Search form

Rom 6

Apak Douk Amanu Krais Magak Atugun

1Namudak ali apak eke mukli moneken balan. Ati mukli apak mupemu munek yowenyi namudak ati umu God nupemu nugakomapu meyoh namudak ati, waka? 2Aduligu atugu wak. Apak douk kobi amagak ulimu. Ali enyudak pasin chenek yowenyimu douk amatukemenyuk. Ali namudak malmu, umu nameitu wata mupe munek yowenyi namudak atimu? Namudak wak. 3Ipak douk padukemech waka wak? Apak manatimaguk douk monek baptais umu agundak monek pas Krais Jisas umu. Ali chopuk mananu magak umu agundak monek pas anan umu. 4Namudak ali agundak apak monek baptais umu douk manu Krais magak alagun ali God nanugamapu atugun. Nenek namudak umu apak chopuk eke mupe mugipech nupolein pasin kobi God nakwu ananin nyanubu nebebenyi strong nohuli Krais naitakimu.

Apak Douk Eke Munu Krais Mupe Eheh Nyumneh

5Apak adul monek pas Krais ali mananu magak kobi anan nagak umu. Ali namudak ati. Apak douk amonek pas anan ali adul eke munubu munanu mitaki matmat kobi anan anaitaki matmat umu. 6Apak madukemech. Enyudak nyalik nyapenyu-paluli yowenyi pasin douk nyanu Krais nyagakuk lowag kruse umu God nubouk enyudak strong douk nyape nyenek yowenyi pasin nyapenyu-paluli. Namudak ali enyudak yowenyi pasin umu chenek yowenyimu kobi wata chopuk nyuwechikapu, wak. 7Umu moneken, chagak uli elpech, enyudak strong umu chenek yowenyimu douk awata nyuwechikech ati e, wak.

8Apak adul monek pas Krais ali kobi mananu magak umu. Namudak ali manubu monek bilip umu apak eke wata munanu mupe kalbu. 9Umu moneken apak madukemech. Krais nagak wata chopuk naitaki ali eke kobi wata nugak, wak. Gak douk wo dodogowin umu wata nyuwechikanu e, wak. 10Anan douk nagak atuh meyoh ali ahabuk atuh meyoh nagak umu douk nanubu nechagiyuk enyudak strong umu chenek yowenyimu. Kwali eke kobi wata nugak ati, wak. Ali nameitu napemu douk nape kobi God naklimu, umu natuk anan God ananin yeul. 11Ali ipak douk namudak ati. Ipak punobuk ulkwip pukli ipak adul apagak ali pabouk enyudak strong umu penek yowenyimu nyabihuk. Pukli ipak douk penek pas Krais Jisas ali pape kobi God naklimu. 12Ipak kobi pulalimu yowenyi nyune bos umu ahludak ipakiluh yegechiweluh douk isave hlagak hlatalaluli, wak. Kedeke yowenyi nyusonukepamu pugipechuk enyudak ipak oub baitakumen uli yowenyi pasin. 13Kobi wata chopuk pulalimu anaguniluh umu ipakiluh yegechiweluh hlunamaguk punek enen yowenyi, wak. Wakuli ipak imas pukanu ipak yet God ali pupe kobi elpech douk chagak ali wata chopuk chaitaki chape ulimu. Ali ipak chopuk imas pukanu ihaguniluh umu ipakiluh yegechiweluh God umu nukwipamu duldulinyi pasin atin. 14Yowenyi kobi wata nyunek bosumepu, wak. Umu moneken, ipak douk awo pupe chakamomu lo pugipechen e, wak. Nameitu ipak douk pape chakamomu agundak God nagakomapu meyoh umu.

Apak Imas Mupe Munek Moulamu Yopinyi Pasin

15Nameitu apak awata mupe chakamomu enyudak lo God nakaguk Moses enyi ali mugipechen e, wak. Nameitu douk mape chakamomu agundak God nape nenelekapu ali nagakomapu meyoh umu. Ali douk malmu? Ati mape namudak ali eke kalbamu wata mupe munek yowenyi, waka? Aduligu atugu wak. 16Ipak douk padukemech. Sapos ipak pukanu ipak yet ananu nebenali pupe chakamomu anan pupe punek ananin moul umu, namobuk ipak douk pagipech ananin balan kobi nowechikepu pape penemanu galibagamu. Ali douk namudak ati. Pukli pugipech yowenyi pasin umu, luhut enyen eke nyunekepu pugak. Wakuli pukli pugipech God ananin balan umu, luhut anan eke nuhwalepu duldulipali elpech. 17Adul, likuk ipak douk pape chakamomu yowenyi pape penemen galibagu. Wakuli God wata nagakomepu pemnek ananin chaklipepu enyi balan ali panubu pakli adulin atin pahwen pagipechen. Namudak ali apak douk monek tenkyumu God umu enyudak. 18God nakwachih-epaguk umu yowenyi pape fri ali nenekepu pape chakamomu Anan pape pagipech ananin duldulinyi pasin.

19Ipakin tinytin douk wata dodogowin umu pugamu pudukemech e, watak. Namudak ali yakli iku apak elpechin meyoh apakin tinytin ali iklipepu enyudak balan. Likuk ipak douk pape chakamomu yowenyi penemen galibagu ali pakwu anaguniluh umu ipakiluh yegechiweluh penek yowenyi nyanabosusih uli pasin nyanu enenyi enen yowenyi alagun. Penek yowenyi namudak ali nyanubu nyowechikepu dadag meyoh. Wakuli nameitu ipak imas pukanu ipak yet God, pupe chakamomu anan umu punek ananin duldulin pasin punubu pupe ananipu atipu. 20Likuk abudak nyultab yowenyi nyowechikepu dadag pape penemen galibagas abali, enyudak enen duldulinyi pasin douk wo nyuwechikepu e, wak. 21Likuk ipak penek yowenyi pasin ali nameitu douk palau ablan umu enyebuk pasin. Ali ipak douk palau monekech yopichi echudak umu enyudak likuk peneken uli yowenyi? Ati wak. Enyudak pasin douk nyokwalmu gak atin. 22Wakuli nameitu God anakwachih-epaguk umu enyudak yowenyi ali pape fri. Nakwachihepu ali neposopu pape chakamomu anan pape penek ananin moul. Ali eke pulau yopichi echudak namudak. Eke punubu pupe ananipu atipu punek duldulin atin ali kwali eke punubu pupe kalbu eheh nyumneh. 23Yowenyi isave nyekech pe echebuk elpech douk chapemu cheneken uli. Enyudak pe douk chagak. Wakuli enyudak God nakapeyen meyoh uli yopinyi presen douk enyudak. Eke munubu mupe kalbu eheh myumneh. Apak douk monek pas Krais Jisas ali eke nunekapu mupe namudak.

God Ananin Balan

© 2013, Wycliffe Bible Translators, Inc. All rights reserved. More Info | Version Index