Search form

Aposol 12

Bangabangana Ke Maro Ipadu Pita Du Tana

1Ye kene tani in Erot Agiripa yo iyei tool kuto mai a matan kala tana kidi Isrel le imot i, in ikamata di tooltool yo lo tigaua ye bareme ke Yesu nga, le imadit tina ngan le iparama di kapala a igarung di. 2Ngan le iwete a tiraumata Yemis yo Yowan toonoo i, in ye pul ke patokongo le imata. 3Ngan Erot tani in ikamata di Yuda ben lodi ponana ye dada yo iyeii i, le nga iwete a tikaua Pita a tiparama lapau. Ngan dada tani yo tiyeii pang Pita i, in pombe ye lal maiyoko kidi Yuda yo be tikana porong yo taukan so be iyeii a isung i. 4Le nga tikaua Pita tani in a tiparama, motong la be tikauu la titaru lo rumu dook tiap kidi talnga dikidiki lono nga, ngan le la itaru lo di tooltool ke patokongo yo budanga pai nga, ngan baedi. Di ngan tiparlon ye urata ke kodenge, inbe matadi kala. Ngan di tooltool ke patokongo tina yo budanga pai nga, ngan budanga atu ngan di tooltool ki pai. Ngan Erot tani in lon kaua urata nen, be ole inam le lal kidi Yuda yo be lodi tut ye Paskimoolooningi ke Maro in imot ngan, lo ngan be ipadu Pita si tana, a nen ngan si ipatokode le ikodo mallangana ye di tooltool le imot matadi, inbe ikarata betanga ki.+

5Ngan nen le Pita tani in tikodokala sila iyepe nango la rumu dook tiap kidi talnga dikidiki lono ngo. Bong di tooltool yo tigaua ye bareme ke Yesu nga, ngan tipatarau le guradi pang Maro be iloni.

6Le nga ye bong tani yo be muntu ngan ole tikaua Pita lo ikodo ye ni ke karatanga betanga nga, ngan tipauu ye ooroo medana ru le iken kataunu kidi tooltool ke patokongo ru. Inbe di tooltool kapala yo ke patokongo nga, ngan tikodokala dada ke rumu dook tiap tani in. 7Ngan Pita ikenen, inbe pattu leu be bangabangana ke Tool Mai atu pombe, le tina nunngana ilangaraia rumu dook tiap kidi talnga dikidiki tani in lono. Motong la bangabangana tani in ipodo Pita madini, inbe ipoongoo a iwete panga nen, “Ai, kumadit tarai.” Ngan le ooroo medana tina yo tipauu ye nga, ngan posok posokbe ye baene a imol du tana.

8Motong la bangabangana tani in iwete panga nen, “Kuparir taraia sousoungu kiong in, inbe kuparir loningi ke kem ngan.” Le nga Pita iyei ben tina yo bangabangana tani in iwete panga nga. Motong la bangabangana tani in iwete pang Pita mulu nen, “Kusousou taraia ye sousoungu matolene kiong in, inbe kuman man kutoo au.” 9Le nga Pita imadit tina ngan le yege rumu lono tani, inbe itoo bangabangana tani a be idu pang tana. Bong ngan Pita lon tar ben so yo bangabangana tani in iyei panga nga, ngan o moolmool tiap, le iyeisa nga o imi leu. 10Ngan yaru tipa le du tikapusu tool ke patokongo tina ngan atu, motong la du tikapusu san, le nga tipa le du pombe ye dada medana yo be tipas ye a tidu tana, ngan ole du pombe ye malala mai i. Ngan dada tani in tikarata ye pat medana, bong ya taun koon panganga, inbe yaru tipa ye a tidu pang tana. Le nga yaru titoo dada atu a tila kasin mulu, motong la palbe leu inbe bangabangana tani in iyege Pita.

11Ngan bangabangana tani in iyege, motong la se Pita matan galanga le nga lon wete nen, “Ai, nookoot nga la lok galanga moolmool nen, Tool Mai la iwanga bangabangana ki a isi be si ilonau a ipamulau ye Erot baene, inbe ye so le imot yo di tooltool kidi Yuda lodi kaua urata ye be iyei pau nga.”

12Ngan Pita tani in lon galanga ben Maro la iloni i, motong la ipa so le la pombe ye rumu ke Madia yo Yowan tinana i. Ngan Yowan tani, in tikiui ene san ye Maka lapau. Ngan di tooltool malala mai la tigaua ye rumu tani in a tiyepe, inbe tipatarau nga. 13Le nga Pita ila, motong la lo ikodo ye dada ke rumu tani, inbe ipitpit nga. Ngan le garup kapraingi atu yo ene Roda i, in ila be la iso dada. 14Bong yeisa be kene yo ikilala Pita kalngana ye in nga, ngan le lon ponana le lon ponana kaiye le iso dada tiap, inbe idada a imulu lo iwete pang di tooltool yo tiyepe rumu lono ngan nen, “Ai, Pita la man ikododo ke diki ni.”

