Search form

Rom 5

God nohwalapu Duldulipu Elpech

1Apak douk amasuh God ananin balan dadag magipechen ali anan natulupu nohwalapu duldulipali elpech. Namudak ali nameitu apakinu Diginali Jisas Krais nenekapu apakiluh apaluh hlolu kalbu ali manu God mape atugun. 2Apak douk monek bilip umu Jisas. Namudak ali anan meyoh nalawapali manaki mawich agundak God nagakomapu meyoh umu. Ali douk monehilau malikuk. Umu moneken, apak douk manubu madukemech umu kwali apak eke munak iluh heven mulau nebechi yeguh ali munu God mupe. 3Ali apak kobi munehilawamu enyudak atin, wak. Ababuk nyultab hevi nyutoglomapamu, apak chopuk munehilau. Umu moneken, hevi douk nyatoglomapamu mutoglu dodogowipu ali miyotu musah enenyi enen hevi. 4Ali enyudak pasin umu apak dodogowipamu miyotu musah enenyi enen nyutoglomapu ulimu, enyudak pasin eke nyunekapu mutoglu yopupali elpech ali miyotu dadag. Ali enyudak pasin umu miyotu dadag umu eke nyunekapu munubu mudukemech umu Krais eke nunaki ali nunekumapu yopinyi. 5Apak douk mape mobeyogunmu enyudak ali douk wo mupe mubeyogun meyoh e, wak. God douk anakapu ananin Michin nyapenyupu ali nyagakomapu madukemech umu enyudak adul eke nyutoglu. Enyudak ananin Michin douk nyenekapu madukemech umu agundak God anan nanubu ulkum manosuh apak umu.

6Abudak nyultab apak watak dodogowipu e ali wata mape monek yowenyi abali, Krais nanaki nagak abudak nyultab God nakliyabali. Nagak umu wata nunolau apak douk mokanu agabus God uli ali wata mutanamomu anan God. 7Aduligu atugu. Apak deke kobi enen elpen nyukli wosik umu nyugak nyugakomu enen duldulinyi elpen, wak. Ati enen atin elpen adul deke wosik gwulogolen umu nyugak nyugakomu enen nyanubu duldulinyi elpen. 8Wakuli God anan douk nanubu nagilapapamu agundak anan ulkum manubu manohwopamu. Nagilapapu namudak. Apak douk watak mape monek yowenyi atin ali nenek salimumali Krais nanaki nagak umu apak. 9Nagak ananig butog gwotukwle gwouh apak ali God natulupu nohwalapu duldulipali elpech. Namudak ali apak manubu madukemech umu Krais eke nunolawapu mutanamu mupe kalbu. Ali agundak God nyihihichi-namu yowenyi apak moneken ulimu, anan eke kobi nunekapu mulau nyih, wak. 10Likuk apak douk mape God ananipu birua. Wakuli ananinu Nuganinu wata nanaki nagak umu apak, God wata nohwalapu ananipu elpech ali nenekapu manu anan mape atugun. Krais douk nagak ali wata naitak nape. Namudak ali apak manubu madukemech umu anan eke wata nunolawapu mutanamu munubu mupe kalbu. 11Ali douk wo namudak ati e, wak. Nameitu apakinu Diginali Jisas Krais douk chopuk anenekapu matoglu God ananipu elpech. Anan anenekapu namudak ali manubu monehilaumu God.

Adam Nokwalmu Agundak Magak Umu Wakuli Jisas Nokwalmu Agundak Mupe Kalbu Eheh Nyumneh Umu

12Apak douk madukemech. Atunu alman nenek yowenyi ali enyudak pasin nyatoglu apudak atap. Enyudak pasin nyatoglu ali nyokwalmu gak. Namudak ali gak nyatoglomu chanatimaguk elpech. Umu moneken, ihech elpech chenek yowenyili atich. 13Lo seiwak God nakaguk Moses enyi douk wata nyutoglu e, ali enyudak pasin umu chenek yowenyimu nyatoglu nyape apudak atap. Wakuli lo kobi enen ele, God deke kobi ulkum mulomu ihenyumali atin ati yowenyi douk elpech cheneken uli, wak. 14Wakuli abudak nyultab Adam napenyubali aliga banak batoglomali abudak Moses napenyubali, chanatimaguk elpech douk chagak. Enech cheneken uli yowenyi douk wo kobi enyudak Adam neneken ulimu e, wakuli echech chopuk chagak.

