Search form

Matiu 9

Yesu Ikarata Tool Atu Kene Le Baene Ikap Rama Le Dook Mata Mulu

(Maka 2:1-12; Luka 5:17-26)

1Motong la Yesu iyiri lo ookoo pono, a isiut mulu pang ran koonoo san. Ngan le la pombe ye malala ki ya taunu.+ 2Ila pombe, motong di tooltool pattu titokotoko tool atu yo ikap rama le ipas le iken leu mie pono i, in a timan pang ye. Yesu ikamata di tooltool tina, ngan titara lodi medana panga moolmool nga, le tina iwete pang tool yo ikap rama in nen. Iyei ne, “Natuk, kin lom mede leu. Noonoo kiong, ngan agir oo.”

3Ye kene tani in di pannoongoo pattu ke ger ke Maro tilongo yo Yesu iwete nen nga, le nga di tapdi tiwetewete pang di nen, “Ona, tiap! Tool i nga yelei a iwete betanga nen nga? Nga o be ikaua Maro nene, too?”

4Tiyei nen ngan Yesu lon galanga ye lodi mukot, le nga itor di. Iyei ne, “Nga yelei be lomim kap gogo dada dook tiap nen nga? 5Soo betanga imarra be aweta i? Be awete panga nen, ‘Noonoo kiong ngan agir oo,’ too be awete panga nen, ‘Kumadit a kupa’? 6Bong au i lok be ayei nen, a be nen ngan ole lomim galanga nen, Tool Moolmool ke Maro, in gurana ki mai ye tana i ke be igiri noonoo kidi tooltool.” Yesu iwete nen a imot, motong la iwete pang tool yo ikap rama in nen, “Kumadit, a kouo mie kiong a kula pang rumu kiong.” 7Motong la tool tani, in imadit a ila pang malala ki. 8Yeisa be di tooltool malala mai tina ngan tikamata so yo Yesu iyeii i, ngan le titakrai, inbe tiyitmaka Maro ene ye yo ikaua gurana ki mai pang di tooltool nga.

Yesu Koonoo Pang Matiu

(Maka 2:13-17; Luka 5:27-32)

9Yesu iyege ni tani, inbe ipa a ila, ngan ikamata tool atu ke sodaningi pat+ yo ene Matiu+ i, in iwurur rumu ke sodaningi pat in lono. Motong la Yesu iwete panga nen, “Ai, kuman kutoo au.” Yo ngan tina le imadit a itoo Yesu.

10Motong la tiyepe a kene san in Matiu ikaua Yesu iye di galiunu pang rumu ki be lo tikan so. Ngan le di tooltool alunu ke sodaningi pat, inbe alunu ke yeingi noonoo, ngan di lapau la tilo a tiye Yesu tiwur, inbe tikan so nga. 11Yeisa be di Paresi tikamata di yo tiyei nen nga, yo ngan le taun titor di galiunu nen, “Ai! Nga yelei be pannoongoo kiang ni iye di tooltool ke sodaningi pat inbe di tooltool ke yeingi noonoo tigaua a tikan so nga?”

12Di Paresi tiwete nen, ngan Yesu ilongo di oo. Le nga ikatte betanga pang di nen, “Di tooltool yo tinidi dook mata nga, ngan tool ke bar ke be ipa pang ye di tiap, bong di tooltool la matamatenge ikap di nga. 13Au i lok be kala ngan lomim kaua urata dook ye betanga yo Maro iweta a iken ye rau ki i, in lono ki belei? Ngan betanga tani in nen, ‘Dada yo lok panga mata i, in nen, be lomim mulumulu ye di tooltool a kayei dada dook mata pang di, bong ye dada yo ke paroranga so pau, in tiap.’- Ngan nanga, asi nga be si akiu di tooltool yo noonoodi, nga tiap, bong asi be si akiu di tooltool yo ke noonoo nga.”

Tooltool Kapala Titoro Yesu Ye Sapanga Ye Kaningi

(Maka 2:18-22; Luka 5:33-39)

14Motong la Yowan yo irriu di tooltool in di galiunu timan pang ye Yesu a man titoru. Tiyei ne, “Ai, nga yelei be amye di Paresi nga amsapa ye kaningi so, e di galium nga tisapa ye kaningi so tiap nga?”

15Ngan Yesu iraua torungu kidi nen, “Kumata tamoto atu yo be ikere i, in ikiu di sokana le di tooltool ki be man tiye tiyepe ye kerenge ki nga, ngan yelei, ole lodi modoko a tisapa ye kaningi, too tiap? Tiap yege! Bong pang dama ni ngan ole di tooltool tikaua tool tani yo be ikere in le iyege di tooltool ki nga, ngan la be ole lodi modoko a tisapa ye kaningi nga.”

16Motong Yesu iwete pang di mulu nen, “Tool sa ke be ikaua wam timunu yo paunu i a idede sousoungu ki yo gurunu in gumono ye tiap. Kumata be iyei nen le be ingasi nga, ngan wam timunu tani yo paunu in ole irauwat le isarraka sousoungu gurunu tani le dook tiap. 17Inbe gaongo leu, di tooltool ke be tipaling ooroo wain surunu yo paunu, ngan ilo ye dap gurunu yo tikarata ye asara kulini, in tiap. Kumata le be tiyei nen, inbe ran medana isung nga, ngan ole dap gurunu tani putumbe le dap in dook tiap, inbe ran medana tina ngan imati du tana. Ngan nanga, ooroo wain surunu yo paunu nga, ngan ole tipaling lo ye dap yo paunu nga, ngan la be yaru le ru tiken dook nga.”

