Search form

الْأَعْمَالْ 16

الْفَصْلْ سْطَّاشْ

بُولُسْ كَيْتّْلَاقَى مْعَ تِيمُوتَاوُسْ

1وْوْصَلْ بُولُسْ لْدَرْبَة وْمْنْ بَعْدْ دَازْ لْلِسْتْرَة، وْكَانْ فِيهَا وَاحْدْ التّْلْمِيدْ سْمِيتُه تِيمُوتَاوُسْ، وَلْدْ وَاحْدْ الْمْرَاة يْهُودِيَّة وْلَّاتْ مُومْنَة، وْبَّاهْ يُونَانِي. 2وْكَانُو الْخُوتْ كَيْشَهْدُو لْهَادْ الْوَلْدْ بْالْخِيرْ فْلِسْتْرَة وْإِيقُونِيَة. 3وْبْغَا بُولُسْ يْدِّيهْ مْعَاهْ فْالسّْفَرْ دْيَالُه، وْهُوَ يْخَتّْنُه بْسْبَابْ لِيهُودْ اللِّي فْدِيكْ الْبْلَادْ، حِيتْ كُلّْهُمْ كَانُو كَيْعَرْفُو بْلِّي بَّاهْ يُونَانِي. 4وْمْلِّي كَانُو كَيْسَافْرُو مْنْ مْدِينَة لْمْدِينَة، بْدَاوْ كَيْبَلّْغُو الْمُومْنِينْ بْالْوْصِيَّاتْ اللِّي خَرْجُو بِيهَا الرُّسُلْ وْالشّْيُوخْ فْأُورْشَلِيمْ، وْكَيْوَصِّيوْهُمْ يْدِيرُو بِيهَا. 5وْكَانُو الْكْنَايْسْ كَيْكَبْرُو فْالْإِيمَانْ، وْكَيْتّْزَادُو فِيهُمْ الْمُومْنِينْ كُلَّ نْهَارْ.

الرُّؤْيَا دْيَالْ بُولُسْ فْمْدِينْةْ تَرْوَاسْ

6وْدَازْ بُولُسْ وْسِيلَا وْتِيمُوتَاوُسْ مْنْ فِرِيجِيَّة وْغَلَاطِيَّة، حِيتْ الرُّوحْ الْقُدُسْ مَا خْلَّاهُمْشْ يْخَبّْرُو بْكْلَامْ اللَّهْ فْآسْيَا. 7وْمْلِّي قَرّْبُو مْنْ مِيسِيَّا، حَاوْلُو يْدَخْلُو لْبِتِينِيَّة، وَلَكِنْ رُوحْ يَسُوعْ مَا خْلَّاهُمْشْ. 8وْهُمَ يْدُوزُو عْلَى مِيسِيَّا وْنْزْلُو لْتَرْوَاسْ. 9وْفْاللِّيلْ شَافْ بُولُسْ وَاحْدْ الرُّؤْيَا، وْبَانْ لِيهْ رَاجْلْ مْنْ بْلَادْ مَكِدُونِيَة وَاقْفْ كَيْطْلْبُه وْكَيْݣُولْ لِيهْ: «أَجِي لْعَنْدْنَا لْمَكِدُونِيَة وْعَاوْنَّا!». 10وْمْلِّي شَافْ بُولُسْ هَادْ الرُّؤْيَا، بْغِينَا دِيكْ السَّاعَة نْسَافْرُو لْمَكِدُونِيَة، مْتْيِقّْنِينْ بْلِّي اللَّهْ عَيّْطْ لِينَا بَاشْ نْخَبّْرُوهُمْ بْالْبْشَارَة.

بُولُسْ وْسِيلَا فْمْدِينْةْ فِيلِبِّي

11وْسَافْرْنَا فْالْبْحَرْ مْنْ تَرْوَاسْ لْسَامُوتْرَاكِي، وْالْغَدّْ لِيهْ دْزْنَا لْنِيَابُولِيسْ، 12وْمْنّْهَا دْزْنَا لْفِيلِبِّي، اللِّي هِيَ الْعَاصِمَة دْيَالْ بْلَادْ مَكِدُونِيَة وْاللِّي مْسْتَعْمْرِينْهَا الرُّومَانْ. وْݣْلَسْنَا فْهَادْ الْمْدِينَة شِي يَّامَاتْ. 13وْنْهَارْ السّْبْتْ خْرَجْنَا مْنْ الْمْدِينَة لْجَنْبْ الْوَادْ، وْفْبَالْنَا بْلِّي غَنْلْقَاوْ شِي بْلَاصَة دْيَالْ الصّْلَاة. وْݣْلَسْنَا كَنْتّْكَلّْمُو مْعَ الْعْيَالَاتْ اللِّي كَانُو مْجْمُوعِينْ. 14وْكَانْتْ بِينَاتْهُمْ وَاحْدْ الْمْرَاة كَتْسْمَعْ لِينَا سْمِيتْهَا لِيدْيَا مْنْ تِيَاتِيرَا، كَتْبِيعْ التُّوبْ الْمْدَادِي وْكَتْعْبَدْ اللَّهْ. وْفْتَحْ الرَّبّْ قَلْبْهَا بَاشْ تْرَدّْ الْبَالْ لْلْكْلَامْ اللِّي كَيْݣُولُه بُولُسْ. 15وْمْلِّي تّْعَمّْدَاتْ هِيَ وْعَائِلْتْهَا، رْغْبَاتْنَا وْݣَالْتْ لِينَا: «إِلَا كْنْتُو كَتْحْسْبُونِي مُومْنَة بْالرَّبّْ، أَجِيوْ لْدَارِي وْݣْلْسُو عَنْدِي». وْبَزّْزَاتْ عْلِينَا بَاشْ نْقَبْلُو.

