Search form

Yowan 19

Pailot Iwete Be Tipatoto Yesu Lo Kai Palasingi Kaini

1Di Yuda koodi nen, motong la Pailot iwete pang di tooltool ke patokongo a tikaua Yesu la tisaliti ye ooroo medana. 2Inbe tikaua ooroo yo dongana iso in a titali, inbe titaru lo Yesu kutono. Motong la tisousouu ye sousoungu yo kooroonoo dook mata i,+ 3inbe tiyei sere ye a tipa a tilo be tisi inbe tiyei ne, “Aa, tool mai yo matam kala di Yuda le imot i, kemai dook!”

4Motong la Pailot tani in ipas mulu a idu tana du iwete pang di Yuda tina nen, “Kakamata, nga ole akauu a isila pang yang, bong lomim galanga nen, au i apuske touo so sa yo tool i ikapsap ye, nga tiap.” 5Le nga ye kene yo Yesu be ipas ye in nga, ngan ooroo yo dongana iso a titali i, inbe sousoungu kooroonoo ngan iken tinini, inbe ipa ye a idu pang tana. Motong la Pailot iwete pang di nen, “Kakamata, tool tani bi!”

6Yeisa be di tooltool maimai ke paroranga so pang Maro tiye di bianga be tikamata, yo ngan tina le oorootang inbe koodi le mai. Tiyei ne, “Kapatota lo kai palasingi kaini a imata! Kapatota lo kai palasingi kaini a imata!”

Di tooltool tina koodi nen, bong ngan Pailot iraua betanga kidi nen, “Ang tapmim kakauu la kapatota lo kai palasingi kaini. Au i apuske touo so sa yo tool i ikapsap ye, ngan tiap.”

7Motong la di Yuda tiraua betanga ki nen, “Ger kiam atu in iwete nen, tool be iyei nen ngan ole imata, yesoo iwete be ya in Maro Natunu.”

8Pailot ilongo di Yuda yo tiwete nen nga, le itattadai welewele. 9Le nga imulu a ilo rumu lono lo itoro Yesu mulu nen, “Ai, ong i kupa ke ngai?” Bong Yesu mala be iwete touo kan betanga siap. 10Motong la Pailot iwete panga nen, “Nga yelei a lom be kuraua betanga kiau tiap nga? Ong i o lom galanga yau tiap, too? Au i gurana kiau ke be amalum yong a kula, inbe gurana kiau ke be awete a tipatotong lo kai palasingi kaini.”

11Pailot iwete nen, motong la Yesu iraua betanga ki nen, “Kumata be Maro yo iyepe ete ni, in ikap gurana pong tiap nga, ngan o taukam gurana yo ke be kudada pok nga. Ngan nen le tool yo itarau la baem i, in noonoo ki mai san le illos noonoo yo kiong nga.”

12Ngan Pailot ilongo tina yo Yesu iwete nen nga, le nga ikapye be isere dada yo be imalum panga a ila ye i. Bong ngan di Yuda tina ngan koodi tootoo panga nen, “Tool yo iwete be ya taunu in iyei tool kuto mai pang tana i le imot i, in koi ke Sisa. Le kumata be kumalum pang tool in a ila nga, ngan ong in tool ke Sisa tiap.”

13Pailot ilongo tina yo di Yuda tiwete nen nga, le nga lo ipamulu Yesu a isi tana, inbe ya in sila iwur ye kookoowoo ke tool ke karatanga betanga, ye ni atu yo tiweta ye Pat Somai Menmenngana i. (Ngan ni tani in ye di Ibru koodi ngan tiweta ye Gabata.) 14Ngan ye kene tani in lal kidi Yuda be tipare kaningi pang lal maiyoko kidi yo be lodi tut ye Paskimoolooningi Ke Maro ye i. Ngan ke ise a isolo kati kataunu kat ye so ben ke matana sangaul be ru oo. Motong la Pailot iwete pang di Yuda tina nen, “Kakamata, tool kuto mai tani yo matan kalang le imot i, in bi.”

15Bong ngan di Yuda tina koodi le mai nen, “Kakauu a ikoo! Kakauu a ikoo! Kupatota lo kai palasingi kaini a imata!”

Ngan koodi nen, le nga Pailot iyei ne, “Nga yelei, be apatoto tool kuto mai yo matan kalang le imot i, in ilo kai palasingi kaini, too?”

