Search form

Matiu 28

Yesu Imadit Mulu

(Maka 16:1-10; Luka 24:1-12; Yowan 20:1-10)

1Lal kidi Yuda ke sungunu in iman a ila, inbe ke san yo Sande i, in pombe. Motong la ye muntu ke ke tani ngan Madia ke malala Makdala iye Madia san tila be la matadi so agoro tani. 2Tila pombe le mooloo tiap, inbe nauningi mai itak, yesoo bangabangana ke Tool Mai atu ipa ke malala ke Maro a isi si ipulu pat tani yo ikatkala agoro koonoo in a ikoo. Motong la lo iwur pat tani in pono. 3Ngan bangabangana tani, in tinini i nunngana dawa ben kili itai, inbe sousoungu ki ikoko le ikoko san dawa ben eng tene kookoonoo nga. 4Ngan di tooltool ke patokongo pattu yo tikodokala agoro tani nga, ngan tikamata bangabangana tani le titattadai welewele a timolol du tikenen tana pono ben di tooltool matedi.

5Motong la bangabangana tani iwete pang di garup ru tina nen, “Kin katattadai be! Au i lok galanga yang nen, nga be man kasere Yesu, tool yo tipatota lo kai palasingi kaini a imata i. 6Bong ya in iyepe ni tiap. Ya in imadit mulu ye ni ke matenge oo, ben tina iwete nga. Le kaman man kakamata nene yo iken ye i. 7Lo ngan be kamulu palbe a la kawete pang di galiunu nen. Kayei ne, ‘Yesu imadit mulu ye ni ke matenge a imuku a ila pang Galili oo. Ole la kakamata nango.’ ” Bangabangana tani in iwete pang di nen a imot, motong la iwete mulu nen, “Oo, betanga tani nain la nookoot nga aweta pang koot i.”

8Di garup ru tina titattadai welewele, bong lodi ponana mai san lapau. Ngan nen le tiyege agoro tani, inbe tidada tarai be la tiwete pang Yesu di galiunu ye so tina yo pombe a tikamata nga. 9Tidada dada liwoonoo go, inbe pattu leu be Yesu pombe pang ye di a iwete pang di nen, “Muntu dook.” Motong la yaru tila potai ye a tigun turudi du dama ki, inbe tiparama kene a tisung panga. 10Motong la Yesu iwete pang di yaru nen, “Kin katattadai be! Bong angru kala ngan kawete pang di taik ngo a tila pang Galili. Ole la tikamatau nango.”

Betanga Kidi Tooltool Ke Patokongo

11Ye kene yo di garup ru tina ngan tipa dada liwoonoo ye in nga, ngan di tooltool ke patokongo tina yo tikodokala agoro ngan pattu tilo malala mai a lo tikaua bingi pang di tooltool maimai ke paroranga so pang Maro, ye so le imot yo pombe pang ye di nga. 12Motong la di tooltool maimai tina ke paroranga so pang Maro tiye di tooltool maimai kidi Yuda tigaua, inbe tiwetewete ye dada yo be titoo in nen, be ole tikap pat alunu pang di tooltool ke patokongo a be nen ngan kin tipapos pang di tooltool kapala ye so yo pombe, in be. 13Le nga tiwete pang di nen, “Le be kawete pang di tooltool nga, ngan kawete nen. Kayei ne, ‘Am nga, bong amkenen mata, inbe Yesu di galiunu timan tipinoo bobono a tikauu a tila oo.’ 14Le kumata be betanga i la tool kuto mai kidi Rom ni ilonga nga, ngan am nga ole amtarkoo ang inbe amkarata betanga panga, a nen ngan kayepe ye moonoo be.” 15Ngan nen le di tooltool ke patokongo tikap pat tina, inbe tiyei dawa ben tina tiwete pang di nga. Le betanga tani i, in di tooltool tina tigasa nen a ingaua ni mai i le imot ye di tooltool kidi Yuda, a iken nen le se nookoot katai nga.

Yesu Ikap Betanga Pang Di Galiunu Ye Urata Yo Be Tiyei Nga

(Maka 16:14-18; Luka 24:36-49; Yowan 20:19-23; Aposol 1:6-8)

16Motong la Yesu di galiunu sangaul be atu, ngan tila pang Galili a tipa so a tilo ye kawal yo Yesu iwete pang di be tilo ye i. 17Ye kene yo tilo a tikamata ye in nga, ngan le tisung panga. Bong di galiunu kapala ngan lodi rru kasin. 18Motong la Yesu iman potai ye di a iwete pang di nen, “Au i, Maro kaua gurana mai pau, le ayei Tool Mai pang so le imot yo iken ye malala ke Maro nga, inbe yo iken tana pono, ngan lapau. 19Ngan nanga, kala la karaia bingi dook mata i pang di tooltool ke ni mai i le imot a tilonga, a be nen ngan tiportak lodi le tiyei galiuk. Inbe karriu di ye Tamana ene, inbe ye Natunu ene, inbe ye Maro Amunu Silene ene lapau. 20Inbe kapatomonai di a titoo betanga le imot yo awete pang ye nga. Le awete pang nen, au i ole ayepe yang nen ye ke nga le imot, le ilo ye lal yo be tana i imot ye i.”

Rau Ke Maro

© Wycliffe Bible Translators, Inc. All rights reserved

More Info | Version Index