Search form

Luka 17

Dada Dook Tiap Yo Be Igarung Di Tooltool Lodi I

(Matiu 18:6-7, 21-22; Maka 9:42)

1Yesu iwete pang di galiunu nen, “So matana matana la be pompombe, ngan ole igarung di tooltool le tikapsap ye dada dook tiap ke noonoo nga. Bong atoo, tool yo be iyei dada dook tiap moonoo nen a pombe pang ye di tooltool le be tikapsap ye noonoo i, in ole Maro iyemenaii le dook tiap yege. 2Ngan kumata le tool tani in be isokkara di kakase yo maimai tiap ngan atu lono, le be ikapsap ye noonoo nga, ngan tool tani in ole isolo urata moonoo dook tiap. Le moolmool, kumata be tituku pat somai yo ke raunganingi dingding patunu ngan atu lo gurini, inbe tikatte du tiek lono a be nen ngan idadup a imata nga, ngan ben dook kasin, yesoo bong urata moonoo dook tiap yo be isola ye dada dook tiap ki tani yo iyeii i, in ole dook tiap le dook tiap ki taunu. 3Le be nen ngan ang tapmim lapau, kin kakamatang dook leu.

“Ngan kumata em atu be iyei dada dook tiap ke noonoo pong nga, ngan kula ye la kuwete panga a kupassonga ye dada. Kumata le be ilongo betanga kiong le be iportaka lono nga, ngan lom panga a kugiri noonoo ki. 4Le kumata be em tani in iyei dada dook tiap ke noonoo pong a iman iwete pong be iportaka lono oo, lo ngan be iyei dawa ben yo muku nga, ngan mulu le lo limi be ru ye ke atu nga, ngan be nen ngan lom panga a kugiri noonoo ki.”

5Di aposol ke Yesu tiwete panga nen, “Tool Mai, am nga lomam be kuyeie lo medana kiam yo amtaru pong i, in le lo mai.”

6Motong la Tool Mai tani in iwete pang di nen, “Ngan dook mata, bong kumata be lo medana kiang yo kataru pang Maro, in mai tiap le dawa ben kai mastet patunu leu nga, ngan ke be kawete pang kai somai i nen, ‘Kugamong le kupa ye ramim, inbe du kupe ong meneng tiek pono ni,’ ngan ole ilongo betanga kiang a itoo.”

7Motong la Yesu iwete mulu nen, “Be ang tina nga atu be iwete pang kapraingi ki la itara tana ye kumu ki, too be la matan kala di sipsip ki nga, ngan ye kene yo be kapraingi ki tani in imulu a iman pang rumu ki nga, ngan ole iwete panga belei? Ole iyei ne, ‘Kupa tarai se kuwur, a nen ngan kon so,’ too? 8Tiap! Ole iwete pang kapraingi ki tani in nen, ‘Kudawai kaningi kiau nga, lo ngan be kukaratong le dook, inbe kuso kaningi kiau tina a kop man akan. Ole akan be ayin muku le kapok sung ngan, lo ngan be ong kon be kuyin mur kooti.’ 9Ngan lom belei, ole iwete lo ponana ki sa pang kapraingi ki tani yo iwete panga ye soo urata ngan le ilongo koonoo a iyeii, in lapau, too tiap? Tiap! 10Ngan nen le ang lapau be kayei porai urata yo Maro iwete pang ye be kayei ngan le imot nga, ngan kawete panga nen. Kayei ne, ‘Am nga ben di kapraingi kiong sokorai leu, le soo urata kiong yo kop pam be amyei nga, ngan ampas le amyei leu.’ ”

Yesu Ikarata Di Tooltool Sangaul Atu Yo Botoboto Medana Ikan Di Nga

11Motong la Yesu itoo dada a be ilo pang Yerusalem. Ngan le ipa kataunu ye ker ke malala mai ru yo Samaria inbe Galili nga. 12Le nga ipa a ilo be lo pombe ye malala kase atu, ngan di tooltool sangaul atu yo botoboto medana ikan di nga, ngan man titauaraii dada mai. Le nga la tikodo manga mooloo ye kasin, 13inbe koodi le mai. Tiyei ne, “Atoo, Yesu! Tool mai, lom pam a kulonam!”

14Motong la Yesu ikamata di le iwete pang di nen, “Kamulu a kalo, ngan le lo ang tapmim kapatnai tinimim pang di tooltool ke paroranga so pang Maro nga.” Le nga be tipa a timulu a tilo, ngan botoboto kidi tina ngan imapmap le tinidi dook mata mulu.

15Motong la di tooltool tina ngan atu in ikamata tinini ngan dook mata mulu nga, le nga imulu tak pang ye Yesu a idu, ngan lon ponana le koonoo le mai, inbe iyitmaka Maro ene. 16Ngan ipa le idu potai ye Yesu, motong igun turunu le du damon toko tana kene punu, inbe iwete lo ponana ki panga. Ngan tool tani in tool ke Samaria.