Adam anan douk natoglu kobi anagu mak meyoh umu anudak alman luhut eke nutogloluli. 15Enyudak pasin umu God nagakomapu meyoh umu nyanu enyudak Adam neneken uli yowenyi douk wo alagunin e, wak meyoh. Adul, atunu alman meyoh nenek yowenyi ali wolobaichi elpech dakio chagak. Wakuli enyudak pasin umu God nagakomapu meyoh umu douk nyanubu nyatoglu nebeben umu anudak atunu alman Jisas Krais. God nagakomapu namudak ali nameitu apak wolobaipali douk malau God ananin yopinyi presen. Enyudak presen douk nyanubu nyechalakuk agundak chagak umu. 16Ali enyudak God ananin presen douk wo nyugimah-umapu namudak ati kobi enyudak yowenyi Adam neneken uli nyagimeh-umapamu e, wak. Adam nenek atin yowenyi ali God nene kotumapu nakli apak manatimaguk eke munak muwichuk. Apak manatimaguk elpech wata monek yowenyi wakuli God nanubu nenelekapu nakapu meyoh ananin yopinyi presen umu agundak nohwalapu duldulipali elpech umu. 17Aduligu atugu. Atunu alman nechegeik balan. Ali anan neneken uli yowenyi nyokwalmali gak. Ali enyudak gak nyape nebeben umu ihech elpech kobi nebemi king hape nebemimu. Wakuli enyudak pasin umu God nenelekapu ali nagakomapu meyoh umu douk nyanubu nebeben atin nyechalakuk enyudak gak. Ali apak manubu madukemech umu apak douk amalau enyudak God ananin yopinyi pasin umu agundak nohwalapu duldulipali elpech umu. Ali apak eke mupe nebepali eheh nyumneh kobi amam nebemi king umu. God nagakomapu namudak umu anudak atunu alman Jisas Krais neneken uli pasin atin.

18Namudak ali apak madukemech namudak. Atunu alman nenek atin yowenyi ali apak manatimaguk mape sisahw deke munak muwichuk. Wakuli wata namudak ati. Atunu alman nenek atin duldulinyi moul ali God natik namudak wata nohwalu manatimaguk duldulipali elpech. Ali douk nenekapamu mupe kalbu kobi mugak, wak. 19Atunu alman nechegeik balan namudak ali wolobaichi elpech chatoglu chenek yowenyili atich. Ali namudak ati. Atunu alman wata nasuh balan nagipechen namudak ali wolobaichi elpech eke chutoglu duldulichi. 20Chapemu chenek yowenyi namudak aliga enyudak God nakaguk Moses enyi lo nyatoglu. Nyatoglu douk chemneken ali chanubu chenek wolobainyi yowenyi. Echech chenek wolobain atin yowenyi, wakuli God nechalakuk enyebuk ali nagakomech meyoh. 21Likuk enyudak yowenyi nyape nebeben ali dakio nyokwalmali gak. Ali nameitu douk namudak ati. Anudak God nagakomapu meyoh umu douk gnonowachak gnape nebebegun. God nagimeh namudak nohwalapu duldulipali elpech umu eke mupe kalbu eheh nyumneh. Anan nenekumapu namudak umu enyudak apakinu Diginali Jisas Krais neneken uli moul.

God Ananin Balan

© 2013, Wycliffe Bible Translators, Inc. All rights reserved. More Info | Version Index