بُولُسْ وْسِيلَا فْالْحَبْسْ

16وْوَاحْدْ الْمَرَّة مْلِّي كْنَّا غَادْيِينْ لْمُوضْعْ الصّْلَاة، تّْلَاقَاتْنَا وَاحْدْ الْخْدَّامَة وْهِيَ شْوَّافَة، وْكَانْتْ كَتْجِيبْ بْزَّافْ دْ الْفْلُوسْ لْسْيَادْهَا مْنْ هَادْ الْخْدْمَة. 17وْتْبْعَاتْ بُولُسْ وْحْنَا مْعَاهْ، وْهِيَ كَتْݣُولْ بْالْغْوَاتْ: «رَاهْ هَادْ الرّْجَالْ عْبِيدْ دْيَالْ اللَّهْ الْعَالِي، كَيْخَبّْرُوكُمْ بْطْرِيقْ النّْجَا!». 18وْبْقَاتْ يَّامَاتْ كْتَارْ وْهِيَ كَتْدِيرْ هَادْشِّي حْتَّى تْقَلّْقْ بُولُسْ بْزَّافْ، وْضَارْ لْجِهْتْهَا وْݣَالْ لْلْجّْنْ اللِّي سَاكْنْ فِيهَا: «كَنْآمْرَكْ بْإِسْمْ يَسُوعْ الْمَسِيحْ بَاشْ تْخْرُجْ مْنّْهَا». وْهُوَ يْخْرَجْ دِيكْ السَّاعَة. 19وْمْلِّي شَافُو سْيَادْهَا بْلِّي مَا بْقَى عَنْدْهُمْ رْجَا فْالرّْبَحْ، شْدُّو بُولُسْ وْسِيلَا وْجَرُّوهُمْ لْلسُّوقْ لْعَنْدْ صْحَابْ السُّلْطَة، 20وْمْلِّي جَابُوهُمْ لْعَنْدْ الْقُيَّادْ ݣَالُو لِيهُمْ: «هَادْ الجُّوجْ دْ الرّْجَالْ كَيْدِيرُو الْفُوضَى فْمْدِينْتْنَا، وْرَاهُمَ يْهُودْ، 21وْكَيْخَبّْرُو بْعَادَاتْ مَا خَاصّْنَاشْ نْقَبْلُوهَا وْلَا نْدِيرُو بِيهَا حِيتْ حْنَا رُومَانِيِّينْ». 22وْنَاضْتْ الجّْمَاعَة دْ النَّاسْ ضْدّْهُمْ، وْشَرّْݣُو الْقُيَّادْ لْبُولُسْ وْسِيلَا حْوَايْجْهُمْ وْآمْرُو بَاشْ يْضْرْبُوهُمْ بْالْعْصِي. 23وْمْلِّي ضْرْبُوهُمْ بْزَّافْ لَاحُوهُمْ فْالْحَبْسْ، وْوْصَّاوْ الْعْسَّاسْ دْ الْحَبْسْ بَاشْ يْعَسّْ عْلِيهُمْ مْزْيَانْ. 24وْمْلِّي سْمَعْ الْعْسَّاسْ دْ الْحَبْسْ هَادْ الْوْصِيَّة، رْمَاهُمْ فْقَاعْ الْحَبْسْ، وْدَارْ لِيهُمْ رْجْلِيهُمْ فْالْقَرْطَة دْيَالْ الْخْشَبْ.