15Ngan Roda iwete nen, motong la di tooltool tina ngan tiyei ne, “Ona, ong i nga o kuyei kapa, too?” Bong ngan Roda tani in isootoo betanga pang di nen, “Tiap, ayei kapa tiap! Moolmool yege, Pita tani nani la man ikododo ke diki ni.”

Motong la di tooltool tina ngan tiwete panga nen. Tiyei ne, “Tiap, o bangabangana ki la kumata i, too?”+

16Bong ngan Pita tani in ipitpiti dada le ikenen leu. Motong la tila be la tiso dada, ngan tikamata le tina titakrai welewele. 17Le nga iyei tomonai pang di ye baene be kin tiwetewete be. Motong la igasa pang di ye so yo Tool Mai iyei panga rumu dook tiap kidi talnga dikidiki lono a le ikauu a isi tana nga. Motong la iwete pang di nen, “Nga ole la kawete pang Yemis iye di diene kapala yo titara lodi medana pang Yesu nga, ngan ye so yo pombe pang yau nga.”+ Motong la iyege di sila tiyepe, inbe ila pang ye malala san mulu.

18Ngan ye bong tani in tiken a du muntu, ngan di tooltool ke patokongo tina ngan tikamata Pita yo iyepe tiap nga, le nga titakrai, inbe lodi sarere ye soo so yo pombe pang ye Pita i. Le nga di tapdi tipartor nen, “Ona tiap, Pita i nga ila ngai na?” 19Motong la Erot ilongo betanga ben Pita iyepe tiap, le nga iwete pang di tooltool ki be la tisere, bong ngan tipuske tiap. Le Erot tani in katen malmal a itor panin di tooltool ke patokongo yo matadi kala Pita nga, ngan lodi galanga tiap. Ngan nen le iwete a tiraumata di tooltool ke patokongo tina a timmata. Motong la Erot imadit a iyege Yudia, inbe ipa a idu pang malala mai Sisaria be du iyepe kasin nango.

Erot Agiripa Imata

20Erot tani in du iyepe nango, ngan le katen malmal dook tiap pang di tooltool ke malala mai Taia le Saidon. Ngan iyei nen, le nga di tooltool yo timuku pang di nga, ngan tigaua, inbe tila pang ye be la tikamata, a be nen ngan tiye tikarata betanga, yesoo di tooltool ke Taia le Saidon tina ngan kanakana nga, ngan tikap kaningi pang di ye tana mai yo Erot matan kala i. Motong la di tooltool tina ngan tila muku ye Balastus, tool kuto mai tani yo Erot itaru be matan kala rumu le so ki i, in la tiye tiwetewete a tikarata betanga a be nen ngan isu di ye betebetanga. Motong la tiye tool kuto mai tani tila pang ye Erot be la tikamata a titoru, a be nen ngan katen sil ngan iye di tigauagaua mulu.

21Motong la Erot tani in itara lal atu yo be la tikamata ye i. Le nga tilo ye lal tani in, motong la Erot itar moro ki yo ke be ipaposi ben ya in tool kuto mai yo matan kala tana mai tani in le imot i, in lo tinini, inbe lo iwur ye kookoowoo ki ke burungu, inbe iwetewete pang di tooltool tina ngan. 22Di tooltool tina ngan tilongo Erot tani yo iwetewete nen nga, le nga koodi inbe tiwete nen, “Ona tiap! I maro atu kalngana la amlonga i! Tool sa kalngana nen tiap!” 23Ngan di tooltool tina ngan koodi pang Erot nen, ngan le lono be iyitmaka Maro ene tiap, le tina pattu leu inbe bangabangana ke Tool Mai atu irauu le matamatenge maiyoko ikauu, inbe kiwiu tikani le le imata.

24Bong betanga ke Maro in ipa a ingaua ni mai i le imot.

25Ngan Banabas iye Saolo yaru tiyei porai urata kidi Yerusalem a imot. Motong la be yaru timulu a tidu pang Antiok nga, ngan le tikaua Yowan yo tikiui ene san ye Maka i, in lapau a tiye tidu.

Rau Ke Maro

© Wycliffe Bible Translators, Inc. All rights reserved

More Info | Version Index