nyuneleke ali yakli nyupe nyunobuke yalup meyoh. Abalabuk utabal eke ibeyabalumenyu.’

30Naklipanu namudak wakuli anan nakli wak umu numnekanu. Nanubu nalawanu nanak nowechikanu nape haus kalabus umu nubemanu dinau aliga niyatenyumanu. 31Douk amudak anam amam atin moul umu hatik enyudak ali amamiluh apaluh hlanubu yoweluh. Ali hanak haklipu amaminu nebenalimu ihenyumali anudak neneken uli.

32Nemnek ali nahwalu anudak nenemanu moul uli. Douk nanaki ali naklipanu nakli, ‘Nyak nyanubu enenyu yowenyali nyenek yekin moul. Tik, susubati nyak nyanaki nyeleh nyablome ali yakli nyakin nebenyi dinau nyunubu nyugakuk meyoh. 33Yek douk yenelekenyu. Ali malmu namudak, umu nyak chopuk wo nyunolek anudak ipak atin moul umu e?’ 34Anudak ananinu nebenali nanubu nyihihichinu ali naklipu amudak henek was umu kalabus uli umu hulawanu hunak huwechikanu nupe numnek nyih aliga nube enyudak nebenyi dinau niyaten iyuh.

35Namudak ali sapos ipak atunu ati enech ipakichi elpech chunekumepu enen yowenyimu, orait ipakip ulkwip imas pukli adulin atin ali pukleyenyuk kobi punohwen pupe, wak. Sapos wak umu, orait yekinu Aninu nape iluh heven uli eke nugimehumepu namudak ati”

God Ananin Balan

© 2013, Wycliffe Bible Translators, Inc. All rights reserved. More Info | Version Index