25وْفْنَصّْ اللِّيلْ كَانْ بُولُسْ وْسِيلَا كَيْصَلِّيوْ وْكَيْسَبّْحُو اللَّهْ، وْالْمْحَابْسِيَة كَيْتّْصَنّْتُو لِيهُمْ، 26وْعْلَى بَغْتَة طْرَا زْلْزَالْ قْوِي حْتَّى تّْهَزُّو السِّيسَانْ دْ الْحَبْسْ، وْتّْحَلُّو الْبِيبَانْ كُلّْهُمْ، وْتّْفَكُّو السّْنَاسْلْ دْيَالْ الْمْحَابْسِيَّة كُلّْهُمْ. 27وْمْلِّي فَاقْ الْعْسَّاسْ دْ الْحَبْسْ مْنْ النّْعَاسْ، وْشَافْ بِيبَانْ الْحَبْسْ مْحْلُولِينْ، ضْنّْ بْلِّي الْمْحَابْسِيَّة هَرْبُو. وْهُوَ يْخَرّْجْ سِيفُه بَاشْ يْقْتَلْ رَاسُه، 28وَلَكِنْ بُولُسْ عَيّْطْ عْلِيهْ بْصُوتْ عَالِي وْݣَالْ لِيهْ: «عَنْدَاكْ تْآدِي رَاسْكْ، رَاهْ حْنَا كُلّْنَا هْنَا!». 29وْجَابْ الْعْسَّاسْ الضُّو وْدْخَلْ بْالزّْرْبَة لْلْحَبْسْ وْطَاحْ قُدَّامْ رْجْلِينْ بُولُسْ وْسِيلَا وْهُوَ كَيْتّْرَعّْدْ. 30وْمْنْ بَعْدْ خَرّْجْهُمْ مْنْ الْحَبْسْ وْݣَالْ: «آ سْيَادِي، شْنُو خَاصّْنِي نْدِيرْ بَاشْ نّْجَا؟». 31وْهُمَ يْجَاوْبُوهْ: «آمْنْ بْالرَّبّْ يَسُوعْ وْغَتْنْجَا نْتَ وْمَّالِينْ دَارْكْ». 32وْخَبّْرُوهْ بْكْلَامْ الرَّبّْ هُوَ وْمَّالِينْ دَارُه كُلّْهُمْ. 33وْدَّاهُمْ فْدِيكْ السَّاعَة فْاللِّيلْ وْغْسَلْ الجّْرْحْ دْيَالْهُمْ، وْتّْعَمّْدْ هُوَ وْمَّالِينْ دَارُه كُلّْهُمْ. 34وْمْنْ بَعْدْ، عْرَضْ عْلِيهُمْ لْدَارُه وْعْطَاهُمْ يَاكْلُو. وْفْرَحْ هُوَ وْمَّالِينْ دَارُه كُلّْهُمْ حِيتْ آمْنُو بْاللَّهْ.

35وْمْلِّي طْلَعْ الصّْبَاحْ، صِيفْطُو الْقُيَّادْ الْمْسْؤُولِينْ دْ الْأَمْنْ بَاشْ يْݣُولُو لْلْعْسَّاسْ دْ الْحَبْسْ: «طْلَقْ هَادُوكْ الرّْجَالْ بْجُوجْ!». 36وْوَصّْلْ الْعْسَّاسْ دْ الْحَبْسْ هَادْ الْكْلَامْ لْبُولُسْ، وْݣَالْ لِيهْ: «الْقُيَّادْ آمْرُو بَاشْ نْطَلْقُوكُمْ، وْدَابَا خَرْجُو وْسِيرُو عْلَى سْلَامْتْكُمْ!». 37وَلَكِنْ بُولُسْ ݣَالْ لْلْمْسْؤُولِينْ دْ الْأَمْنْ: «ضْرْبُونَا عَايْنْ بَايْنْ بْلَا مَا يْحَاكْمُونَا، وَاخَّا حْنَا رُومَانِيِّينْ، وْلَاحُونَا فْالْحَبْسْ. وْدَابَا، بْغَاوْ يْخَرّْجُونَا فْالسِّرْ؟ رَاهْ حْنَا مَا خَارْجِينْشْ مْنْ هْنَا حْتَّى يْجِيوْ الْحُكَّامْ بْرَاسْهُمْ يْخَرّْجُونَا!». 38وْوَصّْلُو الْمْسْؤُولِينْ دْ الْأَمْنْ هَادْ الْكْلَامْ لْلْقُيَّادْ، وْمْلِّي سْمْعُو بْلِّي بُولُسْ وْسِيلَا مُوَاطِنِينْ رُومَانِيِّينْ خَافُو. 39وْهُمَ يْجِيوْ لْعَنْدْهُمْ كَيْطْلْبُو السّْمَاحَة، وْطَلْقُوهُمْ وْطْلْبُو مْنّْهُمْ بَاشْ يْخَرْجُو مْنْ الْمْدِينَة. 40وْمْلِّي خْرَجْ بُولُسْ وْسِيلَا مْنْ الْحَبْسْ، مْشَاوْ لْعَنْدْ لِيدْيَا، وْشَافُو الْخُوتْ تْمَّ وْشَجّْعُوهُمْ وْمْشَاوْ بْحَالْهُمْ.

الإنجيل بالدراجة المغربية

© 2012 دار الكتاب المقدس بالمغرب. جميع الحقوق محفوظة

© 2012 Morocco Bible Society. All rights reserved

More Info | Version Index