17Yesu ikamata le nga iyei ne, “Ai, ayeisa ang tooltool tina yo sangaul nga, ngan la akaratang le imot a tinimim dook mata mulu nga. Bong ngan di diem yo limi be pai nga, ngan tila ngai? 18Yelei, di tooltool tina ngan sa lono be imulu a iman iyitmaka Maro ene tiap, la le tool ke malala san i, ya taleu imulu a iman be man iyitmaka Maro ene nga?” 19Motong la Yesu iwete pang tool tani in nen, “Oo, kumadit a kula. Lo medana kiong yo kutaru pau i, in la Maro ikaratong ye a le tinim dook mata mulu i.”

Tool Moolmool Ke Maro Ole Pombe Mallangana

(Matiu 24:23-28, 37-41)

20Ye kene atu ngan di Paresi titoro Yesu nen, “Lal yo Maro itaru be matan kala di tooltool ki ye i, in ole nge lo pombe?” Motong la Yesu iraua betanga kidi nen, “Lal yo Maro itaru be matan kala di tooltool ki ye i, in so ke be kakamata ye matamim a lomim galanga ye, ngan tiap. 21Ngan nen le ke be di tooltool tiyei ne, ‘Kakamata! Ya bi e i,’ too tiyei ne, ‘Kakamata! Ya meneng e ni,’ ngan tiap. Awete pang nen, yesoo bong lal yo Maro be matan kala di tooltool ki ye i, in pombe pang yang oo.”

22Motong la Yesu iwete pang di galiunu nen, “Awete pang nen, pang dama ni ye lal atu yo be pombe in nga, ngan ole lomim be le kakamata Tool Moolmool ke Maro, bong o ke be kakamata tiap. 23Ngan di tooltool kapala ole tiwete pang nen, ‘Kakamata, tool tani bi e i,’ too tiyei ne, ‘Kakamata, ya meneng e ni.’ Bong ngan kin kalongo betanga kidi a katoo di be. 24Awete nen, yesoo lal yo Tool Moolmool ke Maro be imulu a isi pang tana ye in nga, ngan ole dawa ben kili itai a nunngana ilangaraia lang katene mai i le imot. 25Bong muku ngan ole isolo masngana alunu san, inbe di tooltool yo nookoot tiyepe nga, ngan ole tiwala muridi panga lapau.

26“Ngan dada dook tiap ben yo tiyei ye lal ke Noa nga, ngan gaongo leu la be ole tiyei lapau ye lal yo Tool Moolmool ke Maro be imulu a isi ye i. 27Ye lal ke Noa nga, ngan di tooltool tikan be tiyin, inbe tamoto le garup tikerere, inbe tikap di natudi garup a la tipakere di pang di tamoto kapala, le le ilo ye lal ke Noa yo be iyiri a ilo ookoo lono ye i. Motong la oongoo mai pombe a iraumatamata di tooltool yo tilo ookoo lono tiap nga, ngan a timmata le imot.

28“Inbe ye lal ke Loto nga, ngan di tooltool tiyei urata gaongo nen leu. Di ngan tikan be tiyin, inbe tiyawar so le tiyimi so kidi diedi, inbe tikapki le titu ye renge rumu kidi. 29Bong ye kene yo Loto imadit a iyege Sodom a ila nga, ngan le ei ipa ye pat lutene imol ke lang katene dawa ben ki, a isi le si iraumatamata di tooltool ke Sodom tina a timatamata le imot.

30“Ngan gaongo leu, ye lal yo Tool Moolmool ke Maro be imulu a isi pombe mallangana ye in nga, ngan ole di tooltool tiyei dada nen lapau. 31Ngan lal tani in be pombe nga, ngan tool atu be iyepe piti pono ke rumu ki, inbe so ki dook mata sa iken rumu lono nga, ngan o ke be lon tut so ki tina ngan a idu ikap tiap, bong ipas le iyege sila ikino leu. Inbe gaongo leu, tool atu be iyepe kumu ki nga, ngan o ke be lon tut so ki tina ngan a imulu pang rumu ki tiap, bong ipas le iyege sila ikino leu. 32Lomim tut ye so yo pombe pang ye Loto rimana i. 33Be sei tool lono mai pang yepongo ki ke tana i mai mata a ikapye be iparama i, in ole ilene. Bong sei tool yo lono mai san ye yepongo ki ke tana i tiap, inbe iraia tinini le imot pau i, in ole ikaua yepongo dook mata yo taukan motingi i. 34Awete pang nen, ye kene tani in, kumata be Tool Moolmool ke Maro imulu a isi pombe bong, le di tooltool ru tiken gaongo ye kookoowoo ke kenongo atu nga, ngan atu ole Maro ikauu, inbe san in iyege sila ikino. 35-36Inbe gaongo leu, kumata be di garup ru titutngan dingding patunu pang sopalanga porong nga, ngan atu ole Maro ikauu, inbe san in iyege sila ikino.” +

37Ngan Yesu di galiunu tilongo tina yo iwete nen nga, le nga titoru. Tiyei ne, “Tool Mai, so tina nga, ngan ole pombe ngai?”

Ngan Yesu iraua torungu kidi a ikatte betanga nen, “Ye ni yo so imata ngan bobono iken ye i, in ni tani yo be di kamoko timan man tigaua ye i.”

Rau Ke Maro

© Wycliffe Bible Translators, Inc. All rights reserved

More Info | Version Index