Motong la di tooltool maimai ke paroranga so pang Maro ngan tiraua betanga ki nen, “Am nga, tool sa mulu be iyei kuto mai a matan kalam, nga tiap, bong Sisa ya taleu.”

16Le nga Pailot imalum pang di a itara Yesu la di tooltool ki ke patokongo baedi be la tipatota lo kai palasingi kaini.

Tipatoto Yesu Lo Kai Palasingi Kaini

(Matiu 27:32-44; Maka 15:21-32; Luka 23:26-43)

Motong la di tooltool ke patokongo tina tikaua Yesu a tila. 17Ngan ya taunu ikooroo kai palasingi ki, inbe tiyege malala mai a tidu ke diki, motong la tila pang ye ni atu yo tiwete ene ye Tool Kutono Ruruana i. (Ngan ni tani in ye di Ibru koodi nga, ngan tiweta ye Golgata). 18Tila ye ni tani, motong la tipatota le ipa ye di tooltool ru lapau a tilo kai palasingi kaini nga. Ngan le yaru tituku ye madini tina yo ru nga, inbe Yesu in ituku ke kataunu.

19Motong la Pailot iwete le tiwodo betanga pattu ilo ye siri, inbe tirauu lo kai palasingi kutono ke Yesu. Ngan betanga tina ngan iwete nen: YESU KE NASARET, Tool Kuto Mai Yo Matan Kala Di Yuda Le Imot I. 20Ngan Pailot iwete le betanga tina ngan tiwodo le tiportak ye di Ibru le di Latin le di Girik koodi. Ngan ye ni tani yo tipatoto Yesu lo kai palasingi kaini ye i, in potai pang ye malala mai lapau. Le di tooltool ke Yuda alunu la man tikamata betanga tina ngan a tikinkati nga. 21Motong la di tooltool maimai ke paroranga so pang Maro ngan tila la tiwete pang Pailot nen, “Ai, nga yelei a kuwodo betanga ngo be ‘Tool Kuto Yo Matan Kala Di Yuda Le Imot,’ in nga? Bong be nen ngan kuwodo nen, ‘Tool I Iwete Be Ya In Tool Kuto Mai Yo Matan Kala Di Yuda Le Imot I.’ ”

22Tiwete nen, motong la Pailot iraua betanga kidi nen, “Dookoot, soo betanga yo awete a tiwodo koot nga, ngan tiwodo oo.”

23Ye kene tani in di tooltool ke patokongo tina ngan tipatoto Yesu lo kai palasingi kaini a imot, motong la tikap lonloningi ki a tipoto le iken ye budanga pai. Inbe di pai timalimi di ye so tina. Inbe tikaua sousoungu mooloo ke Yesu in lapau a tikamata ngan sousoungu ki tani in tikap touo wam sa matana ki ki a tisaii ye tiap, bong wam ataleu la tisaii ye ke ete a ipa so le idu lopo i. 24Le nga di tooltool ke patokongo tina ngan di tapdi tiwetewete nen, “Nga o ke be tasarraki tiap. Bong be nen ngan takatte madamada ngan ole madamada ipaposo sei tool yo be ikaua sousoungu i.”

Ngan dada yo tiyeii i, in le iyeie betanga tina yo iken ye Rau ke Maro nga, ngan le kanono pombe moolmool. Ngan betanga tina ngan iwete nen,

“Ole timalimi lonloningi kiau nga, a tikap pang di.

Inbe ole tikatte madamada a be nen ngan madamada ipaposo tool yo be ikaua sousoungu mooloo kiau i.” -

Le dada i la di tooltool ke patokongo tiyeii i.

25Ngan di garup pattu yo tikodo potai pang ye kai palasingi ke Yesu nga, ngan Yesu tinana, iye Yesu tinana kase, inbe Madia yo Kelopas rimana i, in iye Madia san yo ke malala mai Makdala i. 26Ye kene tani in Yesu be matana nen, ngan ikamata tinana, inbe galiunu yo lono panga mai san i, in ikodo potai ye nga. Motong la iwete pang tinana nen, “Tinak, natum tamoto nain.” 27Motong la iwete pang galiunu tani in nen, “Garup in ong tinam.” Le ye kene in galiunu tani, in imadit tina le ikaua Madia a yaru tilo rumu ki lo iye tiyepe a matan kala.