Yesu Ikarata Garup Yo Iyolo Rara I, Inbe Ipamaditi Garup Kase Yo Imata I

(Maka 5:21-43; Luka 8:40-56)

18Yesu nga iwetewete pang di tooltool tina ngan go, inbe tool kuto mai ke rumu kidi Yuda ke gaongo in idu le du igun turunu du Yesu kene punu ke dama, inbe iwete panga nen, “Atoo, natuk garup ni nookoot yege imata nga. Bong lok be ayong tadi rumu kiau, a be nen ngan di kupaloko baem lo pono, ngan imaur mulu.” 19Motong la Yesu imadit a iye di galiunu titoo tool kuto mai tani a tiye tidi.

20Ye kene yo tidi ye in nga, ngan garup atu yo iyolo rara ye rai sangaul be ru i, in ipa ke Yesu murini le isulmaia baene la itoko sousoungu matolene ki, in matana. 21Ngan garup tani, in ya taunu lon wetewete nen, “Kumata le be atoko sousoungu ki leu nga, ngan ole tinik dook mata mulu.”

22Bong Yesu iyetaii le nga iportak ngan ikamata garup tani. Le iwete panga nen, “Natuk, kin lom mede leu. Lo medana kiong yo kutaru pau i, in la ikaratong le tinim dook mata mulu i.” Tina Yesu iwete panga nen nga, ngan le ye kene tani in tinini dook mata mulu.

23Motong la Yesu ipa le di pombe ye rumu ke tool kuto mai tani in a ilo lono, ngan ikamata di tooltool yo timai kaur, inbe di tooltool budanga mai yo titangtang a tipadingi ni nga. 24Le nga Yesu ipasak pang di. Iyei ne, “Ai, kakoo a kadu tana! Garup kase in imata tiap, bong iken mata leu.” Ngan nen le di tooltool tina tingeleraii ye yo iwete nen nga. 25Motong la iwete a di tooltool tina ngan di le imot tidu tana, inbe ilo rumu lono ye ni yo garup kase in iken ye i, a lo itoko baene, ngan le imadit a imaur mulu. 26Ngan nen le bingi ke garup kase tani, in ipa le ingaua tana mai i le imot.

Yesu Ikarata Di Tooltool Mata Kis Ru Inbe Tool San Yo Men Modo I

27Motong la Yesu iyege malala tani, inbe ipa mulu nga. Ngan di tooltool mata kis ru titoo a koodi panga nen, “Atoo, Dawiti natunu! Lom pam a kulonam.”

28Yesu ipa a ilo rumu lono, ngan di tooltool mata kis ru tina ngan timan pang ye. Motong la itor di yaru nen, “Angru katara lomim medana yau be ole ayeie urata nen yang angru?”

Ngan yaru tiraua betanga ki nen, “E, Tool Mai.”

29Motong la Yesu itara baene lo yaru matadi, inbe iyei ne, “Ye lo medana kiang yo angru kataru pau i, in la ole so tani in pombe pang yang.” 30Ngan le di tooltool ru tina ngan matadi rere. Motong la iwete betanga medana pang di nen, “Kin angru kapapos pang di tooltool kapala ye so yo pombe pang yang i, in be.” 31Bong ngan yaru tipa be tikaua bingi ye urata yo Yesu iyeii pang di yaru i, in pang di tooltool ke malala nga le imot ye tana mai tani a tilonga.

32Ye kene tani, in di tooltool ru tina ngan tipa a tila, inbe di tooltool kapala tikaua tool san yo so sadi idiwidiwoo a men modo le iwetewete tiap i, in a timan pang ye Yesu. 33Motong la Yesu inganga so sadi ye tool tani in a iwetewete nga. Ngan tina iyei nen, le nga di tooltool tina yo tigaua nga, ngan tikamata le titakrai, inbe tiyei ne, “Ona! Muku ngan amkamata so sa nen pombe Isrel tiap sa.”

34Bong ngan di Paresi tiyei ne, “Tiap! Tool in inganga di so sadi ye gurana yo tool kuto mai kidi so sadi ikauu panga i.”

Yesu Lono Pang Di Tooltool Malala Mai

35Motong la Yesu ipa mulu a ila ye malala atu atu nga le imot, inbe ilo ye rumu kidi Yuda ke gaongo a ipatomonai di, inbe iwetewete pang di ye bingi dook mata ke dada yo Maro be matan kala di tooltool ki ye i. Inbe ikarata di tooltool yo matamatenge matana matana ikap di nga, ngan le tinidi dook mata mulu. 36Ngan Yesu ikamata di tooltool malala mai yo man tigaua nga, ngan lono pang di mai san. Yesoo, di ngan moonoo alunu pompombe pang ye di, inbe di tapdi ke be tilon di tiap, le di ngan dawa ben di sipsip yo taukadi taudi yo be matan kala di nga. 37Ikamata di nen, le nga iwete pang di galiunu. Iyei ne, “Kaningi alunu kaiye la isullungu a iken kumu ngo, bong di tooltool ke urata yo be tikap a tiwinoko nga, ngan alunu tiap. 38Ngan nanga, ole kapatarau pang Tool Mai yo kumu taunu i, a be nen ngan iwanga di tooltool ke urata sa mulu la tikap kaningi kanono a tiwinoko.”

Rau Ke Maro

© Wycliffe Bible Translators, Inc. All rights reserved

More Info | Version Index