Search form

Revelesen 5

Jon Natik Onok Buk Douk Chowechikok Uli

1Ali yek Jon yatik anudak alman douk netemu enyudak nebenyi sia uli nasuh onok buk ananin anin lagul. Okwudak buk okwok douk kobi enen louinyi pepa umu. Okwok douk chadalechok ali chowechikok. Ali balan chenyemu nyape numunahikwumu kwanu adukah chopuk. Ali chowechikok 7-poleih chakwu kandelis gris. 2Ali yek yatik enen dodogowinyi ensel nyape nyeyagwleh nebegun nyakli, “Meinyi elpen douk nyanubu duldulin ali nyanokwnumu nyupuhul asudak kandelis gris douk chowechik okwudak buk umu ali nyukwachihok?” 3Wakuli wak kwalowi omi chutik enen atin elpen nyape iluh heven uli o apudak atap uli o chakamu apudak atap uli douk nyanokwnumu nyukwachih okwudak buk ali nyutik numunahikw-umaluli. 4Ali douk yatik umu wo chugwatu enen elpen e douk nyanokwnumu nyukwachih okwudak buk ali nyutik numunahik-umaluli. Douk namudak ali yek yeleh nebegun. 5Wakuli ananamu amudak 24-poleim nebemi nanaki naklipe nakli, “Kwamnek! Nyak kobi nyuleh! Ananu alman apudak awilopinu yeulip umu Juda uli douk naitak Devit ananip awilop uli douk dodogowinu kobi enen wanohwinyi mahin yeulinyumu laion uli. Anan douk neyotu dodogowinu atunu nenek wanoh nabo yowenyi nyanu chanatimaguk ananich birua chabihuk. Douk namudak ali anan douk dodogowinu nanokwnumu nupuhul asudak 7-poleis kandelis gris douk chowechik okwudak buk umu ali nukwachihok.”

Jon Natik Enen Nugan Sipsip

6Ali yatiku enen Nugan Sipsip nyeyotu halakatimu enyudak nebenyi sia. Ali echudak 4-poleich dodogowichi douk michich choleyech uli chanu amudak 24-poleim nebemi cheyotu chalihi chalih enyudak Nugan Sipsip. Enyen nyublug gwapenyin kobi chan nyagak ulimu. Enyen 7-poleiluh chuwaluh hlakihen enyenyim boglom ali 7-poleis nabes sapenyin. Asudak nabes douk sakli woblen balan umu God ananich 7-poleich michich+ douk anan nakagech chanak gnanatimaguk apudak atap uli. 7Ali enyudak Nugan Sipsip nyanaki nyatulunu okwudak buk anudak douk nahwok anin lagul ali nape nebenyi sia uli. 8Douk enyen nyatuluneyok wakuli echudak 4-poleich dodogowichi douk michich choleyech uli chanu amudak 24-poleim nebemi chabih choduk ohlubus chakus halakatimu Nugan Sipsip ali chenek lotumen. Ali hanatimaguk amudak nebemi hahwech silisili ati enech echudak kobi gitahas umali chanu anas dis douk chenekas gol uli. Asudak dis douk chuknis umu enyudak paura douk enyenyig nyugus gweih kalbaluli. Enyudak paura douk nyakli woblen balan umu beten douk God ananich elpech chape cheneken uli. 9Ali echech chape cheyalub onohw nupoleihw awehw chakli,

“Nyak douk nyanubu duldul-inyali ali nyanokwnumu nyutulunu okwudak buk ali nyukwachih sunatimaguk kandelis gris douk chowechikok umu. Umu moneken, echech chanyu nyagak ali nyakig butog gwotukwle gwatal banatimaguk lainabich elpech ali gwakwachihech chape God ananich atich. Echech douk chape sanatimaguk silisilis nebesi awilas ali cheyagwleh wolobainyi silisilin tokples uli. Echech douk wolobaichi silisili iluh yegechiweluhich elpech douk chape blanatimaguk nebelubi walub kantri abudak amnab uli. 10Nyak douk anyenekech chatoglu pris douk hape henek ofamu enechi enech echudak hoku apakinu Diginali God uli. Ali anan eke nupe Nebenali nunek bosumech ali kwali echech eke chupe nebechi kobi douk nebemi king omi ali chunek bosumu chunatimaguk elpech chape apudak atap uli.”

Echech Chatuk Nugan Sipsip Enyenyin Yeul Nyakih

11Ali wata chopuk yatulugunu wakuli yemneku echudak wolobaichi God ananich enselahas echechigas nigas. Chadalehech umu douk chatoglu chanubu wolobaichi. Wolobaibi tausenab banu wolobaibi milianab. Echudak wolobaichi enselahas cheyotu chalihi chalih enyudak nebenyi sia nyanu echudak 4-poleich dodogowichi douk michich choleyech uli chanu amudak 24-poleim nebemi almam. 12Ali echudak enselahas cheyalub nebegun chakli, “Enyudak Nugan Sipsip douk seiwak chan nyagak uli douk nyanubu duldulinyi. Douk namudak ali enyen douk nyanokwnumu nyulau nebenyi yeul nyunu utabal blunu enechi enech yopichi echudak chunu nebenyi strong. Ali chopuk enyen douk nyanokwnumu nyulau yopinyi save ali nyanokwnumu apak mutuk enyenyin atin yeul nyukih. Ali enyen douk nyanokwnumu apak munubu munehilaumen ali mutuk enyenyin atin yeul nyukih ali munek lotumen.”

13Wakuli yek yemnek chanatimaguk echudak douk God nenekech chape iluh atap uli chanu echebuk douk chape chakamu apudak atap uli chanu chanatimaguk chape chakamu nebegwi yous uli chape cheyalub onohw awehw chakli,

“Apak makli chunatimaguk enechi enech echudak chunehilaumu anudak nape nebenyi sia uli nunu Nugan Sipsip. Ali chutuk echechich yeguh chukih ali chunek lotumech eheh nyumneh. Ali makli nyunatimaguk nebenyi strong nyupemu echech biech eheh nyumneh!”

14Ali echudak 4-poleich dodogowichi douk michich choleyech uli chakli, “Aduligu atugu!” Ali amudak 24-poleim nebemi almam habih hoduk ohlubus atap ali henek lotumu God nanu Nugan Sipsip.

God Ananin Balan

© 2013, Wycliffe Bible Translators, Inc. All rights reserved. More Info | Version Index