Yesu Imata

(Matiu 27:45-56; Maka 15:33-41; Luka 23:44-49)

28Yesu in lon galanga nen, urata ki yo be iyei ngan imot oo, le nga iyei ne, “Au i moorookau.” - Ngan betanga yo iwete nga, ngan le iyei betanga tina yo iken ye Rau ke Maro nga, ngan le kanono pombe moolmool. 29Ngan bor atu yo ooroo wain surunu malingene iken ye i, in iken potai lapau. Le nga tikaua so ben punpun a tisilia du ye ooroo wain surunu tani, inbe tisuiu ye pi kaini, motong la tisulmaii lo pang ye koonoo. 30Yesu iyini touo wain malingene tina ngan kasin a imot, motong la iwete nen, “Imot oo.” Iwete nen le tina gurin maloi, inbe imooroon pattu leu le imata yege.

31Ngan ye ke tani in di Yuda be tipare kaningi pang lal maiyoko kidi ke sungunu yo be bongbongini ki ngan pombe i. Ngan nen le di Yuda lodi be tiyege di tooltool tina ngan bobodi sila tituku kai palasingi kaini ye lal kidi ke sungunu, nga tiap. Le nga tila pang ye Pailot be la titoru a be imalum nga, ngan la tiraukat di tooltool tol tina ngan kedi, a nen ngan be timmata nga, ngan tiyun bobodi isi tana. 32Le nga tila titor ngan Pailot imalum, motong la di tooltool ke patokongo tina ngan tila la tiraukat tool tina ngan atu yo ituku kai palasingi kaini ke Yesu madini i, in kene. Motong la tila tiraukat san yo ituku ke Yesu madini san, in kene lapau. 33Bong ye kene yo tila ye Yesu nga, ngan tikamata tina yo imata koot nga, le nga tiraukat kene tiap. 34Motong la di tooltool ke patokongo tina, ngan atu ikaua yu a ikurumbono Yesu madini ye. Ngan le pattu leu be rara ipa ye ran irara ye madini a isi. 35(Ngan tool yo ikamata so nga i, in ya taunu la ikaua bingi ye i, a be nen ngan ang lapau katara lomim medana ye. Ngan betanga yo ikaua bingi ye nga, ngan moolmool. Inbe ya taunu lapau, lon galanga be betanga yo nga moolmool.) 36Ngan so tina nga pombe nga, ngan le iyeie betanga atu yo iken ye Rau ke Maro i, in le kanono pombe moolmool. Ngan betanga tani in iwete nen, “Tiraukata turana siap.” - 37Inbe betanga san yo iken ye Rau ke Maro lapau, in iwete nen, “Di ngan ole matadi pang ye tool atu yo tikurumbono madini i.” -

38Ngan so tina ngan pombe a imot, motong la Yosep ke malala Arimatia in ila la itoro Pailot a be imalum ngan la ikaua Yesu bobono. Ngan Yosep tani in Yesu galiunu atu lapau, bong itattadai di Yuda le ya taun ipaposi la mallangana tiap. Le nga la itoro Pailot, ngan Pailot imalum panga, motong la ila la ikaua Yesu tani in bobono a ila. 39Ngan Nikodimas, tool tani yo muku ngan ila ye Yesu bong la yaru tiwetewete i, in ya lapau iyei Yosep ene a yaru tila. Tila ngan ikap kai surunu yo tikarata ye kai ru yo edi mir inbe alos nga. Ngan kai surunu tina yo ikap nga, ngan mai le imoo dook.+ 40Le nga yaru tikaua Yesu bobono a tila, motong la titi kai surunu tina ngan ilo ye tinini, inbe tipiuu ye wam kookoonoo le titoo momo kidi Yuda yo tiyei ye di tooltool matedi nga. 41Ngan ye ni tani yo tipatoto Yesu lo kai palasingi kaini ye i, in kumu atu iken potai pang ye lapau. Inbe kumu tani in tikarata agoro ke di matenge paunu atu ye, bong titar touo tool matene sa bobono ye tiao. 42Ye kene tani in di Yuda be tipare kaningi pang lal kidi ke sungunu. Ngan agoro tani ke tarungu di matenge i, in iken potai lapau. Le nga Yosep iye Nikodimas tikaua Yesu bobono la titaru ye agoro tani in.

Rau Ke Maro

© Wycliffe Bible Translators, Inc. All rights reserved

More Info | Version Index